Тэр бол Монголоос төрсөн дэлхийн сонгодог. Ердөө хорь гаруйхан настайдаа Монгол Улсын Гавьяат Жүжигчин wол хүртэж, гуч гаруй насандаа Дэлхийн дуурийн Чайковскийн уралдааны тэргүүн байрыг эзэлж, “Чингис хаан” одонгоор шагнуулж, асаж, дүрэлзэж яваа уран бүтээлч. Энэ бол Ганбаатарын Ариунбаатар.

   Монгол баритон гэгддэг түүний төрсөн өдөр өнөөдөр тохиож байна. Төв аймгийн Баян-Өнжүүл сумын уугуул тэрбээр Цагдаагийн “Сүлд” чуулгаас уран бүтээлийн гараагаа эхэлж,  Оросын Холбооны Улсын  Санк-Петербург хотын Марийнский театр болон Буриадын Дуурь Бүжгийн Эрдмийн театрын гоцлол дуучнаар ажиллаж буй. Мадчны хотноос СУИС-ийн их сургуульд дуурийн дуучнаар суралцаж, дэлхийн дуучин болсон эгэл жирийн хүү өдгөө Монголын сонгодог урлагийн хөгжлийг чамгүй ахиулсан гэдэгтэй хэн ч маргахгүй болов уу.

Айхтар багаасаа дуулж хуурддаг, гоц гойд нэгэн байгаагүй ч тэрбээр СУИС-д өөрийгөө ихэд хөгжүүлж, томоохон уралдаан тэмцээнүүдийг алгасдаггүй байж.

   Тэгээд 2011 онд М.И.Глинкийн нэрэмжит олон улсын дуурийн дуулаачдын ХХIV уралдааны шилдэг баритон, Павел Лисицианы нэрэмжит тусгай шагнал, 2014 онд Муслим Магомаевийн нэрэмжит олон улсын дуурийн дуулаачдын III уралдааны тэргүүн байр, 2015 онд П.И.Чайковскийн нэрэмжит олон улсын мэргэжлийн дуурийн дуулаачдын XV уралдааны шилдэг эрэгтэй дуучин зэрэг дэлхийн дуурийн уралдааныг түүж дуусгасан. Тэр хэвлэлд өгсөн нэгэн ярилцлагадаа “Дуурь бол донтуулдаг урлаг” хэмээсэн байх бөгөөд гүн рүү орох тусам улам өөртөө дурлуулдаг увдистай урлаг гэнэ. Асан дүрэлзэж, дуурийн урлагаар Монголоос өөр олон залуу дэлхийн тайз руу замыг нээсэн тэрбээр өдгөө ч сонгодог хэвээр дуулж явна. Малчны хотноос Дэлхийн сонгодог болно гэдэг хүссэн аавын хүүгийн хүрэх оргил биш. Гэхдээ хичээвэл, хөдөлмөрлөвөл, хүрч болдгийг тэр батлан харуулсан, одоо ч харуулж яваа нэгэн.