Монгол Улсаас Бүгд Найрамдах Итали Улсад суугаа Онц бөгөөд Бүрэн эрхт Элчин сайд Дансрангийн Булган Бүгд Найрамдах Итали Улсын Ерөнхийлөгч эрхэмсэг ноён Сэржо Маттарэллад Итгэмжлэх жуух бичгээ 2026 оны долдугаар сарын 6-ны өдөр өргөн барив.

    Элчин сайд Д.Булган Монгол Улсын Ерөнхийлөгч Эрхэмсэг ноён Ухнаагийн Хүрэлсүхийн мэндчилгээг Ерөнхийлөгч Сэржо Маттарэллад уламжилж, Монгол Улсын Ерөнхийлөгчийн Бүгд Найрамдах Итали Улсад 2025 оны арванхоёрдугаар сард хийсэн төрийн айлчлалын үеэр Монгол, Италийн харилцааны түвшинг ахиулж, стратегийн түншлэлд хүргэсэн нь хоёр улсын хамтын ажиллагааны түүхэнд шинэ хуудас нээснийг онцлон тэмдэглэв.

    Монгол Улс Бүгд Найрамдах Итали Улсыг өөрийн гуравдагч хөрш, Европын Холбоон дахь чухал түнш хэмээн үздэг бөгөөд Итали Улстай стратегийн түншлэлийн харилцаагаа бэхжүүлж, бүх чиглэлд хамтран ажиллах нь Монгол Улсын гадаад бодлогын тэргүүлэх чиглэл болохыг онцолж, хоёр орны харилцааг өргөжүүлэн хөгжүүлэхийн төлөө хичээл зүтгэл гарган ажиллахаа илэрхийлэв.

    Ерөнхийлөгч Сэржо Маттарэлла Ерөнхийлөгч У.Хүрэлсүхэд хариу мэндчилгээ дэвшүүлж, Монгол, Италийн харилцаа, хамтын ажиллагаа идэвхтэй хөгжиж байгааг онцолж, Элчин сайдад ажлын амжилт, сайн сайхан бүхнийг хүсэв. Монгол Улс, Бүгд Найрамдах Итали Улстай 1970 оны зургадугаар сарын 29-ний өдөр дипломат харилцаа тогтоосон.