Орон сууцны залилангийн асуудлаар байгуулсан ажлын хэсэгт 66 аж ахуйн нэгжтэй холбоотой 3111 хохирогч бүртгэгдсэн талаар Хууль зүй, дотоод хэргийн сайд С.Амарсайхан мэдээлэл хийлээ.

          Тэрбээр “Энэ эцсийн тоо биш бөгөөд гомдол гаргаагүй иргэд, гэрээ хэлцэл хийсэн нь тодорхой болоогүй аж ахуйн нэгжийн мэдээлэл цаашид нэмэгдэх боломжтой байна. Өдөр ирэх тусам шинээр гомдол мэдээлэл ирж байгаа. Шалгахгүй үлдээхгүй нэг ч компани байхгүй. Холбогдох бүх аж ахуйн нэгжийг шалгаж, нөхцөл байдлыг тодорхой болгоно. Ажлын хэсэг хамгийн түрүүнд холбогдох компаниудтай уулзаж, хохирлыг хэрхэн барагдуулах боломжтойг судалж байгаа. Төрийн байгууллагын шийдвэр, зөвшөөрөл, бичиг баримттай холбоотой шалтгаанаар төсөл хэрэгжихгүй байгаа эсэх, улсын комисс хүлээн авах боломжгүй нөхцөл үүссэн эсэхийг тус бүрд нь тогтооно. Уг асуудал дээр гарч болох гарц, арга хэмжээг авч шийдвэрлэх ажил дээр нээлттэй” гэлээ.