Эрүүгийн хуулийн 13.14 дүгээр заалтын талаар УИХ-ын гишүүн Ч.Лодойсамбуу байр сууриа илэрхийллээ.

        Тэрбээр "Энэ парламентад орж ирээд хамгийн түрүүнд өргөн барьсан төсөл Эрүүгийн хуулийн хуулийн 13.14 дүгээр заалтыг л хасах байсан. Хэлэлцэхгүй явж байгаад Үндсэн хуулийн цэц дээр сэтгүүлчид өөрсдөө мөн маргаан үүсгээд Цэцийн шийдвэр гараад хассан. Үндсэн хууль дээр хүний нэр төр, алдар хүнд дархлагдсан. Тиймээс үүнийг хамгаалах зохицуулалт хийж өгөх ёстой гэсэн үүрэг даалгавар өгсөн. Үүний дагуу Ажлын хэсэг байгуулагдсан. Энэ заалтыг эсэргүүцэж байсан учраас намайг оруулсан. Ажлын хэсгийн гаргаж байгаа гүтгэх заалтыг нэмэх эсэх дээр би санал нэгдэхгүй байгаа. Тиймээс сүүлийн хоёр хуралд нь оролцоогүй. Ардчилсан намын үзэл баримтлал бол хүнээ хамгаалдаг. Эргээд гүтгэх гэх зүйл рүүгээ явж орох гэж байна. Хүнийг гүтгэх эрх, эрх чөлөө гэж хаана ч байхгүй. Хүнд хамгийн том үнэтэй хөрөнгө төрөлхийн заяадаг. Дээрээс нь өөрийн хүч, хөдөлмөрөөр бүтээдэг. Энэ бол хамгийн үнэт хөрөнгө. Хүний энэ хөрөнгө рүү халдаж байгаа бол халдсаныхаа хэрээр хариуцлага үүрэх ёстой. Гол нь хохирлыг барагдуулах ёстой" гэв.