Гадаад харилцааны яамны сайд Б.Батцэцэг,  Япон Улсын “Айчи-Гакүин” их сургуулийн профессор, Айчи муж дахь Монгол Улсын Өргөмжит консулын нарийн бичгийн дарга Н.Нацүмэг хүлээн авч уулзлаа. Профессор Н.Нацүмэ нь 30 гаруй жилийн хугацаанд Монгол, Японы эрүүл мэнд, боловсрол, шинжлэх ухаан, хүмүүнлэгийн салбарын хамтын ажиллагааг хөгжүүлэхэд үнэтэй хувь нэмэр оруулж, хоёр орны харилцааны чухал гүүр болсоор ирсэн билээ.

   Тэрбээр Япон эмч нарын багийн хамт жил бүр Монгол Улсад ажиллаж, иргэдэд үнэ төлбөргүй үзлэг, оношилгоо хийхийн зэрэгцээ эрүүл мэнд, боловсролын чиглэлээр суралцаж буй монгол оюутан, багш нарыг Япон Улсад суралцах, докторын зэрэг хамгаалахад нь дэмжлэг үзүүлж ирсэн. Түүнчлэн хоёр орны эрдэмтэн, судлаачдын хамтарсан судалгаа, форумыг тогтмол зохион байгуулж, Монгол, Японы ард иргэдийн харилцан ойлголцол, найрамдал, нөхөрлөлийг бэхжүүлэхэд хувь нэмрээ оруулсаар байна.

    Уулзалтын үеэр ирэх онд тохиох Монгол, Япон Улс дипломат харилцаа тогтоосны 55 жилийн ойг өргөн хүрээнд тэмдэглэн өнгөрүүлэхийн зэрэгцээ иргэд хоорондын найрамдал, нөхөрлөл, орон нутаг хоорондын хамтын ажиллагааг өргөжүүлэн хөгжүүлэх чиглэлээр хамтран ажиллахаар санал нэгдлээ. Монгол, Японы харилцааны бат бөх гүүр болж, олон жилийн турш хоёр орны ард иргэдийн нөхөрлөлийг бэхжүүлэхийн төлөө тууштай ажиллаж ирсэн профессор Н.Нацүмэ болон хамтран ажилладаг Япон эмч, эрдэмтэн, багш нарт талархал илэрхийлэв.