Холбоодын нэгдсэн УАШТ-ий хүрээнд зохиогдож буй хүндийн өргөлтийн насанд хүрэгчдийн УАШТ-ий эмэгтэйчүүдийн +81 кг-ын медальтнууд тодорлоо. Энэ жинд Монгол Улсын гавьяат тамирчин, дэлхийн аварга М.Анхцэцэг түрүүлэв. Түүний хувьд түлхэлттэй эхний өргөлтөө амжилттай гүйцэтгэсний дараа алтан медаль авах нь тодорхой болсон тул сүүлийн хоёр өргөлтөө гүйцэтгээгүй юм. Гавьяат энэ үеэр “Миний хувьд олон улсын тэмцээнд дахиж оролцохгүй. Харин дотооддоо зохиогдох тэмцээнд хааяа оролцоод явна гэж бодож байна.

     Учир нь олон жил бэлтгэл хийсэн тамирчин хүн спортоосоо гэнэт хөндийрч болдоггүй. Тиймээс бэлтгэлээ үргэлжлүүлэн хийж, оролцмоор санагдсан үедээ дотоодын тэмцээнд оролцож, дүү нараа амжилтад хүрэхэд туслахыг хүсэж байна” хэмээсэн юм. “Батсол” ХХК-ийн тамирчин Б.Энхжин УАШТ-ээс нийлбэр дүнгээр анхны медалиа хүртсэн. Харин улсын аваргын алт, мөнгө, хүрэл медальт А.Баясгалан хоёр дахь хүрэл медалиа авлаа.

Эмэгтэйчүүдийн +81 кг-ын жингийн дүн:

1.М.Анхцэцэг  “Алдар” спорт хорооны тамирчин. Тэрбээр  огцом өргөлтөөр 100 кг, түлхэлттэй өргөлтөөр 121 кг, хоёр өргөлтийн нийлбэр 221 кг-аар алтан медаль.

2.Б.Энхжин “Батсол ХХК-ийн тамирчин, огцом өргөлтөөр 99 кг, түлхэлттэй өргөлтөөр 120 кг, хоёр өргөлтийн нийлбэр 219 кг-аар мөнгөн медаль.

3.А.Баясгалан “Самбуу сан” клубийн тамирчин, огцом өргөлтөөр 80 кг, түлхэлттэй өргөлтөөр 100 кг, хоёр өргөлтийн нийлбэр 180 кг-аар хүрэл медаль хүртэв.