Монголын Үндэсний Олимпийн Хороо “Эм-Си-Эс Кока-Кола” компанитай дөрвөн жилийн хугацаанд “Токио-2020”, “Бээжин-2022”, “Парис-2024” олимпын наадмуудад албан ёсны түнш байгууллагаар хамтран ажиллах санамж бичиг байгуулжээ. Уг санамж бичигт МҮОХ-ны Ерөнхийлөгч Н.Түвшинбаяр, “Эм-Си-Эс Кока-Кола” компанийн Гүйцэтгэх захирал Л.Мягмаржав нар гарын үсэг зурсан аж.

Энэхүү санамж бичгийн хамтын ажиллагааны хүрээнд жил бүр төлөвлөгөө гаргаж, олимпизмын хөдөлгөөнийг сурталчлан таниулах тодорхой хөтөлбөрүүдийг явуулахаар тусгасан байна. Мөн санамж бичгийн хүрээнд МҮОХ-ноос зохион байгуулагдах уулзалт, хурал, сургалт, олон нийтийн үйл ажиллагаа, олимпын наадамд оролцох баг тамирчдын бэлтгэл сургуулилт, тэмцээн уралдаанд зориулан өөрийн брэндийн бүтээгдэхүүнээр онцгой эрхтэйгээр дэмжлэг үзүүлэх юм. 

Мөн “Эм-Си-Эс Кока-Кола” компани нь 1928 оны Амстердамын олимпоос хойш 93 жил Олон Улсын Олимпын Хорооны албан ёсны түнш байгууллагаар тасралтгүй ажилласан бөгөөд олимпизмыг дэлгэрүүлэхэд хамгийн тогтвортой түнш байсаар ирсэн аж. Багийн спорт, тэр дундаа 3х3 сагсан бөмбөгийн спортын хөгжилд тасралтгүй, системтэй хөрөнгө оруулалт хийсний дүнд Монгол Улс анх удаа багийн спортын төрлөөр “Токио-2020” олимпын наадамд оролцох эрх авч чадсан билээ.

О.БАТ-ЭРДЭНЭ