Гадаад харилцааны яамны Төрийн нарийн бичгийн дарга Л.Мөнхтүшиг Бүгд Найрамдах Хорват Улсад 2026 оны зургадугаар сарын 26-27-ны өдрүүдэд “Олон туйлт ертөнцийн эрин үе, олон чиглэл, нэг ирээдүй” сэдвийн дор зохион байгуулагдсан “Дубровник форум”-д оролцлоо. Тэрбээр форумын үеэр болсон “Хүчний төвүүдийн дунд, олон тулгуурт дипломат үйл ажиллагаа, сургамж” сэдэвт хэлэлцүүлэгт илтгэгчээр оролцож, Монгол Улсын энхийг эрхэмлэсэн, нээлттэй, бие даасан, олон тулгуурт гадаад бодлогын талаар танилцуулав.

     Түүнчлэн, Төрийн нарийн бичгийн дарга Л.Мөнхтүшиг Хорватын Гадаад хэрэг, Европын яамны Улс төрийн асуудал эрхэлсэн Төрийн нарийн бичгийн дарга Франо Матушич-тай 2026 оны зургадугаар сарын 26-ны өдөр хоёр улсын ГХЯ хоорондын Улс төрийн тавдугаар зөвлөлдөх уулзалтыг хийв.  Сүүлийн жилүүдэд идэвхтэй өрнөж буй хоёр талын харилцаа, хамтын ажиллагааны үр дүнг хэлэлцсэн байна. Цаашид худалдаа, эдийн засгийн харилцааг бодит агуулгаар хөгжүүлэх боломжийн талаар ярилцав.

    Бүгд Найрамдах Армени Улсын Гадаад хэргийн дэд сайд Мнацакан Сафарян-тай хоёр талын уулзалт хийлээ. Монгол, Арменийн харилцаа, хамтын ажиллагааг хөгжүүлэх боломжийн талаар мөн санал солилцсон юм. “Дубровник форум” нь 2006 оноос хойш зохион байгуулагдаж буй олон улс, бүс нутгийн аюулгүй байдал, тогтвортой хөгжилд шинэ тутам тулгарч буй сорилтын талаар хэлэлцдэг чухал платформ бөгөөд 19 дэх удаагийн форумд 50 орчим улсын өндөр түвшний төлөөлөгч оролцлоо.