Рок попын даруухан дуучин Б.Чойжилсүрэн "Яг түүн шиг" шоунд орж байгаа билээ. Тэгвэл тэрбээр өнгөрсөн ням гарагийн дугаарт жентельмен залуугийн дүрийг гаргаж, "“Singing in the rain”-ийг бороонд бүжиглэж,дуулсан. Энэ үеэр түүний үзүүлбэр залуу дуучин Ч.Мишээлтэй тэнцэж, тэр өөрийнхөө эрдэнэ мэт гурван оноогоо өгснөөр Ч.Мишээл түрүүлсэн юм. Хүмүүс түүний эл үйлдэлд ихэд хайр хүрч, түүний ухаалаг, хамтрагчаа гэсэн сэтгэлийг нь үнэлж, "Жинхэнэ уран бүтээлч юм" хэмээсэн нь ч бий. 

  Урт үс, өнгийн сорочкон цамцтай туранхай өндөр уран бүтээлч гэхээр түүний бидэнд хэдийн танил дүр төрх бууж байгаа болов уу. Тэр яг ингээд үүл, эсвэл сарны дэргэд суугаад гитараа барин дуугаа дуулж, мэдрэмжийн далайд үзэгч, сонсогчдыг аялуулдаг. Хүмүүс түүний дууг сонсоод, хүрч чадахгүй мөрөөдөл рүүгээ гараа сунгаж, заримдаа үүл болоод сарны хажууд очиж, тэртээ үлдсэн дурсамжаа нэхэн боддог гэдэгт эргэлзэхгүй байна.

    Тийм ээ, “Хүрч чадахгүй”, “Хаврын ганц улиас”, “Санана даа” , “Чамд л үлдээе” зэрэг хүмүүсийн сэтгэл зүрхний хөг, хэмнэлийг эвдсэн хөнгөн гэмээр уянгалаг дуунуудаараа рок попын ертөнцийн даруухан дуучин Б.Чойжилсүрэнг мэдэхгүй хүн үгүй болов уу. Үг өөрөө зохиож, аяаа хийчихдэг чамгүй авьяаслаг эл уран бүтээлч ихэвчлэн чимээгүйхэн уран бүтээлээ туурвидаг. Энэ хэрээрээ намтар түүх нь ч бүдэг байх бөгөөд хэвлэлд өгсөн цөөн ярилцлагадаа л өөрийнхөө тухай товчхон өгүүлсэн байх нь бий. Тэрбээр багаасаа гитар тоглодог, хамтлагт дуулдаг байжээ. Тодруулбал, долоон настайгаасаа хамтлагт дуулж, дуу хөгжмийн ертөнц рүү "алхаад" орчихсон гэдэг түүний орших, аз жаргалыг мэдрэх цорын ганц зүйл нь дуу хөгжим гэнэ. Олны чимээ шуугианаас ихэвчлэн тусгаар байж, өөрөө өөртэйгээ төвлөрч ажилладаг тэрбээр тэр хэрээр сонин содон, мөнхүү өвөрмөц уран бүтээлүүдийг төрүүлчихдэг.

    Анхлан Хөгжим бүжгийн коллежид хийлчээр суралцаж байгаад ангийн найзуудтайгаа хамтран “The Pips” нэртэй хамтлаг байгуулж байсан байна. Уг нь мэргэжлийн хийлч болох байсан атал тэрбээр өөрөө дуу хиймээр санагдсанаар хамтлаг байгуулж, уран бүтээл туурвиж эхэлжээ. Хүмүүст хүрсэн уран бүтээл хийнэ гэхээсээ илүү өөрийнхөө сонирхол, хүсэлд нийцүүлэн хөгжим зохиож, дуу бүтээж байж. Тухайн үед анхлан хамтлаг байгуулж буй залуу уран бүтээлчдэд “lemons” хамтлаг ихэд нөлөөлж, тус хамтлагийн ах нараа даган уран бүтээлээ туурвиж эхэлжээ. Б.Чойжоогийн анхны цомог нь  “Оддын дунд үлдсэн дүр”. Тэрбээр энэхүү цомгоо ид хийж, бүтээх, дуу гаргах хүсэл мөрөөдөл оргилж байх үедээ гаргаж түүний дараа хэсэг дуу хөгжмөөс өөрийгөө тусгаарлаж, хөдөө ажил хийхээр явжээ.

    Ингэхдээ 20 настай байхдаа дуу хийх хүслээсээ түр жаахан хөндийрч хөдөө очиж, “Оюу толгой” ХХК-д ажилласан байна. Энэ талаараа тэрбээр “Хэсэг хөдөө ажиллах гэж үзсэн. Надад цагт баригддаг ажил тохирохгүй юм билээ. Тэгээд л эргээд хүсэл мөрөөдлөөрөө дуу хөгжмөө хийж эхэлсэн дээ. Тэгээд л найзтайгаа хамтарч дуу хийхээр шийдэж, хамтран үгийг нь зохиосноор “Хүрч чадахгүй” уран бүтээлийг хийсэн” хэмээн ярьсан байдаг. Ийн чимээгүйхэн уран бүтээлээ туурвиж байсан тэрбээр саяхнаас үзэгчдэд ойр байж, чимээ аниргүй амьдралаа эвдсэн нь “Яг түүн шиг” шоу.

   Эл шоугаар бид өөр өөр Б.Чойжоог харж байгаа бөгөөд Б.Чойжоо ч өөрийгөө эвдэж, хэрдээ нээж, үзэгчдэдээ уран бүтээлийн, дүрийн бэлэг барьсаар буй. Тэрбээр “Яг түүн шиг” шоунд эмэгтэй болж, илүү задгай хувцаслаж, хоолойгоо бүдүүсгэж, стил имижээ өөрчилж буй. Ганцхан жишээ дурдахад тэрбээр Мөнхийн залуу Модданаг тайзан дээр үзүүлсэн нь үзэгчдэд шинэ нээлт болсон. Магад хэзээ ч дуучин Б.Чойжоог тийм дүр төрхтэйгээр харна гэж бодоогүй байх. Тэгэхээр даруухан уянгалаг хоолойт Б.Чойжоо эл шоугаар өөрийгөө эвдэж, өөр нэгэн дайчин, гал цогтой, асаж, дүрэлзсэн Б.Чойжоог бидэнд үзүүлж байна.