Сонгууль болгоны өмнө тойрог услах, гишүүдийн цуваа хөдөөг зорьж, Малчны хууль, тэтгэврийн асуудлаа урдаа бариад чихэн дээр цэцэг ургуулах ажлаа эхлүүлдэг уламжлалтай. Тэгвэл 2028 оны хөл ухуулга хэдийнээ эхэлж, том жийптэй дарга нар хөдөөг тойроод эхэлжээ. Ингэхдээ тэд эхлээд намын бодлогоо танилцуулах нэрээр тойрогт шинээр нэр дэвших гишүүдээ одоогийн УИХ-д сонгогдсон гишүүдээрээ далимдуулж, тойргоо услладаг улс төрийн уламжлалт арга хэрэгжүүлж эхэлсэн байна.

       МАН-ынхан ард түмэнд эргэж ирнэ гэх уриалга дэвшүүлэн гишүүдээ тойргуудад томилсон байна. Тухайлбал, УИХ-ын гишүүн Г.Лувсанжамц тэргүүтэй гишүүд Хэнтий аймгаар тойрч, түүнтэй хамд “JET” скүүтрээрээ танигдсан дэд сайд асан Г.Дашням нар тойрч байна. Г.Дашнямын хувьд өнгөрсөн сонгуулиар Сүхбаатар дүүрэгт нэр дэвшиж, өвдөг шороодсон. Харин ирэх сонгуулиар Хэнтий, Сүхбаатар, Дорнод аймаг буюу зүүн бүсийн тойргийг услаж эхэлсэн бололтой.

      Харин баруун бүс болох Говь-Алтай, Завхан, Увс Ховд аймаг буюу баруун бүсийг Сангийн дэд сайд асан, одоогийн Монгол Ардын намын Нарийн бичгийн дарга С.Мөнгөнчимэг тэргүүтэй улстөрчид тойрч явна. Сангийн дэд сайд С.Мөнгөнчимэгийн хувьд өнгөрсөн сонгуулиар жагсаалтад багтсан ч хамраараа таслуулж, УИХ-д сонгогдож чадаагүй. Ирэх сонгуулиар тойрогт нэр дэвшиж, даагаа нэхэх нь бололтой.

      Цаашлаад Говьсүмбэрт, Санхүүгийн зохицуулах хоооны дарга асан С.Даваасүрэн тэргүүтэй улстөрчид тойрч байгаа бол УИХ-ын гишүүн Б.Баярбаатар тэргүүтэй МАН-ынхан Булган аймгийг услаж эхэлжээ. УИХ-ын  гишүүн Б.Баярбаатарын хувьд олон жил МАН-ын  гал тогоог барьсан гэдгээрээ өнгөрсөн сонгуулиар жагсаалтад багтаж, гишүүн болсон. Харин энэ удаад улс төрд танигдсан тэрбээр Булган аймаг цаашлаад хойд бүсэд нэр дэвших бэлтгэлээ хангаж эхэлсэн бололтой. УИХ-ын гишүүн Б.Баярбаатарын хувьд Булган аймгийн уугуул гэдгийг олон нийт мэдэх биз. Цаашлаад Төв аймагт УИХ-ын гишүүн Д.Рэгдэлтэй хамт УИХ-ын дарга асан М.Энхболдын охин, Нийслэлийн иргэдийн төлөөлөгчдийн хурлын төлөөлөгч М.Хулан тэргүүтэй улстөрчид Ардын намын бодлогыг сурталчилж байгаагаа нийтэлжээ.

    Энэ мэтчлэн  Ардын намынхан уугуул суугуул нутгаараа тойргоо хуваан авсан бол Ардчилсан намынхан ч тойргуудаар тойрч явна.

     Тухайлбал, УИХ-ын гишүүн П.Мөнхтулгын хамт Глобал удирдагч сургуулийн захирал Б.Отгонбат шинэ тойрог горилогчид Архангай аймагт хөл ухуулга хийж явна.

   Харин УИХ-ын гишүүн Б.Батчимэг нарын гишүүд Өвөрхангай аймагт ажиллаад ирсэн сурагтай. Түүний хуувьд өнгөрсөн сонгуулиар жагсаалтад багтсан ч ирэх сонгуулиар тойрогт дэвших бэлтгэлээ базааж байгаа энэ аж. Харин Баянхонго аймагт АН-ын гишүүн П.Нүрзэ даагаа нэхэх бололтой.

      Энэ мэтчлэн  гишүүд тойрогтоо танигдах хөл ухуулгаа хийхдээ бэлэг гардуулдаг, иргэдийг хуурдаг хуучин аргаасаа ч салаагүй явна. Өмнөх жилүүдийн сонгуулиар бэлэг тараалтаараа тэргүүлсэн гишүүд “Шанага” Тэмүүлэн, “Бидон” Ганбат, “Данх” Билэгт, “Халуун сав” Учрал гэж хоч зүүх хүртлээ, ард түмэн тал засаж, гарын бэлэг гардуулсан. Түүгээр ч зогсохгүй тараасан бэлгээрээ “гангардаг”, гайхуулдаг үе ч байлаа.

     Сүүлийн үед цахим орчинд бэлэг тараалт шүүмжлэл дагуулж, сошиалд гайхуулах “дон” эрхгүй багассан. Гэхдээ л хөдөөгийн малчдыг сүлжээ, интернэтгүйгээр нь далимдуулж, цаг тооны бичгээс эхлүүлээд мэр сэр гарын бэлэг сум захиргааны удирдлагуудаар нь далидуулж тарааж л байгаа сурагтай.

     Ингэж найр тавьж, хөл алдаж гүйснийхээ хариуд дөрвөн жилийнхээ ажлыг хялбархан тавиулчихдаг нь ч байдаг үзэгдэл мэт дасал болжээ. Уг нь өдийд настайчуудынхаа саналыг авсан улстөрчид ул боов тараахын оронд улс орныхоо хөгжил, иргэдийнхээ амьдрах орчныг нь сайжруулах ийм хуулийн төсөл санаачлаад, улс орныхоо төлөө хийсэн ажлын тань хариуд ийм тэтгэвэр тогтоох хууль боловсруулсан шүү гээд бодлого, төлөвлөлт яриад сууж байх байлаа. Гэвч одоогийн улстөрчдөөс манлайлал үзүүлэх гишүүн байхгүй гэдгийн баталгаа энэ байна даа.

        Ард түмэнд хайр зарлаж, найр тавьсан улстөрчдийн буухиа үргэлжилсээр байна