Монгол Улсын Ерөнхийлөгчийн 2021 оны ээлжит сонгуульд МАН-аас нэр дэвшигч У.Хүрэлсүх үнэмлэхээ гардан авлаа.

Энэ үеэр тэрбээр “Монгол Улсын Ерөнхийлөгчийн найм дахь удаагийн сонгууль өнөөдөр албан ёсоор эхэлж байна. Надад итгэл, хариуцлага үүрүүлж Ерөнхийлөгчийн сонгуульд нэр дэвших боломж олгосон журмын нөхөд болон ард иргэддээ талархаж буйгаа илэрхийлье. Энэ удаагийн ээлжит сонгууль маш нэр хүндтэй хариуцлагатай. Мөн Монгол Улсын Ерөнхийлөгчид Ардчилсан намаас нэр дэвшиж байгаа С.Эрдэнэ дарга, Хөдөлмөрийн үндэсний намаас нэр дэвшиж байгаа Д.Энхбат нарт сонгууль, болон гэр бүлд нь сайн сайхныг хүсье.

Энэ удаагийн Ерөнхийлөгчийн сонгуульд зөвхөн монголчууд гэлтгүй дэлхий дахинаа анхаарлаа хандуулж байна. Төрийн тэргүүний сонгуулийг хэрхэн зохион байгуулах вэ, ямар үр дүнтэй гарах вэ гэдгийг ард иргэд болон олон улс ажиглаж байгаа. Энэ бол УИХ, орон нутгийн сонгууль биш. Улс төрийн намын сонгууль ч биш. Төрийн тэргүүний сонгууль учраас ил тод, нээлттэй, хуулийн хүрээнд явуулах зайлшгүй шаардлагатай. Ямар нэгэн маргаан, будилаан гарч болохгүй. Сонгуульд өрсөлдөж байгаа болон сонгуулийн компанит ажилд ажиллаж байгаа бүх хүмүүст ил тод, шударга, нээлттэй байхыг уриалмаар байна. Мөн дэлхий дахинд болоод дотоодод цар тахал хэмээх аюулт өвчин нүүрлээд байгаа. Тийм учраас сонгуулийн зардлыг аль болох хямд зардлаар явуулах тухайд анхаарч ажиллах нь зүйтэй.

Ерөнхийлөгч бол Монголын ард түмний эв нэгдлийн илэрхийлэгч, Монгол Улсын Зэвсэгт хүчний ерөнхий командлагч, ҮАБЗ-ийн тэргүүн байдаг. Нэг үгээр хариуцлагатай институцийн тэргүүн гэсэн үг. Тийм учраас би Монгол Улсын Ерөнхийлөгчөөр сонгогдвол дараах зүйлүүдэд анхаарч ажиллана.

Нэгдүгээрт, нийгэмд шударга ёсыг бэхжүүлэх ажилд ихээхэн анхаарна. Ялангуяа хараат бус хууль хяналт, шүүх прокурорын байгууллагын тогтолцоог бий болгож, эрх зүйн орчныг шинэчлэх чиглэлд анхаарна. Хүн засагладаггүй, хууль засагладаг төртэй болох ёстой гэж үзэж байгаа.

Хоёрдугаарт, хүний эрх, эрх чөлөө, ардчилсан тогтолцоо, эрх зүйт төрийг бэхжүүлэх,  парламентын тогтолцоог улам бэхжүүлэхийн төлөө анхаарч ажиллана. Монгол Улс бол нэгдмэл нэг улс. Ардын нам, Ардчилсан намын Монгол Улс гэж байхгүй. Ерөнхийлөгчөөр сонгогдвол ард түмнийхээ эв нэдлийг нүдний цөцгий мэт сахин хамгаална. Ард түмний эв нэгдлийг сахин хамгаалах нь Ерөнхийлөгчийн тэргүүн эгнээний үйл хэрэг.

Гуравдугаарт, Монголы Улсын иргэн болгон байгалийн баялгаас ижил тэгш хүртэж байх ёстой. Тийм учраас байгалийн баялгийн үндэсний санг байгуулж, улс орныхоо бүтээн байгуулалтыг хийж, иргэддээ баялгийг тэгш хуваарилна. Дараа нь гадаад бодлого. НҮБ болон бусад олон улсын тавцанд Монгол Улсын нэр хүндийг бэхжүүлэхийн төлөө хичээн ажиллана.

Дөрөвдүгээрт, Хүчирхэг Монгол Улсыг байгуулахын тулд Засгийн газар, УИХ-тай хамтран ажиллана. Цар тахлыг даван туулахын тулд Ерөнхийлөгчийн хувьд Засгийн газар, УИХ-тай хамтран ажиллана" гэдгийг хэллээ.