Монгол Улсад зохион байгуулагдсан Нэгдсэн Үндэстний Байгууллагын Цөлжилттэй тэмцэх конвенцын Талуудын 17 дугаар бага хурал буюу COP17 хурлын аюулгүй байдлыг хангах ажиллагаанд Олон улсын эрүүгийн цагдаагийн байгууллага-Интерпол хамтран ажиллажээ.

   Монгол Улсын Цагдаагийн ерөнхий газрын хүсэлтийн дагуу Интерполын Томоохон арга хэмжээнд дэмжлэг үзүүлэх баг буюу IMEST энэ оны долоодугаар сарын 1-нээс наймдугаар сарын 28-ны өдрийг хүртэл дэмжлэг үзүүлсэн байна.

   Энэ хүрээнд Интерполоос тусгайлан томилогдсон мэргэжилтэн Федерико Морено Тобар Улаанбаатар хотод ажилласан байна. Монгол Улсад IMEST баг анх удаа томилогдон ажилласан нь олон улсын томоохон арга хэмжээний аюулгүй байдлыг хангах чиглэл дэх Монгол Улс болон Интерполын хамтын ажиллагааг шинэ түвшинд гаргасан чухал алхам болсон аж.

   Тус ажиллагааны үр дүнд үндэсний аюулгүй байдлыг хангах, үндэстэн дамнасан гэмт хэрэгтэй тэмцэх, болзошгүй эрсдэл, аюул заналыг эрт илрүүлэхэд олон улсын цагдаагийн хамтын ажиллагаа болон мэдээллийн санг үр дүнтэй ашиглах боломжтойг харуулсан байна.