Өнгөрөгч УИХ-ын сонгуулиар АН-ынхан Ц.Элбэгдорж, Х.Баттулгын гэх баруун, зүүний магнайгаас дэвцгээсэн. Хэн, хэн нь тэнцүү тооны хүн төрийн туг тойруулсан. Жишээ нь, Ц.Элбэгдоржийн талаас гэхэд, Ерөнхий сайд байх үед нь Хэвлэлийн төлөөлөгч нь байсан Ц.Баатархүү, Ерөнхийлөгч байх үед нь Хэвлэлийн төлөөлөгч нь байсан С.Эрдэнэболд, Ахлах зөвлөх нь байсан А.Ганбаатар нар төрийн түшээ болчихоод сууж буй.

Тэгвэл Ц.Элбэгдоржтой хамаатан саднаас ч дотно холбоо, хамааралтай бас нэг хүн төрд орж ирсэн нь УИХ-ын гишүүн Х.Тэмүүжин. Уг нь Х.Тэмүүжин гаднаа экс ерөнхийлөгч Ц.Элбэгдоржид эрээ, цээргүй саймширч, сүйд болоод байдаггүй, харин ч хааяа шүүмжилж харагддаг. Гэвч үнэн хэрэгтээ хөнжлийг нь сөхөөд харахаар туулсан намтраараа ч, төрөл садныхаа түрийвчээр ч Ц.Элбэгдоржтой хөдөлшгүйгээр холбогддог нэгэн.

Түүх сөхвөл, 2007 онд АН-ын дарга Ц.Элбэгдорж МУИС-ийн Хууль зүйн сургуулийн залуухан багш нар дундаас Х.Тэмүүжин, Ч.Өнөрбаяр, Г.Эрдэнэбат, М.Батсуурь гэх дөрвөн залууг нэгэн зэрэг дуудан дэргэдээ авч, Шинэ Үндсэн хуулийн төсөл боловсруулах даалгавар өгснөөр тэд анх танилцсан, ах дүү бололцсон түүхтэй. Ингээд энэ цагаас Ц.Элбэгдорж өнөөх дүү нараа төрд татаж, өөрийнхөө талд зүтгүүлсэн. Эхлээд 2008 онд Х.Тэмүүжин УИХ-ын гишүүн болж, 2012 онд АН-ын жагсаалтаар УИХ-ын гишүүнээрээ улирч, улмаар Хууль зүйн сайд болж мандсан. Харин Ч.Өнөрбаяр нь 2009 онд ҮАБЗ-ийн Ажлын албаны дэд дарга, 2011 онд АТГ-ын Дэд дарга, Г.Эрдэнэбат нь 2009 онд Ерөнхийлөгчийн туслах, 2010 онд Улсын Ерөнхий прокурорын туслах, 2013 онд Улсын Ерөнхий прокурорын орлогч, М.Батсуурь нь 2011 онд Захиргааны хэргийн давж заалдах шатны шүүхийн шүүгч, 2014 онд Улсын Дээд шүүхийн Захиргааны хэргийн шүүхийн шүүгч болж тус тус томорсон байдаг.

Харамсалтай нь, Хууль зүйн сургуулийн багшаас Хууль зүйн сайд болж томортлоо “татуулсан” Х.Тэмүүжин 2014 онд “Сайн ах” гэх саар хочтой болж, хоёр жил сошиалын од, сонин, сайтын бай болсны эцэст 2016 онд   Саарал ордныг орхиж байв. Улмаар 2020 онд төрөлх Төв аймгаасаа төрд дахин орох гэж үзээд бүтэлгүйтсэн. Ийнхүү найман жил хувь, хувьсгалын ажилгүй, хийцгүйрч суусны эцэст өнгөрөгч УИХ-ын сонгуулиар төрд  дахин орж ирсэн нь энэ юм.

Тэгвэл Х.Тэмүүжин, Ц.Элбэгдорж хоёрын холбоо, хамаарал нь төрд татсан, татагдсан хуурай ах дүүс төдийхнөөр дуусахгүй. Бүр, хэн, хэнийх нь хамаатнууд хоорондоо халаас нэгтэй байх юм.

Тодруулбал, Х.Тэмүүжин хүүхэд насаа нагац ах А.Баярмагнайнхаа хурдан морийг унаж, хүүхдүүдтэй нь тоглож өнгөрүүлсэн нь дурдатгалд нь дурайтал бичээстэй буй. Тэгвэл нагац ах А.Баярмагнайнх нь охин буюу Х.Тэмүүжингийн үеэл эгч нь News.mn сайт болон Parlament телевизийн үүсгэн байгуулагч Б.Тэмүүлэн гэх эмэгтэй. Х.Тэмүүжинг 2008 онд УИХ-ын гишүүн болсон цагаас түүний хэлсэн үг, хийсэн үйлдлийг сошиал, сайт, сонин хэвлэлээр сурталчилах ажлыг үеэл эгч Б.Тэмүүлэн нь хариуцаж ирсэн түүхтэй.

