Хоёр хоногийн өмнө уран бүтээлчдийн тэр бүр барьж аваад байдаггүй мафийн сэдвийг хөндсөн “Нэхүүл” нэртэй кино нээлтээ хийлээ. Нэрнээсээ эхлээд сонирхол татах эл уран бүтээл манай улсад хэдийнэ түгэн дэлгэрсэн гэмт хэргүүдээс хэсэгчлэн үзүүлж, гэмт хэргийг хэрхэн зохион байгуулж, үйлддэгийг тодорхой өгүүлжээ. Киноны зарим үйл явдал хэдийн бидний мэддэг, угаас ийм зүйл байдаг гэх байдлаар өрнөх ч хэлэх санаа, дэвшүүлэх зорилгын хувьд илүү чамбай, мөнхүү шинэлэг болсон нь киноны олон хэсгээр илэрнэ.

   Тодорхой өгүүлбэл, кинонд, хулгай, биеэ үнэлэлт, дээрэм, залилан зэрэг бүхий л төрлийн гэмт хэргийг үзүүлэх бөгөөд түүнийг цагдаагийн ажилтнууд хэрхэн, ямар арга барилаар илрүүлж байгааг тодорхой өгүүлнэ. Тэгвэл эл кинонд цагдаагийн ажилтан нь гол дүрийн үүргийг гүйцэтгэж, киноныхоо бүх үйл явдал, санаатай холбогджээ.

Цагдаагийн ажилтан, мафийн дээрэмчин хоёрын хооронд гол зураасыг татаж, голд нь нийгэм дотор ил, далд хэлбэрээр орших гэмт хэргүүдийг хэсэгчлэн үзүүлж, үйлийн үр, жам ёсны тойргийн санааг мөн давхар оруулж өгснөөрөө ШИНЭЛЭГ уран бүтээл болжээ.

 Учир нь, кинонд цагдаагийн ахмад Мөнхийн өдөр бүр илрүүлдэг, улиг болж, давтагдсаар байх биеэ үнэлэлт, хулгай зэрэг гэмт хэргийн ард нэг хүн, бүхэл бүтэн маф байгааг тэр өөрийн ээжийг алдсанаар олж мэднэ. Өөрөөр хэлбэл, ажил дээр нь хоол өгөхөөр ирээд, гэр рүү гээ явсан ээж нь өглөө нь гэртээ амиа алдсан байдалтай олдсон нь түүнд ихээхэн цочрол үүсгэж, ээжийгээ хөнөөсөн гэмт хэрэгтнийг эрж хайна. Тэгэхдээ хэргийн газарт ээжийнх нь хурууны хээ, нөгөө нь түүний дүү Оршихын хурууны хээ байгааг мэдэснээр дүүгээ ээжийгээ хөнөөсөн хэмээн хардаж эхэлнэ.

  Учир нь, түүний дүү хэрэг болохоос хэдхэн хоногийн өмнө шоронгоос гараад гэртээ ирээгүй байсан юм. Ингээд тэр дүүтэйгээ уулзан учир явдлыг асууж, дүү нь ээжийг нь хөнөөгөөгүйг мэднэ. Үүнээс хойших түүний эрлийн зам  өнөөх ил болон далд гэмт хэргийг үйлдэж буй мафийн дээрэмчин рүү хүрнэ. Хамгийн сонирхолтой нь өнөө дээрэмчин нь түүний төрсөн эцэг байх бөгөөд эцэстээ хүүгээ таниж, өмнүүр нь орж, амиа алдаж байгаагаар киноны зангилаа хэсэг тайлагдана. Харин ээжийг нь хөнөөсөн хүн нь, түүнийг ажлын гаднаас нь авч явсан таксины жолооч гэдгийг олж мэднэ. Кино дан ганц гэмт хэргийн үйл явдлаар хөвөрч, хар бараан руу чиглээгүй байгаа нь цагдаагийн ахмадын дүү Оршихын хайртай эмэгтэй Гэрэлээгийн дүрээс харагдана. Тэдний хайр сэтгэлийн холбоо тус киноны гэрэлтэй хэсэг болж өгчээ. Энэ бол киноны хэлэх гэсэн санаа.

Чанга санаа, чамбай уран бүтээл болсны мөн нэг онцлог бол тус киноны уран бүтээлчид. Кинонд МУАЖ, Г.Мягмарнаран, МУГЖ, Л.Баззаррагчаа, МУГЖ, Ц.Төмөрхуяг тэргүүтэй мөнхүү чадварлаг, чансаатай уран бүтээлчид тоглосон нь киноны хэлэх санаа, үйл явдлыг илүү бодитой болгоон байна. Иймээс монголд маф гэж ямар байдаг, гэмт хэргийг хэрхэн зохион байгуулдаг талаарх бодит мэдээллийг энэ киноноос үзэж, харах боломжтой байна.