Нуруу тань гар, хөл рүүгээ дагаж, өвдөж байвал яаралтай эмчид хандах хэрэгтэй. Олон нийтийн тэр бүр ойшоодоггүй нурууны зовуурь, өвдөлт насан туршийн ч эмгэг үүсгэж болзошгүй. Тэгвэл энэ төрлийн зовуурьтай иргэдэд зориулж, нуруу, нугасны чиглэлээр дагнаж, уламжлалт эмнэлгийн салбарт 20 гаруй жил ажилласан уламжлалт анагаах ухааны эмч Н.Алтанхундага “Таны нуруу яагаад өвддөг вэ” номоо гаргажээ.

Сүүлчийн жилүүдэд нуруу, нугасны өвчин зөвхөн Монгол Улсад бус дэлхийн хэмжээний эрүүл мэндийн томоохон асуудал болоод байгаа. Олон улсын эрүүл мэндийн байгууллагуудын явуулсан судалгаагаар дэлхийн нийт эмч, эмнэлгийн байгууллагад хандаж байгаа өвчтөнүүдийн нэгт ханиад туссан байдаг бол хоёрт нуруу өвдөлт, зовуурьтай хүн байдаг байна. Нурууны өвчин дунд настай хүмүүст нурууны мэдрэлийн сувгийн нарийсал, харин залуу хүмүүс хувьд дискний эвэрхийний зовуурь илэрдэг.

Дэлхийд тулгамдаж буй нурууны өвчний тухай уншигчдын мэдэхгүй олон асуулт бий. Тэгвэл Н.Алтанхундага эмчийн бүтээсэн “Таны нуруу яагаад өвддөг вэ” ном уншигч таны асуултуудад хариулж чадна. “Таны нуруу яагаад өвддөг вэ” ном таван бүлгээс бүрдэнэ. Үүнд:

• Хүний биеийн бүтэц болон багана нурууны талаар бид юуг заавал мэддэг байх ёстой вэ
• Бидэнд нуруу өвдөхөд нөлөөлдөг ямар буруу дадал хэвшлүүд байдаг вэ
• Бид нурууныхаа хэвийн бус байрлалд байгааг өөрсдөө яаж мэдэх вэ
• Ямар өвчний улмаас бидний нуруу голдуу өвддөг вэ
• Нурууны өвчний үед тустай ямар эмчилгээний аргууд байдаг вэ гэсэн дэд гарчиг бүхий таван бүлэг бий.

Уг номыг нуруу өвдөж, шаналж байгаа хэн нэгэн өвчнөө илааршуулах, эхний үедээ яваа нэгэнд өвчнөө улам хүндрүүлэхгүй байх, өвдөж эхлээгүй байгаа бол хэрхэн зөв дадалд хэвшиж, нурууны өвчнөөс хэрхэн өөрийгөө сэргийлэх тухай тусламж өгөх зорилгоор бүтээжээ. Энэ талаар “Таны нуруу яагаад өвддөг вэ” номын зохиолч Н.Алтанхундага “Хүн бүр ямар ч тансаг машинтай зүйрлэхээргүй үнэтэй, байгаль эхийн урам чамин давтагдахааргүй бүтээл билээ. Тийм болохоор байгаль эх танд зориулсан сэлбэг бүтээж хараахан чадаагүй ажээ. Энэ ном бол танд болон таны нуруунд зориулсан цорын ганц бүтээл юм шүү” гэсэн юм.

Хүн бүрд тулгамдаж буй эрүүл мэндийн асуудалд тань туслах “Таны нуруу яагаад өвддөг вэ” ном уншигчдын гарт хүрч эхэллээ.

Н.Алтанхундага нь ОХУ-д уламжлалт эмчилгээ, нурууны эмчээр олон жил ажилласан туршлагатай эмч юм. Тэрбээр эх орондоо ирж, "Бэханзэ" уламжлалт эмчилгээ, нурууны эмчилгээгээр дагнасан эмнэлэг байгуулж, ард иргэддээ үйлчилж байгаа аж.