Тэгвэл Х.Тэмүүжингийн үеэл эгч Б.Тэмүүлэнгийн нөхөр Д.Ганбат нь Ц.Элбэгдоржийг Ерөнхийлөгч байх хугацаанд буюу 2010-2017 онд Үндэсний аюулгүй байдлын зөвлөлийн Стратеги судалгааны хүрээлэнгийн захирлаар ажилласан. Улмаар Ц.Элбэгдорж Ерөнхийлөгчөөс буухаасаа ердөө сарын өмнө буюу 2017 оны тавдугаар сард Д.Ганбатыг Холбооны Бүгд Найрамдах Герман Улсад суух Онц бөгөөд Бүрэн эрхт Элчин сайдаар томилуулж байв.

Харин Б.Тэмүүлэнгийн том хүү Г.Бүүвэйхүү нь Ц.Элбэгдоржийг Ерөнхийлөгч байх хугацаанд Шадар туслахаар нь ажилласан. Өдгөө Г.Бүүвэйхүү нь Ц.Элбэгдорж, түүний хүү Э.Эрдэнэ нартай “Элбэг эрдэнэ консалтинг” ХХК-ийг эзэмшдэг. Мөн Г.Бүүвэйхүү, Ц.Элбэгдорж нар “Дэлхийн Монголчуудын холбоо глобал” ТББ, “Дэлхийн Монголчуудын Хуралдай” ТББ-ыг хамтран эзэмшдэг.

Харин Б.Тэмүүлэнгийн бага хүү Г.Анархүү нь News.mn сайт буюу “Ньюс-Аженси” ХХК-ийг Ерөнхийлөгч асан Ц.Элбэгдоржийн эхнэр Х.Болормаагийн төрсөн дүү Х.Болдбаатарын хүү Б.Батболдтой хамтран эзэмшдэг.

Ийм байхад, Х.Тэмүүжин “Элбэгдоржийн хүн” гэхгүй гээд яах билээ дээ.       

ЕРӨНХИЙ САЙД АСАН С.БАЯР, “МОНОС”-ЫН Л.ХҮРЭЛБААТАР, “ПЕТРОВИС”-ИЙН Ч.ДАВААНЯМ НАРЫН ОФФШОР БҮСЭЭС МӨНГӨ ОРУУЛЖ ИРЖ, ОРОН СУУЦ БОЛГОЖ “УГААХ” АЖЛЫГ ХУУЛЬ ЗҮЙН САЙД АСАН Х.ТЭМҮҮЖИН ХАЛХАЛЖ, ХАРИУД НЬ АВЛИГА АВЧ БАЙСАН УУ

Х.Тэмүүжин Ц.Элбэгдорж гэх том артай, авлигын хэрэг нь С.Баяр, Л.Хүрэлбаатар, Ч.Давааням гэх “акул”-уудтай холбогдож байгаа юм. Товчхондоо, Х.Тэмүүжингийн холбогдоод буй авлигын хэрэг нь оффшор бүсээс мөнгө оруулж ирж, орон сууц болгож угаах ноцтой гэмт хэргийн нэг хэсэг байж болзошгүй. Оффшор бүсэд мөнгө нуух, оруулж ирж орон сууц болгож угаах гэмт хэргийг одоогоор зөвхөн “томчууд”, тэдний гар хөлүүд л хийж буйг хэлэх илүүц биз.

Х.Тэмүүжин Хууль зүйн сайдаар ажиллаж байхдаа буюу 2013 оны тавдугаар сард Дотоод хэргийн их сургуулийн 3000 сонсогчийн хичээлийн байрны барилгын ажлыг “Грийн ресурс констракшн” ХХК-д тендергүй өгсөн. Гэтэл төд удалгүй “Грийн ресурс констракшн” ХХК-ийн захирал Ц.Гантулгын төрсөн ах Ц.Цэцэнзоригийн “Рома инвестмент” ХХК-ийн барьсан “Рома таун” хотхоноос хоёр ширхэг орон сууцыг үнэгүй авсан. Тус хоёр орон сууцны нэгэнд нь Х.Тэмүүжин өөрөө, нөгөөд нь түүний хүү Т.Бүгүнүтэй амьдарч байгаа баримтыг бид дэлгэсэн. Өнгөц харвал, Х.Тэмүүжин Хууль зүйн сайдын албан тушаалаа ашиглаж, “Грийн ресурс констракшн” ХХК-д барилгын ажил тендергүй өгч, хариуд нь хоёр орон сууц авлигад авсан гэж харагдана. Гэхдээ лавшруулж үзвэл, маш том хэргийн нэг сэжүүр байж болзошгүй байгаа юм.

