Монгол Улсаас Бүгд Найрамдах Беларусь Улсад суугаа Онц бөгөөд Бүрэн эрхт Элчин сайд Г.Байгалмаа 2026 оны долдугаар сарын 28-ны өдөр Бүгд Найрамдах Беларусь Улсын Ерөнхийлөгч А.Г.Лукашенкод Итгэмжлэх жуух бичгээ өргөн барив. Элчин сайд Г.Байгалмаа Итгэмжлэх жуух бичгээ өргөн барих үеэрээ Монгол Улсын Ерөнхийлөгч У.Хүрэлсүхийн мэндчилгээг Ерөнхийлөгч А.Г.Лукашенкод уламжилсан байна. Цаашид хоёр улсын уламжлалт найрсаг харилцаа, хамтын ажиллагааг бүхий л салбарт өргөжүүлэн хөгжүүлэхийн төлөө хичээл зүтгэл гарган ажиллахаа илэрхийлэв.

    Бүгд Найрамдах Беларусь Улсын Ерөнхийлөгч А.Г.Лукашенко Элчин сайд Г.Байгалмаад үүрэгт ажилдаа орж байгаад нь баяр хүргэсэн байна. Монгол, Беларусийн харилцаа, хамтын ажиллагааг өргөжүүлэн хөгжүүлэх үйлсэд нь ажлын өндөр амжилт хүсэв. Беларусийн төр, засгийн зүгээс бүх талын дэмжлэг үзүүлж, нягт хамтран ажиллахаа илэрхийлэв.

    Түүнчлэн, өдгөө дэлхийн цохилох зүрх болж буй Ази тивийн улс орнууд, түүний дотор Монгол Улстай хамтын ажиллагаагаа өргөжүүлэн хөгжүүлэхийн төлөө байгаагаа тэмдэглэв. Монгол Улс, Евро-Азийн эдийн засгийн холбоо, түүний гишүүн орнууд хоорондын худалдааны түр хэлэлцээрийн дүнд нээгдэж буй боломжуудыг бүрэн дүүрэн ашиглан хоёр улсын найрсаг харилцаа, хамтын ажиллагааг эдийн засгийн агуулгаар баяжуулахын чухлыг онцлов.