Гадаад харилцааны сайд Б.Батцэцэг Өмнөд Африкийн Бүгд Найрамдах Улсын Ойн аж ахуй, загас агнуур, байгаль орчны дэд сайд Бернис Свартсыг хүлээн авч уулзлаа. Уулзалтаар “COP17”-д Өмнөд Африкийн төлөөлөгчид идэвхтэй оролцож байгаад талархал илэрхийлэв. Монгол Улс энэхүү бага хурлыг нээлттэй, ил тод, хүртээмжтэй, зөвшилцөлд суурилсан байдлаар амжилттай зохион байгуулахыг зорьж буйгаа тэмдэглэлээ.

    Өмнөд Африк нь газрын доройтол, цөлжилт, гангийн асуудлаар өөрийн онцлог, туршлагатай. Энэ нийтлэг сорилтыг даван туулахад улс орнуудын хамтын ажиллагаа, харилцан туршлага солилцоо, бодит шийдэл, санхүүжилтийн хүртээмжийг нэмэгдүүлэх нь чухал гэдэгт санал нэгдлээ. Мөн “COP17”-ын даргын хувьд бүх талуудын байр суурийг сонсож, харилцан ойлголцлыг бэхжүүлэн, ялгаатай байр суурийг зөвшилцөлд хүргэх гүүр болж ажиллахын чухлыг онцоллоо.