COP17 бага хурлын хүрээнд болсон “Хотын дарга нарын чуулга уулзалт”-д 33 улс, 24 хотын удирдлага, 51 олон улсын байгууллага, хөрөнгө оруулагчид ажиллаж байна. Чуулга уулзалтыг Хотын дарга Б.Пүрэвдагва зорин ирсэн хотуудын удирдлагыг хүлээн авч уулзан, харилцан ойлголцол, хамтын ажиллагаагаа шинэ шатанд гаргах талаар санал солилцлоо.

   Хотын дарга Б.Пүрэвдагва “Улаанбаатар хот “Хотын дарга нарын чуулга уулзалтыг” ирэх хоёр жилийн хугацаанд удирдан явуулах учраас бид дараагийн уулзалтаа Турк улсын Анкара хотноо зохион байгуулахаар төлөвлөж байна. Энэ нь танай сайхан оронд дахин нэг удаа уулзан ярилцах таатай боломжийг бидэнд олгож байна. Азийн хотуудын уулзалт нь хоёр жилд нэг удаа зохион байгуулагддаг уламжлалтай билээ. Бид энэхүү уулзалтыг Хотын дарга нарын уулзалттай хамтатган явуулж, цөлжилт болон газрын доройтлын асуудалд түлхүү анхааралд хандуулах бүрэн боломжтой. Иймд би ICLEI байгууллагад, тэр дундаа Сү Жү, Га Ли нарт нэгэн санал тавихыг хүсэж байна. Азийн хотуудад мод тарих үйл хэргийн хүрээнд харилцаа холбоо, хамтын ажиллагааны нэгдсэн сүлжээ бий болгохыг би ихэд хүсэж байгаа юм. Уг сүлжээ хот бүрийн хувьд үнэхээр өндөр үр өгөөжтэй байх болно. Өнөөдөр бидний нүүр тулж буй шороон шуурганы асуудал гэхэд л аль хэдийн бүс нутгийг хамарсан хүндрэл болж хувираад байна шүү дээ. Тиймээс хамтдаа мод тарих нь энэ мэт асуудлыг шийдвэрлэхэд чухал түлхэц болно. Хотын дарга нарын чуулга уулзалт нь бидэнд бусад түншүүдтэйгээ илүү өргөн хүрээнд хамтран ажиллах маш том боломжийг нээж өгч байгаа юм. Өчигдөр гэхэд л миний бие таван гэрээ, харилцан ойлголцлын санамж бичиг байгууллаа. Мөн өмнө дурдсанчлан, бид 250 сая ам.долларын ногоон санхүүжилт татан төвлөрүүлэхээр болсон. Түүнчлэн бид замын хөдөлгөөний ачааллыг шийдвэрлэх, BYD компанийн шинэ технологи болох “Sky  Shuttle” системийг нэвтрүүлэх зорилгоор тус компанитай харилцан ойлголцлын санамж бичиг байгуулсан. Бид энэ төслийг аль болох богино хугацаанд, яаралтай эхлүүлэхийг хүсэж, хүлээж байна. Ингээд Сү Жү болон Га Ли та хоёртоо маш их баярлалаа. Энд хүрэлцэн ирж, цаг заваа гаргасанд болон COP17 хурлын хүрээн дэх Хотын дарга нарын чуулга уулзалтыг зохион байгуулахад, тулгамдаж буй асуудлыг шийдвэрлэх, цаашид төслүүдийг хамтдаа хэрэгжүүлэх бидний хамтын ажиллагааны маш том амжилттай эхлэл байж чадлаа. Түүнчлэн бид бусад түншүүддээ ч олон олон шинэ боломжуудыг нээж өгөх үр дүнтэй үйл явдал боллоо” гэжээ.