Олон улсын олимпын хорооны ерөнхийлөгч Томас Бах нь “Милан Кортина 2026” өвлийн XXV олимпын наадмын урилгыг МҮОХ-нд албан ёсоор ирүүллээ. “Милан Кортина 2026” олимп нь 2026 оны хоёрдугаар сарын 6-22-ны өдрүүдэд Итали Улсын Милан ба Кортина-ди-Ампеццо хотуудад өрнөх хуваарьтай байгаа билээ.

    Монголын баг тамирчид “Инсбрук 1964” олимпод анх оролцсоноос хойш нийт 15 удаагийн наадамд гүйлтийн цана, биатлон, шорт трек, гүйлтийн тэшүүрийн төрлөөр түүхтэй. Дашрамд дурдахад ОУОХ-оос хэрэгжүүлж буй "Милан Кортина 2026" тамирчдын тэтгэлэгт хөтөлбөрт цанын тамирчин Б.Ачбадрах, Т.Ариунболд, О.Золбаяр болон тэшүүрийн тамирчин Б.Гэрэлтуяа нар хамрагдаж, олимпын өмнөх бэлтгэл цугларалт, амин дэм, витаминжуулалт, дасгалжуулалтын зардалд тодорхой санхүүжилтийг хүртэж байна.