Монгол Улсын Ерөнхий сайд Н.Учрал НҮБ-ын Хүнс, хөдөө аж ахуйн байгууллагын Ерөнхий захирлын орлогч хатагтай Бет Бекдолыг хүлээн авч уулзан, хамтын ажиллагааны цаашдын чиглэлээр санал солилцжээ.

   Ерөнхий сайд Н.Учрал Монгол Улс 1973 онд НҮБ-ын Хүнс, хөдөө аж ахуйн байгууллагад элссэнээс хойш тус байгууллагын эрхэм зорилго, үйл ажиллагааг тууштай дэмжиж ирснийг онцолсон байна. Мөн НҮБ-ын Тогтвортой хөгжлийн зорилтууд, тэр дундаа ядуурлыг бууруулах, өлсгөлөнг зогсооход чиглэсэн бодлого, үйл ажиллагаа, санаачилгыг үргэлжлүүлэн дэмжиж, найдвартай, идэвхтэй түнш хэвээр байгааг тэмдэглэжээ.Түүнчлэн НҮБ-ын ХХААБ-ын Ерөнхий захирал Др.Чю Дониугийн 2024 онд Монгол Улсад хийсэн айлчлал болон Монгол Улсын Ерөнхийлөгч У.Хүрэлсүхийн Бүгд Найрамдах Итали Улсад хийсэн төрийн айлчлалын үеэр НҮБ-ын ХХААБ-д зочилсон нь хоёр талын хамтын ажиллагааг бэхжүүлж, шинэ түвшинд хүргэхэд чухал түлхэц болсныг онцолсон байна.

   НҮБ-ын Хүнс, хөдөө аж ахуйн байгууллагын Ерөнхий захирлын орлогч Бет Бекдол “COP17” бага хурлыг зохион байгуулж буй Монгол Улсын Засгийн газрын манлайлалд талархал илэрхийлж, бэлчээрийн асуудлаарх олон улсын хамтын ажиллагааг цаашид үргэлжлүүлэхээ илэрхийлжээ. Мөн хил дамнасан малын халдварт өвчин, тэр дундаа шүлхий өвчинтэй тэмцэх чиглэлээр хамтран ажиллах боломжтойг тэмдэглэв.Монгол Улсын санаачилгаар НҮБ-ын Ерөнхий Ассамблейн 76 дугаар чуулганаар 2026 оныг “Бэлчээр ба нүүдлийн мал аж ахуй эрхлэгчдийн олон улсын жил” болгон зарласан. Энэхүү жилийн хүрээнд хэрэгжүүлэх үйл ажиллагааг НҮБ-ын хэмжээнд зохицуулах үндсэн үүргийг НҮБ-ын Хүнс, хөдөө аж ахуйн байгууллага хүлээж байгаа бөгөөд Олон улсын жилийн Удирдах хороог Монгол Улс даргалж байна.

   “COP17” болон “Бэлчээр ба нүүдлийн мал аж ахуй эрхлэгчдийн олон улсын жил” нь нүүдлийн мал аж ахуй эрхлэгчдийн үнэлэмж, ач холбогдлыг олон улсын түвшинд хүлээн зөвшөөрсөн ойлголтыг урт хугацааны бодлого, хөрөнгө оруулалт, бодит үйл ажиллагаагаар баталгаажуулах чухал боломж болж байгааг талууд онцолжээ.