УИХ-ын дарга Бямбацогт, Япон Улсын Парламентын Зөвлөхүүдийн танхимын дэд дарга Т.Фүкүяма, Япон Улсаас Монгол Улсад суугаа Элчин сайд Игавахара Масарүг хүлээн авч уулзлаа. Энэ үеэр Монгол, Японы харилцааг шинэ шатанд гаргахад хоёр тал иргэдийнхээ эрх ашгийг эн тэргүүнд тавьж, эдийн засгийн харилцан ашигтай хамтын ажиллагааг хөгжүүлэх нь чухал гэдгийг тэмдэглэлээ. Япон Улсын тусламжтайгаар олон улсын шинэ нисэх буудалтай болсон ч одоогийн гэрээний зарим заалт нь агаарын тээврийн либералчлал болон орон нутгийн иргэдийн зорчих хөдөлгөөнд хүндрэл үүсгэж байгаа билээ.

       Орон нутгийн нислэгээр ирж буцах өвчтэй зовлонтой, өндөр настай, нялх нярай хүүхэдтэй иргэд хаа байсан Хөшигийн хөндийд онгоцноос бууж суух нь цаг хугацаа, зардал мөнгөнөөс авхуулаад ихээхэн төвөг чирэгдэлтэй байгаа. Нөгөө талаас “Чингис хаан” олон улсын нисэх буудлын ачаалал хэтэрч, үйлчилгээний чанар доголдоход хүргэж байгааг эргэн харж гэрээгээ иргэдэд илүү ээлтэй байдлаар засаж сайжруулахаар болжээ. “Буянт-Ухаа” нисэх буудалд орон нутгийн нислэгийг шилжүүлэхэд Японы парламент дэмжлэг үзүүлэхийг хүслээ.

     Мөн 2015 онд байгуулсан Монгол, Японы чөлөөт худалдааны хэлэлцээрийн хүрээнд Монголын 5700 орчим бараа бүтээгдэхүүн Японы зах зээлд татваргүй гарах боломж бүрдсэнийг дорвитой ажил хэрэг болгох талаар санал солилцлоо. Хоёр орон худалдаа, эдийн засгийн боломжоо харилцан ашигтайгаар бүрэн дүүрэн ашиглаж, иргэдэд илүү ээлтэй, хүртээмжтэй, үр ашигтай үйлчилгээг бий болгох тал дээр санал нэг байгаа нь сайшаалтай билээ.