Улаанбаатар хотноо болж буй Цөлжилттэй тэмцэх тухай НҮБ-ын конвенцын талуудын 17 дугаар бага хурлын “UNCCD COP17” хүрээнд конвенцын оролцогч талууд болон иргэний нийгмийн хооронд хийгддэг нээлттэй яриа хэлэлцүүлгийн эхний хуралдаан энэ наймдугаар сарын 20-ны өдөр боллоо.

     Хуралдааныг Гадаад харилцааны сайд бөгөөд “UNCCD COP17”-гийн дарга Б.Батцэцэг нээж, үг хэллээ. Тэрбээр хэлсэн үгэндээ, засгийн газар, олон улсын байгууллага, хувийн хэвшил, эрдэм шинжилгээний байгууллага, иргэний нийгэм, орон нутаг болон уугуул иргэд, залуучуудын хамтын ажиллагааг бэхжүүлэх гэдгийг тодотгов. Мөн дэлхийн түвшинд хүлээсэн үүрэг амлалтыг газар дээрх бодит үйл ажиллагаа болгон хэрэгжүүлэхийн чухлыг тэмдэглэв.

    Хэлэлцүүлгээс гарсан санал, санаачилгыг “COP17”-гийн үр дүн болон цаашдын хамтын ажиллагаанд тусган, оролцогчдын дуу хоолойг бодит үйл хэрэг болгох нь бага хурлын чухал зорилтын нэг болохыг онцоллоо.Тус хуралдаанаар газрын нөхөн сэргээлтэд орон нутгийн болон уугуул иргэдийн мэдлэг чухал гэв. Туршлага, шинжлэх ухаан, инновац, тогтвортой санхүүжилтийг хослуулахын ач холбогдлыг хэлэлцэв.

   Мөн “2026 оныг Бэлчээр ба нүүдлийн мал аж ахуй эрхлэгчдийн олон улсын жил” болгон зарласантай холбогдуулан тогтвортой хүнсний тогтолцоог хөгжүүлэх чухал гэлээ. Газрын доройтлыг бууруулах зорилтыг хэрэгжүүлэхэд чиглэсэн бодит шийдэл, туршлага, санхүүжилтийн боломжийг оролцогчид хуваалцлаа.