Кино студи, кино сургалт, кино хамтран бүтээх тухай хуулийн хүрээнд Монгол Улсын Соёлын яам “Каннын кино наадам”, “Венецийн дүрслэх урлагийн наадам”-д оролцох уран бүтээлчдийг дэмжихээр болсон. Тэгвэл Соёлын яамнаас “Каннын кино наадам”-ын бүрэн болон богино хэмжээний уран сайхны киноны уралдаант хэсэгт бүтээлээ илгээх гэж байгаа уран бүтээлчдийн бүртгэлийн төлбөрийг бүрэн хариуцахаар болжээ.

Тухайлбал, Монгол Улсын Засгийн газрын 2022 оны 02 сарын 16-ны өдрийн 73 дугаар тогтоолын дагуу Бүгд Найрамдах Франц улсад зохион байгуулагддаг “Каннын кино наадам”-д Монгол уран бүтээлчид Соёлын яамны дэмжлэгтэйгээр оролцох боломжтой болсон билээ.

Засгийн газрын дээрх шийдвэрийн дагуу 75 дахь удаагийн “Каннын кино наадам”-ын дэргэдэх “Marché Du Films” платформд Монголын арилжааны болон арт хаус шинэ бүтээлийг сурталчлах талбайг Соёлын яам албан ёсоор ажиллуулахаар болсон. Энэ талаар удахгүй дэлгэрэнгүй мэдээлэл өгч, “Каннын кино наадам”-д сурталчлах кино санал авна.

          Мөн “Каннын кино наадам”-ын бүрэн болон богино хэмжээний уран сайхны киноны уралдаант хэсэгт бүтээлээ илгээх гэж байгаа уран бүтээлчдийн бүртгэлийн төлбөрийг Соёлын яам хариуцах бөгөөд “Каннын кино наадам”-д өрсөлдөхөөр шалгарсан тохиолдолд бүх талаар дэмжин ажиллана.

Дараах шаардлагыг хангасан кино уран бүтээл Каннын кино наадамд бүртгүүлэх эрхтэй байдаг бөгөөд Соёлын яамнаас бүртгэлийн талаар мэдээлэл, зөвлөгөө тусламж авах боломжтой. 

Бүтээл хүлээн авах эцсийн хугацаа: 2022 оны гуравдугаар сарын 1-ний өдөр

Бүрэн хэмжээний уран сайхны кино нь сонгон шалгаруулалтад оролцохдоо дараах шалгуурыг заавал хангасан байна. Үүнд:

• Каннын кино наадмаас өмнөх 12 сарын хугацаанд бүтээгдсэн байх,
• Монгол Улсаас өөр улсад гараагүй байх,
• Кино нь 60 минутаас дээш урттай байх,
• Олон улсын аливаа уралдаан, соёл урлагийн арга хэмжээнд нэр дэвшин оролцоогүй байх; (Өмнө нь өөр кино наадамд оролцсон тохиолдолд Каннын кино наадамд оролцох боломжгүй байдаг)
• Интернэтэд тавигдаагүй, “DVD”-нд хуулагдан гараагүй байх,

Богино хэмжээний кино нь сонгон шалгаруулалтад оролцохдоо дараах шалгуурыг заавал хангасан байна. Үүнд:

• Наадмаас өмнөх 12 сарын хугацаанд бүтээгдсэн байх,
• Богино хэмжээний киноны урт нь кредитийг оруулаад 15 минутаас хэтрэхгүй байх,
• Монгол Улсаас өөр улсад гараагүй байх,
• Олон улсын аливаа уралдаан, соёл урлагийн арга хэмжээнд нэр дэвшин оролцоогүй байх; (Өмнө нь өөр кино наадамд оролцсон тохиолдолд Каннын кино наадамд оролцох боломжгүй байдаг)
• Интернэтэд тавигдаагүй, “DVD”-нд хуулагдан гараагүй байх,

Дэлгэрэнгүй мэдээллийг 51-265636,  99106818, 88191123 гэсэн утсаар болон [email protected] хаягаар лавлана уу.