Монгол  Улсын Ерөнхийлөгч өнөөдөр төрийн дээд одон, медаль гардуулж байгаа билээ. Энэ үеэр зохиолч Б.Тогтохбаяр /Шүүдэрцэцэг/ Соёлын Гавьяат Зүтгэлтэн цол хүртлээ.

   Тэрбээр "Юуны өмнө олон улсын эмэгтэйчүүдийн эрхийг хамгаалах өдрийн мэнд хүргэе. Энэ өдөр миний хувьд баяр гэхээс илүү эмэгтэйчүүдийн эрхийн тухай ярих, үзэл бодлоо илэрхийлэх, эмэгтэйчүүдэд тулгарч байгаа бэрхшээлийг яарч шийдэх ёстой тэмцлийн өдөр гэж боддог. Тэгээд энэ өдөр Монгол Улсын Соёлын Гавьяат Зүтгэлтэн хэмээх цолыг авсандаа баяртай байна. Ерөнхийлөгчийн зарлигт "Монголын түүхэнд тодорсон баатарлаг эмэгтэйчүүдийн дүрийг уран зохиол болон тайз, дэлгэцийн урлагт мөнхжүүлэн, өнөөгийн орчин цагийн Монгол эмэгтэйчүүд, охид бүсгүйчүүдэд манлайлал урам зориг хайрласан" гэж тодорхойлсон байна лээ. Цаашид ч илүү ихийг хийнэ, зөвхөн Монголдоо биш, олон улсад кино урлагийг илүү таниулахыг зорьж байна. Сүүлд хийсэн бүтээл "Хотулун гүнж" кино маань дэлхийн А зэрэглэлийн гурван том наадмын нэг "Берлинал 72" удаагийн кино наадмын олон улсын худалдааны хэсэгт амжилттай оролцоод, гэрээгээ эхэлсэн. Үүнтэй зэрэгцэн төрийн дээд шагнал хүртэж байгаа даа баяртай байна" хэмээн баярын сэтгэгдлээ хуваалцсан юм.