Баянхонгор аймаг байгуулагдсаны түүхт 80,81 жилийн ой, Хангайн бүсийн хурд их баяр наадмын хүрээнд Төрийн шагналт зохиолч, яруу найрагч Ч.Лхамсүрэнгийн нэрэмжит "ХҮРЭН МОРЬ-2022" 32 дахь удаагийн яруу найргийн наадмын II шатанд оролцох яруу найрагчдын нэрс тодорчээ. Яруу найргийн эхний шатны шалгаруулалтыг зохион байгуулагч байгууллагуудын төлөөлөл, ажлын хэсгийнхэн шалгаруулсан бөгөөд яруу найргийн наадмыг хүндэтгэн эх орныхоо өнцөг булан бүрээс уран бүтээлээ ирүүлэн хамтарч ажиллаж байгаа нийт яруу найрагчид оролцож буй аж. "ХҮРЭН МОРЬ-2022" 32 дахь удаагийн яруу найргийн наадам 2022 оны долдугаар сарын 22-ны өдөр 13.00 цагт Хүүхдийн Тэмүжин театрт эхлэх гэнэ.

Тэртээ 1990 оны цагаан морин жилд аймгийн намын хорооны санаачилгаар анх удаагаа зохион байгуулагдаж байсан төрийн шагналт зохиолч, яруу найрагч Чойжилжавын Лхамсүрэнгийн нэрэмжит "Хүрэн морь" яруу найргийн наадамд Хонгор нутгийн улсдаа нэртэй яруу найрагч Дондогдоржийн Халзан, Ванхүүгийн Батбаяр, Галсангийн Цэрэн, Рэнчины Мөнхтариа, Лханаагийн Мөнхтөр нар аваргалж явсан түүхэн улбаатай билээ. Эл наадам өдгөө 32 дэх жилийнхээ нүүрийг үзэж буй юм. Ингээд уншигч та “Хүрэн морь” 31 дахь удаагийн тэргүүн байрын шагналт яруу найраг Н.Гантулгын шүлгийг хүргэж байна.

НАМРЫН НАМАРТ ХОНГОР НУТАГТ

Намрын намарт Хонгор нутагтаа ирж

Насныхаа авшиг, найргийнхаа галыг асаадаг би

Тос даасан хүрэн уулсынх нь буян нөөлөг

Торго шиг зөөлөн хүн зоных нь хайранд хөлбөрдөг би

Сунайх тэнгэрийн хаяа, газрын өргөн цээж рүү

Судсаар минь лугшин урсах шиг Түйн гол мэлмэрч

Хүмүүний алаг замбуулинд эцгийнхээ сууг мэдрэх шиг

Хүрэн талын бэлчирт хийморийн сүлдээ дууддаг би

Байдрагийн гармыг мянган адуу хага яран гарах шиг

Байж ядтал цээж давчдан ус дусагнуулан уйлагнахад

Дуниарсан цагаан мананг цуулж Номхон хайрхны тэргүүнд

Дууны торгон аялгуу шиг асгарснаа сэтгэл дэнслэн боддог би

Оргил өндрөөс зурагдсан сэрэл мэдрэмжийн уяхан туйл

Оюу Номин нуурын алтан амсарт хайраа сөгнөсөн чи минь

Сэтгэл сэнсэрсэн намрын говийг хулангийн тоосонд хэрчсэн ч

Сэгс цагаан Богдын чинь шаналант хаяаг зүрх алдан санадаг би

Цэц мэргэдийн судал аадрын дараах солонго шиг татаж

Цэцэн найрагчдынх нь шүлгийн мөрүүдэд агсагдсан үрээ шиг сульддаг би

Тэр чигээрээ симфони нүргэлэх шиг тэнгэрийн хормой чичирхийлж

Тэнгэрлиг амьдрахуйн гэгээн сайхныг өвч биеэрээ амсдаг би

Намрын намарт Хонгор нутагтаа ирж

Насныхаа авшиг, найргийнхаа галыг асаадаг би

Тос даасан хүрэн уулсынх нь буян нөөлөг

Торго шиг зөөлөн хүн зоных нь хайранд хөлбөрдөг би