МОНГОЛ СОНГОДОГ Г.АРИУНБААТАРТ "BROVA” ШАГНАЛ ХҮРТСЭНД ХАЛУУН БАЯР ХҮРГЭЕ

2022-04-23, 402

Энэ цагийн эгэлгүй эзэн, Монголоос төрсөн дэлхийн сонгодог Г.Ариунбаатар өнөөдөр ээлжит сайхан мэдээгээ үзэгч, сонсогч түмэндээ дуулгалаа. Үргэлж сайхан мэдээ дуулгаж, дэлхийн дайдад бүрнээ хамаарагдсан бидний бахархалт, Монгол баритон хоолойт түүний амжилт, бахархлыг дурдаад барашгүй гэдгийг уншигчид андахгүй мэднэ байх. Зүгээр л Монголоос төрсөн дэлхийн сонгодог бол тэр. Өөр тодорхойлолт, илүү гоё чамин үг түүнд хэрэггүй болов уу.

Ердөө хорь гаруйхан насандаа Дэлхийн дуурийн "Чайковскийн" нэрэмжит уралдааны тэргүүн байрыг эзэлж, гуч гараад "Чингис хаан" одонгийн эзэн болж, Монголоос дэлхийн дуурийн урлаг руу унаган хоолой, угийн авьяас, торгон мэдрэмжээрээ цолгорч, тодорсон дэлхийн дуучин тэрбээр өнөөдөр ч гайхамшгаа түгээж, дэлхийн дайдад нэр нь мандсаар байна. Тодруулбал, тэр өнөөдөр Евраазийн 15 улсын мэргэжлийн хөгжмийн уран бүтээлчдээс аваргуудыг тодруулдаг "Brova" шагнал гардуулах ёслолын дуурийн шилдэг эрэгтэй гоцлол дуучны төрөлд нэр дэвшиж, шилдгээр шалгарчээ.

Төв аймгийн Баян-Өнжүүл сумын уугуул тэрбээр Цагдаагийн “Сүлд” чуулгаас уран бүтээлийн гараагаа эхэлж, Оросын Холбооны Улсын Санк-Петербург хотын Марийнский театр болон Буриадын Дуурь Бүжгийн Эрдмийн театрын гоцлол дуучнаар ажиллаж буй. Мадчны хотноос СУИС-д дуурийн дуучнаар суралцаж, дэлхийн дуучин болсон эгэл жирийн хүү өдгөө Монголын сонгодог урлагийн хөгжлийг чамгүй ахиулсан гэдэгтэй хэн ч маргахгүй байх. Маргах ч аргагүй юм. Түүн шиг дэлхийн орнуудын томоохон тайзуудыг эзэгнэж, шагналыг нь түүсэн эрхэм байгаагүй. Тэр л түүчээлж алхаж, араасаа чамгүй олон залууг тайз руу гаргаж, шагналын буухианд хүргэсэн. Тэргүүн эгнээнд нь өөрөө л алхаж явсныг хэн бүхэн андахгүй.

Г.Ариунбаатар дуучин айхтар багаасаа дуулж хуурддаг, гоц гойд нэгэн байгаагүй ч тэрбээр СУИС-д өөрийгөө ихэд хөгжүүлж, томоохон уралдаан тэмцээнүүдийг алгасдаггүй тухайгаа олон ч ярилцлагаараа хэлдэг. Ерөөсөө оюутан болж, багшийнхаа үгийг, заасан сургасны мөрөөр, өөрийгөө хөгжүүлж, томсгож, өндөржүүлж чадсан. Түүгээрээ л зогсолтгүйгээр зүтгэж, өнөөдөрт хүрсэн гэдэг. Угаас нэг шийдсэн, нэг замдаа ороод алхсан хүнд зогсох гэдэг ухарч байгаатай адил зүйл байх. Зогсохгүйгээр дайрахыг л урлаг уран бүтээлчээс шаарддаг байх. Түүний нэг илрэл, том үлгэр нь Г.Ариунбаатар.

Тэрбээр 2011 онд М.И.Глинкийн нэрэмжит олон улсын дуурийн дуулаачдын ХХIV уралдааны шилдэг баритон, Павел Лисицианы нэрэмжит тусгай шагнал, 2014 онд Муслим Магомаевийн нэрэмжит олон улсын дуурийн дуулаачдын III уралдааны тэргүүн байр, 2015 онд П.И.Чайковскийн нэрэмжит олон улсын мэргэжлийн дуурийн дуулаачдын XV уралдааны шилдэг эрэгтэй дуучин зэрэг дэлхийн дуурийн уралдааныг түүж дуусгасан. Тэр хэвлэлд өгсөн нэгэн ярилцлагадаа “Дуурь бол донтуулдаг урлаг” хэмээсэн байх бөгөөд гүн рүү орох тусам улам өөртөө дурлуулдаг увдистай урлаг гэнэ.

Асан дүрэлзэж, дуурийн урлагаар Монголоос өөр олон залуу дэлхийн тайз руу гарах зам жимийг нээсэн тэрбээр өдгөө ч сонгодог хэвээр дуулж явна. Малчны хотноос Дэлхийн сонгодог болно гэдэг хүссэн аавын хүүгийн хүрэх оргил биш. Гэхдээ хичээвэл, хөдөлмөрлөвөл, хүрч болдгийг тэр батлан харуулсан, одоо ч харуулж яваа. Түүнд халуун баяр хүргэж, илүү өргөн, илүү өндөрт, үргэлжийн сонгодог явахыг ерөөе.

МОНГОЛ СОНГОДОГ Г.АРИУНБААТАРТ "BROVA” ШАГНАЛ ХҮРТСЭНД ХАЛУУН БАЯР ХҮРГЭЕ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.