-ДЭЛХИЙН 91 УЛСЫН ТАМИРЧИД ӨВЛИЙН ОЛИМПЫН 15 СПОРТЫН ТӨРӨЛД ӨРСӨЛДӨНӨ-

БНХАУ-ын нийслэл Бээжин хотод “Бээжин-2022” XXIV дэх удаагийн өвлийн спортын наадам Монголын цагаар өнөөдрийн буюу хоёрдугаар сарын 4-ний 20:00 албан ёсоор эхэлж, нээлтээ хийнэ. Энэ удаагийн өвлийн олимпын наадамд дэлхийн 91 орны 3000 орчим тамирчин өвлийн олимпын 15 спортын төрөлд өрсөлдөж, шилдгүүдээ тодруулах юм.

“Ковид-19” цар тахлын нөхцөл байдалтай холбоотойгоор хойшилж болзошгүй байсан өвлийн олимпын наадамд коронавирусийн халдварын эрсдэл үргэлжилсэн хэвээр байгаа. Сүүлийн 10 гаруй хоног буюу өнгөрсөн нэгдүгээр сарын 23-наас хойш Бээжинд газардсан өвлийн олимпод оролцох баг, зочид, төлөөлөгч болон сайн дурын ажилтнуудаас коронавирусийн шинжилгээ авахад 287 хүний шинжилгээний хариу эерэг гарсан гэх мэдээлэл бий. Гэсэн ч Олимпын наадмыг зохион байгуулах хорооны дэд ерөнхийлөгч Ян Шуанийн мэдэгдсэнээр коронавирусийн халдвартай батлагдсан иргэдийг тусгай тусгаарлалтад авч, өвлийн олимпын цэнгэлдэхийг 30 хувийн дүүргэлттэй байлгаж, цар тахлаас сэргийлэх аж.

            “Бээжин-2022” өвлийн олимпод 3000 орчим тамирчин өрсөлдөж байгаа бөгөөд эсрэгээрээ өвлийн олимпын наадам зохион байгуулах комиссынхон 19 мянган сайн дурын ажилтнаар эгнээ тэлээд байгаа юм.

-МОНГОЛ УЛС ӨВЛИЙН ОЛИМПЫН ТҮҮХЭНД-

Монголд орчин цагийн биеийн тамир, спортын хөдөлгөөн 1930-аад онд Ардын биеийн тамирын удирдах зөвлөл байгуулагдснаар эхэлжээ. Улмаар 1956 оны хоёрсарын 26-нд Монголын үндэсний олимпын хороо байгуулагдаж, анхны даргаар нь тухайн үеийн СнЗ-ийн дэргэдэх Биеийн тамир, спортын хэрэг эрхлэх хорооны дарга Э.Дарьсүрэн томилогдож байжээ.

            Э.Дарьсүрэн Монгол Улсын олон улсын олимпизмын хөдөлгөөнд нэгдэн ороход идэвхи санаачлагатай ажиллаж байсан. Монгол Улсад Олимпын хороо байгуулагдсанаас  гурван жилийн дараа буюу 1959 онд ОУОХ-ны гишүүнээр элсэх өргөдлөө өгсөн. Тус өргөдлийг уулын спортын ОУХМ, спортын гавъяат багш Р.Зоригт бичиж байсан бөгөөд Монголын саналыг 1962 оны зургадугаар сарын 5-нд тухайн үеийн ЗХУ-ын Москва хотноо хуралдсан чуулганаар хэлэлцэн дэмжсэн байдаг. Ингэснээр Монгол Улс олимпизмын их гэр бүлд нэгдэн орсон юм.

            1962 онд ОУОХ-нд элсэн орсноос хойш зуны 13 олимп, өвлийн 13 олимпын наадамд оролцоод байна. Хамгийн анх удаа 1964 оны нэгдүгээр сарын 29-нөөс хоёрдугаар сарын 9-ний өдрүүдэд Австри Улсын Инсбрук хотноо болсон өвлийн олимпын IX наадамд оролцсноор Монголын олимпын түүх эхэлсэн юм. Инсбрукийн өвлийн олимпоос найман сарын дараа буюу 1964 оны аравдугаар сарын 10-нд нээлтээ хийсэн Токиогийн зуны олимпын наадамд хоёр дахь удаагаа Монголын баг тамирчид оролцсон.

Монгол Улс түүхэндээ анх удаагаа буюу 1964 оны Инсбрукийн өвлийн IX наадамд эрэгтэй 10, эмэгтэй гурав, нийт 13 хүний бүрэлдэхүүнтэй оролцож байжээ. Энэ бол Монгол Улсын өвлийн олимпын наадамд оролцсон хамгийн өргөн бүрэлдэхүүн байсан юм. Гүйлтийн тэшүүрийн төрөлд Ц.Лхамжав (МУГТ), Л.Цэнд (МУГТ), Л.Дашням (МУГТ) нар оролцсон бол Б.Дамдинжав, Б.Дашгай, Ц.Данзан, Т.Лхамсүрэн нар биатлоны төрөлд, Б.Дамдинжав, Б.Дашгай нар мөн Д.Баадай, Л.Дашдэмбэрэл, С.Нацагдорж, Б.Зундуй нар гүйлтийн цанын эрэгтэй төрөлд, Ж.Жавзандулам, Д.Пүрэвлоов нар гүйлтийн цанын эмэгтэй төрөлд оролцсон байдаг.

