Гадаад харилцааны сайд Б.Батцэцэг Цөлжилттэй тэмцэх тухай НҮБ-ын конвенцын Талуудын 17 дугаар бага хурал “COP17”-д оролцохоор Монгол Улсад хүрэлцэн ирсэн Бүгд Найрамдах Узбекистан Улсын Ерөнхийлөгчийн экологийн асуудал хариуцсан зөвлөх, тус улсын Экологи, уур амьсгалын өөрчлөлтийн үндэсний хорооны дарга А.Абдухакимовыг өчигдөр хүлээн авч уулзлаа. Сайд Б.Батцэцэг Узбекистан Улс “COP17” хуралд идэвхтэй оролцож, үндэсний  павильон нээн байгаль орчныг хамгаалах, цөлжилт, газрын доройтлыг бууруулах, уур амьсгалын өөрчлөлтийн сөрөг нөлөөллийг сааруулах чиглэлээр хэрэгжүүлж буй бодлого, туршлагаа танилцуулж буйд талархал илэрхийлэв.

    Түүнчлэн уулзалтын үеэр талууд дээрх чиглэлээр хоёр улсын хамтын  ажиллагааг өргөжүүлэх талаар санал солилцож, байгаль орчин, уур амьсгалын өөрчлөлтийн чиглэлээр тодорхой төсөл хөтөлбөр, арга хэмжээ хэрэгжүүлэхэд Монгол Улс Төв Азийн орнуудтай дуу хоолойгоо нэгтгэн хамтран ажиллахын чухлыг тэмдэглэв. Уулзалтын үеэр Узбекистаны тал 2027 оны 6 дугаар сарын 15-17-ны өдрүүдэд Ташкент хотноо зохион байгуулагдах “Eco Expo Central Asia 2027” олон улсын үзэсгэлэнгийн талаар мэдээлэл өгч, Монгол Улсыг тус арга хэмжээнд оролцохыг урив.

    Тус үзэсгэлэн нь байгаль орчныг хамгаалах, тогтвортой хөгжил, “ногоон” хөрөнгө оруулалт, инновац, олон улсын хамтын ажиллагааг дэмжих чиглэлээр жил бүр зохион байгуулагдаж буй аж. Түүнчлэн Төв Азийн Байгаль орчин, уур амьсгалын өөрчлөлтийн судалгааны  их сургууль /Green universty/-д Монголын оюутан, судлаачдыг тэтгэлэгт хөтөлбөрт  хамруулан сургах боломжийг танилцуулж, байгаль орчин, уур амьсгалын өөрчлөлтийн чиглэлээр хүний нөөц бэлтгэх чиглэлээр хамтран ажиллах санал тавив.