Олон газар өр, зээлтэй, амьдралд цөхрөнгөө барсан 456 хүнийг дурсамжийн цэцэрлэгт аваачиж, зургаан үетэй тоглоом тоглуулна. Зургаан үеийн турш тоглуулах тоглоомууд нь 456 оролцогчийн дурсамжин дахь бага насных нь хүүхдийн тоглоомууд. Хэрэв бага насандаа тоглож байсан тоглоомуудаараа тоглож, зургаан үеийг давж чадах юм бол 45.6 тэрбум солонгос вонтой болох болно. Харин давж чадалгүй унаж, тоглоомдоо хожигдох юм бол үхнэ.

          Сүүлчийн үед интернэтэд шуугиан тариад байгаа “Squid Game” нэртэй Netflix-ийн цуврал триллер киноны талаар сураг сонсоогүй хүн бараг үгүй байх. Солонгосын кино найруулагч Хван Донг Хёкийн зохиолыг нь бичиж, найруулсан “Squid Game” кинонд их хэмжээний цус, аллага харуулсан ч, “IMDB” онлайн мэдээллийн санд 8.3 гэсэн өндөр үнэлгээ авч, итгэмээргүй амжилт үзүүлэв. Урьд өмнө ингэж их цус гаргаж, аллага харуулсан бүтээл олон нийт, шүүмжлэгчдээс ийм өндөр үнэлгээ авч байгаагүй юм.

-ДУРСАМЖИЙН ТҮҮХ-

Өрөнд орж, амьдралд цөхөрсөн 456 хүн 45.6 тэрбум солонгос вонын шагналын сантай “Squid Game”-д оролцоно. “Squid Game”-д оролцохын тулд зуучлагчийн өгсөн нэрийн хуудсаар дамжуулж, холбогдох аж. Кинон дээр гарсан зуучлагчийн үлдээсэн нэрийн хуудсан дээрх дугаарыг амьдрал дээрх бодит хэрэглэгч рүү нь өдөрт 4000 удаагийн дуудлага ирж, нэг хүн 100 сая воноор худалдаж авах санал тавьсан гэх. Үүнээс харахад “Squid Game” кино олонх үзэгчдээ зөвхөн дэлгэцийн таашаал өгөөд болох бус, сэтгэцэд нь мөн нөлөөлсөн байгаа юм.

45.6 тэрбум вонын төлөө амиа дэнчинд тавьсан оролцогчид эхэндээ яг юу болоод байгааг ч ойлгохгүй. Эхний тоглоом эхэлсний дараа нэг оролцогч тоглоомын дүрмийг зөрчсөнөөр шүүгчид түүнийг хөнөөхөд л бусад оролцогч ухаан орно. Үнэн хэрэгтээ тэд “Squid Game”-д 45.6 тэрбум вонын төлөө бус, амьд үлдэх гэж ирсэн.

Оролцогч нарыг хооронд өрсөлдүүлэх тоглоом нь маш энгийн. Хүн бүрийн багадаа тоглож байсан олс татах, нуугдах гэх мэт. Жишээ нь, “Squid Game”-ийн нэг үед далгона чихэр хайлуулж, шүүгчдээс өгсөн дүрсийг бүтээх даалгавар байдаг. Амьд үлдэхийн төлөө тэмцэгчид бага насандаа тоглож байсан тоглоомоо дахин тоглож, “Squid Game” кино үзэгчдэдээ дурсамжаараа аялах, бага насаа эргэн санах боломж олгосон аж. Хэт их цус, аллага гардаг уг киногоор бага насны дурсамжийг орлуулах хэцүү. Гэхдээ Солонгосын нэг иргэн “Squid Game” үзээд дахин далгона чихэр идэх хүсэл төрлөө. Хамгийн сүүлд идсэнээс хойш 20 гаруй жил өнгөрч байна. Далгона одоо болтол байгаа юу. Олдохгүй л байх даа” хэмээн өөрийн Твиттер хуудсандаа бичжээ. Үүнээс харахад “Squid Game” үзэгчдэдээ зөвхөн аллага бус, бага насных нь дурсамжийг ч мөн харуулж байгаа болж таарах юм.

