Хоёр хоногийн өмнө найруулагч Б.Баатарын анхны уран бүтээл болох “Этгээд” кино нээлтээ хийлээ. Техник технологи хурдацтай хөгжихийн хэрээр кино урлаг дагаад хөгжиж байгааг орчин цагийн уран бүтээлүүд тодоор харуулж буй. “Этгээд” кино үүний нэгэн жишээ төдийгүй өнгө төрх, үйл явдал, хэлэх санааны хувьд өөр уран бүтээл болжээ. Ингээд уншигч танд тус кино бусад уран бүтээлээс онцлог таван зүйлийг хүргэж байна.

 -КИНОНЫ ӨНГӨ-

  Аливаа уран бүтээлийн нэгдүгээрт сайн зохиол, хоёрдугаарт түүнийг амилуулах дүр, гуравдугаарт, киног илүү амьтай, бодитой болгож байгаа өнгө, дуу дүрсний зохилдолгоо. Энэ ч утгаар “Этгээд” кино бол өнгө төрхөөрөө яах аргагүй сүүлийн үед гарч байгаа кино бүтээлүүдээс онцгойрч байгаа юм. Үзэгчид киноны үйл явдалд хөтлөгдөхөөс гадна өнгө, дуу дүрсний чанарт мөн автдаг. Тэгвэл тус кино шинэ техник технологи, өнгө төрхийг бүрэн харуулсан байгааг киноны уран бүтээлчид онцолж байна.

-ЭТГЭЭД БУЮУ КИНОНЫ НЭР-

 Уран бүтээлийн нэр тухайн киноны санаа, үйл явдлыг зангиддаг. Тэгвэл уг киноны нэр шууд утгаараа бол нэгэн этгээд буюу хүний тухай өгүүлнэ. Хүн бүр нэгэн этгээд байдаг. Өөрөөр хэлбэл, хүн бүр сайн, муу, сайхан, муухай нь холилдож хүн болдог. Түүнээс дан гэмгүй, дан гэмтэй хүн гэж үгүй. Энэ ч утгаар тус нэрийг тайлбарлаж болох бөгөөд нөгөө талаар этгээд сонин хэв маягийн шинжийг мөн агуулж байгаа юм. Харин кинонд бол өнгө мөнгөнд хэт автсан хүмүүсийн дунд үнэнч шударга, мөрөөрөө яваа өөр нэг этгээд золиослогдож байдгийг этгээд нэрээр тусгажээ. Тэгэхээр уг киноны нэр мөн нэгэн онцлог болж байгаа юм.

-ЗУРАГЛААЧ ХҮН НАЙРУУЛАГЧААР АЖИЛЛАСАН-

 “Этгээд” киноны найруулагчаар Б.Баатар гэх зураглаач ажилласан бөгөөд анх удаагаа зураглаач хүн кино найруулж байгаагаараа өвөрмөц юм. Мэдээж зураглаач хүн аливааг өөрөөр харж, өнгө төрхийг өөрөөр би болгоно. Гэхдээ бүхэл бүтэн киног найруулна гэдэг мэргэжлийн найруулагчид ч амаргүй зүйл. Харин Б.Баатар найруулагч тус киног илүү өөрийн мэргэжилдээ ойртуулан шинэлэг дүр төрхтэй байлгаж, кино уран бүтээлд өөр нэг имижийг бүрдүүлэх гэсэн нь тус уран бүтээлээр илэрч байна. Б.Баатар нь “Сайн, муу, хэрцгий”,” Ар хударга”, “ Зангараг”,  “Үргээлэг 2”, “Яллагч”, “Хийморь”, “Сүүн замын сахиул”, “Зориг” уран сайхны кинонуудын ерөнхий зураглаачаар ажиллаж байсан юм.

-НҮДЭЭ ОЛСОН ДҮРИЙН СОНГОЛТ-

  Дүрийг найруулагч мөн зураглаачийнхаа мэдрэмж, өгүүлэмжээр сонгожээ. Тус кинонд хэдийн олны танил болсон жүжигчид сонгогдсон мөртлөө өөр өөрийн өнгө аясыг илтгэх, мөнхүү дотортой гэгддэг жүжигчид сонгогдсон нь киноны мөн нэг онцлог байна. Тухайлбал, Г.Эрхэмбаяр, Н.Ялалт, С.Ариунбямба, Ж.Оюундарь, Ч.Сэлэнгэ гэх жүжигчид бол цөм өөр өөрийн өнгө төрхийг илэрхийлсэн уран бүтээлчид. Жинхэнэ шинэ өнгө төрх, талбарт зөв оногдсон дүрүүд. Г.Эрхэмбаярын нүдний тоглолт, Н.Ялалт жүжигний дотоод ертөнц, Ч.Ариунбямба, Ж.Оюундарийн этгээд дүр хувиралт яг л оноогдож, дүрээ олсон гэмээр. Найруулагч өөрөө дүрээ зөв хуваарилж, олж гэмээнэ сайн уран бүтээл төрдөг. Б.Баатар найруулагч энэ үүргээ яг таг биелүүлсэн нь киноны дүрүүдээс тодорхой харагдана.

 -УЙДАХ ЗАВГҮЙ КИНОНЫ ХЭСЭГ БУЮУ ШИЛЖИЛТ-

  Киноны хамгийн чухал зүйл бол үйл явдал, түүний хоорондын шилжилт. Уянгын хэсэг гарч байгаад инээдмийн хэсэг рүү шууд орж болохгүй. Энэ бүхнийг найруулагч бодож, төлөвлөж, анхаарах ёстой. Б.Баатар найруулагч үүнийг хэдийн бодож, ямар байдлаар шилжиж, үйл явдлаа өрнүүлбэл киногоо сонирхолтой байлгахаа ч мартаагүй байна. Киноны хэсэг бүр анхаарал татаж, үзэгчид уйдах зав өгөхгүй байсаар дуусгаж байгаа нь киноны нэг онцлог.

   Ийнхүү киноны өнгө, нэр, найруулагч, үйл явдал шилжилтээрээ "Этгээд" кино нь бусад уран бүтээлээс өвөрмөц болжээ.