Манай улс анх удаа олимпод багийн спортоор оролцож байна. Тодруулбал, “Токио-2020” зуны олимпод Монголын сагсан бөмбөгийн 3х3 төрлийн шигшээ баг өрсөлдөж байгаа билээ. Манай багийн хувьд Итали, АНУ, Япон, Орос Улсын багт ялагдсан. Бид үүнтэй холбоотойгоор сагсан бөмбөгийн 3х3 төрлийн шигшээ багийн тамирчин М.Цэрэнлхамын аавтай ярилцлаа.

-Сайн байна уу. Таны охин “Токио-2020” олимпод анх удаа, багийн спортын төрлөөр эх орноо төлөөлөн оролцож байна. Танд баяр хүргэе?

                -Баярлалаа. Анх удаа багийн спортоор олимпод оролцож байгаа хүүхдүүддээ баяр хүргэе. Энэ олимпоос монголын сагсан бөмбөгийн тамирчид их зүйлийг сурах байх аа. Дэлхийн шилдэг зургаан багтай тоглолоо. Миний хувьд аль ч цаг үед охиндоо итгэдэг. Медаль хүртдэггүй юм аа гэхэд оролцож байгаа нь том амжилт.

-Анхны тоглолт нь Итали Улстай тоглосон. Охидууд маань сайн тоглосон хэдий ч харамсалтай  нь хожигдол хүлээсэн. Эхний тоглолтыг үзээд аав хүний хувьд сэтгэл тань өвдсөн үү?

                -Тоглолтыг нь үзээд хамт тоглоод л сууж байна. Хүүхдүүд минь их хичээж, бүх зүйлээ дайчилж байгаа нь илт харагдаж байсан. “Ард түмнийхээ итгэлийг дааж яваад хожигдоод ирвэл ямар байх вэ” гээд их зүйлийг бодож байгаа байх. Эвий минь, үнэхээр чадлаараа л хичээж байна. Мэдээж эцэг хүний хувьд “Охин минь юу бодож байгаа бол, өөрийгөө буруутгаж байгаа болов уу” гэж бодож сууна. Тэгээд тоглолт эхлэхээр өмнөөс нь тоглочихмоор санагдаад, заримдаа уур ч хүрэх шиг. Ээж нь мөн л тоглолтыг нь үзээд халаглаад сууж байна.

-Манай багийн тоглолтын хувьд та ямархуу байна гэж харж байна вэ?

                -Манай монгол охид цаашид техник дээрээ илүү анхаармаар санагдаж байна. Бусад орны хувьд техник, хүчний бэлтгэл хамаагүй өөр харагдаж байсан. Мөн тэсрэлт, хурд дутагдаж байна. Ер нь бэлтгэл сул л харагдаж байна.

-Олимпын наадам эхлэхээс өмнө 3х3 эмэгтэй шигшээ багийг тойрсон нэлээд их маргаан өрнөсөн. Та үүн дээр ямар байр суурьтай байгаа вэ?

                -Бид хүүхдүүдээ арай л их хэл амтай явуулсан. Хүүхдүүд минь ч үүнийг уншиж сэтгэлээр их унасан болов уу. Аливаа зүйл өрсөлдөөн байдаг. Спорт тийм ч мөн адил. Тоо хязгаартай учир энэ олон хүүхдээс дөрвөн тамирчин л олимпод оролцоно. Тэгээд багш, дасгалжуулагч нар нь сонгоод, шийдсэн биз.  Бидний хувьд “Хасагдвал хасагдаад, тэнцвэл тэнцээд явна биз дээ. Олимпод оролцох багаас хасагдлаа ч гэсэн миний охинд ирээдүй байгаа шүү дээ” гэж бодсон.  

-“Баянхонгор аймгийн Засаг даргын хүүхэд явлаа” гэж их хэл ам гарсан шүү дээ?

                -Тийм ээ. Хэл ам их хэцүү юм аа. Төрийн алба хашиснаараа охиныхоо ирээдүйд саад болно гэж бодсонгүй. Ямар сайндаа охиноосоо хол байдаг болсон. Энэ олон хүүхдүүдийн хажуугаар “Манай охиныг оруулаад өг” гээд явж байж болохгүй шүү дээ. Энэ цэвэр багшийнх нь шийдвэр.

-М.Цэрэнлхам анхнаасаа сонгогдох магадлал өндөр байсан уу?

                -Сүүлийн гурван жил бөмбөг хөөж, тэмцээнээс өөр юм бодохоо байсан шүү дээ. Өөр ажил ч хийхээ больсон. Тэмцээндээ маш шаргуу бэлдэж буй нь тэр. Түүнийх нь  л үр дүн болов уу.

-Ярилцсанд баярлалаа.

                -Баярлалаа.