Монгол Улсын Гадаад харилцааны сайд Б.Батцэцэг өчигдөр  Кот д’Ивуар Улсын Байгаль орчин, экологийн шилжилтийн сайд Абу Бамба болон Буркина Фасо Улсын Байгаль орчны асуудал эрхэлсэн дэд сайд Оуэдраого Памусса нарыг хүлээн авч уулзлаа. Уулзалтаар “COP17”-гийн хүрээнд явагдаж буй хэлэлцээний явцын талаар санал солилцохын зэрэгцээ цөлжилт, газрын доройтол, гангийн сорилтыг даван туулах, доройтсон газрыг нөхөн сэргээх чиглэлээр Монгол болон Кот д’Ивуар Улсын нөхцөл байдал, бодлого үйл ажиллагааны талаар ярилцлаа.

     Харин Буркина Фасо Улсын Байгаль орчны асуудал эрхэлсэн дэд сайд Оуэдраого Памуссаг хүлээн авч уулзахдаа далайд гарцгүй орны ижил төстэй сорилт, цөлжилт, уур амьсгалын өөрчлөлт зэрэг нийтлэг асуудлыг талаар санал солилцов. Үүнийг шийдвэрлэх, байгаль орчны чиглэлээр туршлага солилцох, хамтын ажиллагааг өргөжүүлэх өргөн боломж бий гэдгийг онцлов.

     Буркина Фасо Улсын төр, иргэний нийгэм, хувийн хэвшлийн 30 гаруй төлөөлөгч “СОР17”-д өргөн бүрэлдэхүүнтэйгээр идэвхтэй оролцсон байна. Дэд сайд Оуэдраого Памусса “СОР17”-г амжилттай зохион байгуулж, төлөөлөгчдийг найрсаг, мэргэжлийн өндөр түвшинд хүлээн авч буй Монгол Улсын Засгийн газарт талархал илэрхийлээд, хот, хөдөөгийн соёл, амьдралын хэв маягийг хослуулан хөгжүүлж буй Монгол Улсын туршлагаас суралцах сонирхолтой байгаагаа илэрхийллээ.