Бүгд Найрамдах Солонгос Улсын Ерөнхийлөгч И Жэ Мёны Монгол Улсад хийж буй төрийн айлчлалын хүрээнд Монгол-Солонгосын бизнес форумыг зохион байгууллаа. Ерөнхийлөгч У.Хүрэлсүх Монгол Улс худалдаа, хөрөнгө оруулалт, боловсруулах үйлдвэрлэл, өндөр технологи, инновацын хамтын ажиллагааг шинэ шатанд гаргахыг уриалж, хөрөнгө оруулагчдад ээлтэй орчныг тууштай бүрдүүлэн БНСУ-тай урт хугацааны, харилцан ашигтай, найдвартай түншлэлийг хөгжүүлэхээ илэрхийллээ.

    Ерөнхийлөгч И Жэ Мён хоёр орны итгэлцэл, нөхөрлөлд тулгуурлан логистик, хүйтэн хэлхээ, технологи, хүний нөөц, санхүү, эрүүл мэнд, боловсрол, хиймэл оюун ухаан, чухал ашигт малтмал болон дэд бүтцийн салбарын хамтын ажиллагааг өргөжүүлж, хамтдаа хөгжих харилцан ашигтай түншлэлийг бэхжүүлэхийг онцоллоо.

    Бизнес форумд хоёр улсын төр, засгийн байгууллага, бизнесийн холбоод болон чухал ашигт малтмал, эрчим хүч, боловсруулах үйлдвэрлэл, хүнс, хөдөө аж ахуй, худалдаа, жижиглэн худалдаа, дижитал технологи, банк, санхүү, логистик зэрэг салбарын 250 гаруй аж ахуйн нэгжийн төлөөлөл оролцлоо.

    МҮХАҮТ, БНСУ-ын Худалдаа, аж үйлдвэрийн танхим хооронд бизнесийн хамтын ажиллагааг өргөжүүлэх Харилцан ойлголцлын хоёр Санамж бичиг байгуулж, төрийн байгууллага, аж ахуйн нэгжүүд чухал ашигт малтмал, эрчим хүч, геологи, худалдаа, хүнс, дижитал технологи, боловсрол зэрэг салбарт хамтрахаар 20 гаруй баримт бичигт гарын үсэг зурлаа.

    БНСУ бол 1.9 их наяд орчим ам.долларын эдийн засаг бүхий, дэлхийд тэргүүлэх 15, Азийн тэргүүлэх 5 эдийн засгийн нэг юм. Өнгөрсөн онд тус улсын экспортын хэмжээ 709.7 тэрбум байсан нь түүхэн дээд үзүүлэлт байсан бөгөөд хагас дамжуулагч, автомашин, нефтийн бүтээгдэхүүний олон улсын зах зээлийн томоохон тоглогч билээ.