Монгол Улсын Ерөнхий сайд Н.Учрал есдүгээр сарын 1-4-ний өдрүүдэд ОХУ-ын Владивосток хотноо зохион байгуулагдах Дорнын эдийн засгийн XI чуулга уулзалтад хүндэт зочноор оролцохоор болжээ.

   Энэ жилийн чуулга уулзалт ОХУ-ын Ерөнхийлөгчийн ивээл дор “Алс Дорнод: Хүний сайн сайхны төлөөх хөгжил” сэдвийн хүрээнд болж, хөрөнгө оруулалт, эрчим хүч, дэд бүтэц, технологи, логистик, олон улсын хамтын ажиллагааны асуудлыг хэлэлцэх аж. Ерөнхий сайд Н.Учрал чуулга уулзалтын нэгдсэн хуралдаанд оролцож үг хэлэхээс гадна ОХУ-ын Ерөнхийлөгч В.В.Путинд бараалхаж, Оросын төр, засгийн удирдлагуудтай хоёр талын уулзалт хийхээр төлөвлөсөн байна.

   Уулзалтаар Монгол, Оросын иж бүрэн стратегийн түншлэлийг бэхжүүлэх, худалдаа, эдийн засгийн хамтын ажиллагааг өргөжүүлэх, хөрөнгө оруулалт, эрчим хүч, дэд бүтэц, тээвэр, логистикийн салбарын хамтын ажиллагааны талаар санал солилцоно. Мөн Монгол Улс болон Евразийн эдийн засгийн холбоо, түүний гишүүн орнууд хоорондын худалдааны түр хэлэлцээр хэрэгжиж эхэлсэнтэй холбоотой үр дүн, цаашдын хамтын ажиллагааны талаар хэлэлцэх юм. Энэ жилийн чуулга уулзалтын хүрээнд анх удаа “Монгол-Оросын бизнес хэлэлцүүлэг” зохион байгуулагдаж, хоёр улсын төр, хувийн хэвшлийн төлөөлөл худалдаа, хөрөнгө оруулалтын орчныг сайжруулах, тээвэр логистикийн хамтын ажиллагааг өргөжүүлэх асуудлыг хэлэлцэх аж.

   Монгол Улс Дорнын эдийн засгийн чуулга уулзалтад 2016 оноос хойш Ерөнхийлөгчийн түвшинд дөрөв, Ерөнхий сайдын түвшинд хоёр удаа оролцож иржээ.