-ИЛҮҮ БОДИТ ДҮРҮҮД-

45.6 тэрбум вонын төлөө үхлийн тоглоомд орооцолдсон дүрүүд бүгдээрээ л их хэмжээний мөнгөний асуудалтай ч, нийгмийн бүхий л давхаргаас бүрджээ. Жишээлбэл,

• Мөрийтэй тоглооч,
• Ажилгүй эр,
• Гэр бүлийнхээ өв хөрөнгийг залгамжлахаар тэмцэж буй нэгэн,
• Хойд Солонгосоос зугтаж, Өмнөд Солонгост ирсэн,
• Ажил олгогч нарын муу хандлагыг тэвчдэг ядуу Пакистан эр гэх мэт.

“Squid Game” киноны талаар БНСУ-ын Сангмён их сургуулийн Дэлхийн соёлын контентын профессор Ким Пён Ганг “Бодит амьдрал дээр бусдад гадуурхагддаг, зовлон үзсэн үзэгчдэд “Squid Game” киноны дүрүүд маш их нөлөөлж, өөртэй нь адилхан санагдаж байгаа юм” хэмээжээ. 45.6 тэрбум вонын төлөө үхлийн тоглоомд оролцож байгаа бүх оролцогч аль ч нийгмийн давхарга байсан хамаагүй тоглоомын үеэр бүгд адил тэгш эрхтэй болох. Харин бүгд адил тэгш эрхтэй үед хэн илүү хөдөлмөрлөсөн нь ялалтад хүрдэг шүү дээ. Бодит амьдрал дээр ч хөдөлмөрлөж, хичээхгүй бол унана, ялагдана. “Squid Game” ялагдлыг үхлээр харуулсан юм.

-НАЙРУУЛАГЧИЙН БАГА НАС БУЮУ “SQUID GAME”-

Барууны зарим хэвлэл “Squid Game”-ийг бусад киноноос “хулгай хийсэн” гэжээ. Тухайлбал, 2019 онд “Оскар”-ын шагнал хүртсэн Солонгосын “Parasite”, "The Gods Will" зэрэг киноноос санаа авсан хэмээсэн юм.

Тэгвэл “Squid Game” киноны найруулагч Хван Донг Хёк дээрх хэвлэлээр нийтэлсэн шүүмжийг үгүйсгэсэн. Тэрбээр “Squid Game” өөр ямар ч кинотой холбоогүй. Би ямар ч киноноос санаа аваагүй. Ердөө л киноны төрлөөс шалтгаалан ижил төстэй байдал үүссэн юм” хэмээжээ. Найруулагч Хван Донг Хёкийн хэлснээр “Би 2008 оноос “Squid Game”-ийг төлөвлөж эхлээд, 2009 онд кино зохиолоо бичиж эхэлсэн” гэсэн юм.

“Squid Game” киноны найруулагч Хван Донг Хёк хэвлэлд өгсөн нэгэн ярилцлагадаа кино зохиол бичих санаагаа бага насаа дурсаж байгаад олсон тухайгаа хэлжээ. Тэгээд л  Хван Донг Хёк найруулагч “Найдваргүй том хүмүүс хүүхдийн тоглоомд ялахын тулд амиараа дэнчин тавьж байгааг харуулах сонирхолтой санаа олсон” нь “Squid Game” кино болон үзэгчдийн хүртээл болсон байна. Ердөө олон нийтэд цацагдсан даруйдаа олон нийтийн анхаарлыг татсан уг киноны үргэлжлэл, дараагийн улирлыг нь асууж байгаа. Харин энэ тухайд Хван Донг Хёк “Би “Squid Game II”-ын талаар бодож чадаагүй, сайн төлөвлөгөө боловсруулаагүй байгаа. Энэ талаар бодох чинь үнэхээр гунигтай шүү дээ” хэмээжээ.