Улсын Их Хурал энэ оны зургаадугаар сарын 26-ны өдөр Аж ахуйн нэгжийн орлогын албан татварын тухай хуульд нэмэлт, өөрчлөлт оруулах тухай хуулийг баталж, татварын тогтолцоог илүү шударга, өрсөлдөх чадвартай, бизнес болон технологийн хөгжлийг дэмжих чиглэлээр шинэчилжээ. Хуулийн хүрээнд аж ахуйн нэгжийн орлогын албан татварын хувь хэмжээг орлогын түвшинтэй уялдуулан шатлалтай болгосон байна. Тухайлбал, жилийн 6-10 тэрбум төгрөгийн орлоготой аж ахуйн нэгжид 15 хувийн татвар ногдуулахаар тусгажээ.

   Мөн жижиг, дунд бизнесийг дэмжих зорилгоор 90 хувийн татварын хөнгөлөлт эдлэх аж ахуйн нэгжийн орлогын дээд хэмжээг 1.5 тэрбум төгрөгөөс 2.5 тэрбум төгрөг болгон нэмэгдүүлэхээр болсон байна.Түүнчлэн технологи, инновацын салбарыг татварын бодлогоор дэмжихээр тусгаж, хиймэл оюун ухаан болон дата төвийн тоног төхөөрөмжид гурван жилийн хугацаанд түргэвчилсэн элэгдэл тооцох боломж бүрдүүлэхээр болжээ. Үүнээс гадна виртуал бус мэдээллийн технологийн компанийн тодорхой төрлийн орлогыг татвараас чөлөөлөхөөр тусгасан байна.

   Хуулийн өөрчлөлтөөр татварын тайлагнал, төлбөрийн хугацааг илүү уян хатан болгож, сар бүрийн тайлан гаргах болон татвар төлөх хугацааг тодорхой өдрөөр бус тухайн сарын “сүүлийн өдөр”-өөр тогтоохоор өөрчилжээ.Ингэснээр татварын хугацаатай холбоотой сар бүрийн 10, 20, 25-ны өдрийн зохицуулалт илүү ойлгомжтой болж, татвар төлөгчид үүргээ биелүүлэхэд хялбар нөхцөл бүрдэх юм.

   Энэхүү хуулийн өөрчлөлт 2027 оны нэгдүгээр сарын нэгнээс хэрэгжиж эхэлнэ гэж Улсын Их Хурлын Хэвлэл мэдээлэл, олон нийттэй харилцах газраас мэдээллээ.