"Их долоо"-гийн удирдагчид өчигдөр Германд уулзаж байх үеэр Оросын арми Украины нийслэл Киев хотыг пуужиндсан. Тус дайралтын улмаас нийслэлд байсан нэг хүн амиа алдаж, зургаан хүн хүнд шархадсан талаар Украины Ерөнхийлөгч Володимир Зеленский мэдэгджээ.

                          Украин Улсын агаараас хамгаалах хүчний мэдээлснээс ОХУ-ын Астрахань мужийн нутаг дэвсгэрээс буюу 1000 гаруй километр зайнаас 4-6 пуужин харвасан байна. Оросын армийн тус үйлдлийг "Их долоо"-гийн уулзалтад оролцож байсан АНУ-ын Ерөнхийлөгч Жо Байден "Оросуудын зэрлэг, балмад байдлын илрэл" гэсэн аж.

"Их долоо" өчигдрийн уулзалтаараа Украинд нэмэлт зэр зэвсэг илгээхээр тохирчээ. Мөн АНУ, Их Британи, Канад, Япон Улс ОХУ-ын алтны импортод хориг тавих санал гаргажээ.