Гадаад хэргийн сайд Б.Батцэцэг  Токио хотноо “Азийн ирээдүй” 31 дүгээр форумд оролцож, Япон Улсад ажлын айлчлал хийж байна. Энэ хүрээнд Гадаад хэргийн сайд Т.Мотэгитэй албан уулзалт хийж, Монгол, Япон Улсын харилцаа, хамтын ажиллагаа болон бүс нутаг, олон улсын тавцан дахь нийтлэг зорилтын хүрээний хамтын ажиллагааны асуудлаар дэлгэрэнгүй санал солилцлоо.

     Уулзалтын үеэр Монгол, Японы “хүн төвтэй” “Энх тайван, хөгжил цэцэглэлтийн төлөөх тусгай стратегийн түншлэл” бүх чиглэлд амжилттай хөгжиж буйг талууд сайшаан тэмдэглэж, тус түншлэлийн “Үйл ажиллагааны 2022–2031 оны хөтөлбөр”-ийн хэрэгжилтийг эрчимжүүлэхийн төлөө байгаагаа нотоллоо. Энэхүү зорилгын хүрээнд бүх түвшний айлчлал, яриа хэлэлцээг идэвхжүүлэх, худалдаа, эдийн засгийн хамтын ажиллагааг өргөжүүлэх, хөрөнгө оруулалтыг нэмэгдүүлэх чиглэлээр нягт хамтран ажиллахаар санал нэгдлээ.

Түүнчлэн Гадаад харилцааны яам хоорондын стратегийн болон бодлогын зөвлөлдөх уулзалтууд, газар нэгж хоорондын хамтын ажиллагаа, ахлах, дунд шатны болон залуу албан хаагчдын солилцооны хөтөлбөрүүд амжилттай хэрэгжиж буйг тэмдэглэж, эдгээрийг цаашид тогтмолжуулан хөгжүүлэхийн чухлыг онцоллоо. Япон Улсын Засгийн газрын Хөгжлийн албан ёсны тусламжийн хүрээний хөнгөлөлттэй зээлээр “Чингис хаан” олон улсын нисэх онгоцны буудлыг өргөтгөх, хүчин чадлыг нэмэгдүүлэх төслийг хэрэгжүүлэхээр болж буйд Японын талд талархал илэрхийллээ.

Мөн Монгол, Японы “хүн төвтэй” хамтын ажиллагааг улам бэхжүүлж, боловсрол, соёл, орон нутаг хоорондын харилцааг өргөжүүлэх, хоёр улсын ирээдүй болсон хүүхэд, залуучуудын солилцоог гүнзгийрүүлэх асуудлаар санал солилцов. Өнөөдөр эхлэх “Азийн ирээдүй” форумд илтгэл тавьж, Монгол Улсын байр суурь, хөгжлийн зорилт болон бүс нутгийн хамтын ажиллагааны талаарх үзэл баримтлалаа танилцуулах юм.