            Монголын тамирчдаас өвлийн олимпын наадамд хамгийн өндөр амжилтыг Инсбуркийн өвлийн олимпын гүйлтийн тэшүүрийн эмэгтэйчүүдийн 3000 метрийн зайд өрсөлдсөн Ц.Лхамжав үзүүлж байжээ. Нийт 13 улсын 28 тамирчнаас 20-р байранд орж, ардаа Герман, АНУ, Канад, Нидерланд болон Польшийн тамирчдыг орхиж байсан. Энэ амжилт бол одоогоор Монголын өвлийн олимпын наадамд үзүүлсэн хамгийн өндөр амжилт юм.

“Инсбрук-1964” өвлийн олимпын IX наадам

• Гүйлтийн цана: Б.Дамдинжав, Б.Дашгай, Д.Баадай, Л.Дашдэмбэрэл, С.Нацагдорж, Б.Зундуй, Ж.Жавзандулам, Д.Пүрэвлоов
• Биатлон: Б.Дамдинжав, Б.Дашгай, Ц.Данзан
• Гүйлтийн тэшүүр: Л.Цэнд, Л.Дашням, Ц.Лхамжав

“Гренобль-1968” өвлийн олимпын X наадам

• Гүйлтийн цана: Л.Дашдэмбэрэл, Г.Батмөнх
• Биатлон: Б.Дамдинжав, Б.Дашгай
• Тэшүүр: Л.Цэнд, Л.Дашням, Б.Жалбаа

“Саппоро-1972” өвлийн олимпын XI наадам

• Гүйлтийн цана: Д.Нарантунгалаг, Н.Сандагдорж
• Тэшүүр: Л.Цэнд, Л.Дашням

“Лэйк-Плэсид-1980” өвлийн олимпын XIII наадам

• Гүйлтийн цана: Л.Дорж
• Тэшүүр: Д.Цэнддоо, Т.Нямдаваа

“Сараево-1984” өвлийн олимпын XIV наадам

• Гүйлтийн цана: Л.Дорж, П.Батсүх, Д.Ганхуяг, В.Рэнцэнхорол

“Калгари-1988” өвлийн олимпын XV наадам

• Гүйлтийн цана: Д.Энхээ, З.Ганбат, Д.Баттулга

“Альбервилль-1992” өвлийн олимпын XVI наадам

• Гүйлтийн цана: Г.Мерей, З.Ганбат
• Тэшүүр: А.Содномдаржаа, Н.Ганболд

“Лиллехаммер-1994” өвлийн олимпын XVII наадам

• “Шорт-трейк: Б.Бат-Оргил

“Нагано-1998” өвлийн олимпын XVIII наадам

Гүйлтийн цана: Д.Очирсүх

• Шорт-трейк: Б.Октябрь, Б.Сансарбилэг

“Солт-Лейк-2002” өвлийн олимпын XIX наадам

• Гүйлтийн цана: Ж.Эрдэнэтүлхүүр, Д.Энхээ
• Шорт-трейк: Б.Октябрь, Г.Жаргаланчулуун

“Турин-2006” өвлийн олимпын XX наадам

• Гүйлтийн цана: Х.Хаш-Эрдэнэ, Э.Очирсүрэн

“Ванкувер-2010” өвлийн олимпын XXI наадам

• Гүйлтийн цана: Х.Хаш-Эрдэнэ, Э.Очирсүрэн

“Сочи-2014” өвлийн олимпын XXII наадам

• Гүйлтийн цана: Б.Бямбадорж, Ч.Отгонцэцэг

“Бээжин-2022” XXIV дэх удаагийн өвлийн олимпод Монгол Улсыг төлөөлж, ОУХМ Б.Ачбадрах, А.Энхтуул нар оролцоно. ОУХМ Б.Ачбадрах нь “Бээжин-2022” өвлийн олимпын наадмын эрх авахдаа буюу 2021 оны ДАШТ-ий 10 км-ын зайд наймдугаар байр, FIS-ий олимпын оноо олгох тэмцээнд амжилттай оролцож, Монголын цанын спортын түүхэнд Дэлхийн цомд албан ёсоор оролцох эрх авсан. Мөн “Алфен-2021” цомын аварга шалгаруулах тэмцээний 15 км-ын зайд Монголын цанын спортын түүхэнд хамгийн өндөр цагийн амжилт үзүүлж байв. Тэрбээр Монголын цагаар хоёрдугаар сарын 11-ний өдөр эрэгтэйчүүдийн 15 км-т хурдаа сорих юм.

Харин ОУХМ А.Энхтуул 2015, 2016 онд “Васалофит” олон улсын марафон уралдаанаас мөнгөн медаль, Максимаха спринт зайн уралдааны шагнал дөрөвдүгээр байр, “Алмата-2017” дэлхийн залуучуудын Универсиад наадамд дөрөвдүгээр байр, Финландын Лахти хотод болсон насанд хүрэгчдийн “Б” зэрэглэлийн ДАШТ-ий таван км-ын зайд дөрөвдүгээр байр эзэлж байсан юм. Мөн тэрбээр “Бээжин-2022” өвлийн олимпын наадамд оролцох эрхийг 2021 оны ДАШТ-ий таван км-ын зайд 13 дугаар байр эзэлж, 2021 оны ДАШТ-ий тэших техникийн 10 км зайд 29,20.6 цагийн амжилт үзүүлжээ. ОУХМ А.Энхтуул хоёрдугаар сарын 10-ны өдөр эмэгтэйчүүдийн 10 км-ын зайд өрсөлдөнө.