Тодруулбал, Х.Тэмүүжингээс тендергүйгээр барилгын ажил авсан гэх “Грийн ресурс констракшн” ХХК-ийг Цэнд-Аюушийн Гантулга эзэмшдэг. Тус компанийн толгой компани нь “Грийн ресурс” ХХК. “Грийн ресурс” ХХК-ийг Ерөнхий сайд асан С.Баярын охин Б.Бадамханд, С.Баярын эхнэр Эрдэнэбилэгийн Сувд болон Цэнд-Аюушийн Цэцэнзориг нар эзэмшдэг. Өөрөөр хэлбэл, Х.Тэмүүжингээс тендергүй барилгын ажил авсан “Грийн ресурс констракшн” ХХК болон толгой компани болох “Грийн ресурс” ХХК-ийн жинхэнэ эзэн нь Ерөнхий сайд асан С.Баяр гэсэн үг.

Харин Х.Тэмүүжинд хоёр орон сууцаар авлига өгсөн гэх “Рома инвестмент” ХХК-ийг Цэнд-Аюушийн Цэцэнзориг, Хүрэлбаатарын Ананд нар эзэмшдэг. Х.Ананд нь УИХ-ын гишүүн асан Л.Эрдэнэчимэгийн төрсөн ах “Монос” группийн Ерөнхийлөгч Л.Хүрэлбаатарын хүү. Өөрөөр хэлбэл, “Рома инвестмент” ХХК-ийн жинхэнэ эзэн нь “Монос”-ын Л.Хүрэлбаатар гэсэн үг.

Ерөнхий сайд асан С.Баяр, “Монос групп”-ийн Л.Хүрэлбаатар хоёр Хөвсгөл аймгийн Төмөрбулаг сумын уугуул, нэг “дов”-ны найзууд. Мөн С.Баярын “Грийн ресурс” ХХК, Л.Хүрэлбаатарын “Рома инвест” ХХК-ийн аль алинд нь хувьцаа эзэмшиж, хооронд нь холбож байгаа Ц.Цэцэнзориг,  “Грийн ресурс констракшн” ХХК-ийн захирал Ц.Гантулга нар нь Хөвсгөл аймгийн Төмөрбулаг сумын уугуул, тус сумаас төрсөн анхны нарийн мэргэжлийн эмч Х.Цэнд-Аюуш агсны хүүхдүүд. Өөрөөр хэлбэл, Ц.Цэцэнзориг, Ц.Гантулга гэх ах дүүс нь С.Баяр, Л.Хүрэлбаатар хоёрын багын найзынх нь хүүхдүүд гэсэн үг. Ц.Цэцэнзориг нь Нийслэлийн Өмчийн харилцааны газрын Менежмент, төлөөллийн хэлтсийн даргаар, Ц.Гантулга нь Төрийн тусгай хамгаалалтын газарт комиссар буюу хамгаалагчаар ажиллаж байгаад “Грийн ресурс” ХХК, “Грийн ресурс констракшн” ХХК-иудын хувьцаа эзэмшигч, захирал болцгоосон байгаа юм.

Тэгвэл С.Баяр, Л.Хүрэлбаатар нар “Грийн ресурс” ХХК, “Грийн ресурс констракшн” ХХК, “Рома инвестмент” ХХК-иудыг оффшор бүсэд нуусан мөнгө оруулж ирэх, орон сууц болгож угаах зорилгоор ашиглаж байсан нь 2018 оноос илэрч эхэлсэн. Тодруулбал, С.Баярын найз “Петровис”-ийн Ч.Давааням нь С.Баярын охин Б.Нандинтай оффшор бүсэд зургаан компани эзэмшиж байсан. Тэдгээр компаниудынхаа нэг болох Англид байгуулсан “Forest Berries Ltd” компанийн Хонг Конг дахь данснаас 2010-2013 оны хооронд 3.9 сая ам.доллар Монгол руу шилжүүлсэн. Энэ мөнгө Л.Хүрэлбаатарын “Рома инвестмент” ХХК, Ч.Даваанямын “Петровис” болон С.Баярын охин Б.Бадамхандын дансаар дамжсан гэдэг нь С.Баярын хэрэг шүүхэд шилжсэний дараа ил болсон байдаг.

Цаг хугацааны дарааллаар харвал, С.Баяр, Ч.Давааням, Л.Хүрэлбаатар нар оффшор бүсээс их хэмжээний мөнгө оруулж ирсний дараа буюу 2014 онд “Рома инвестмент” ХХК нь Зайсангийн аманд “Рома таун” гэх тансаг зэрэглэлийн орон сууцны хотхоныг ашиглалтад оруулсан. “Рома таун” хотхоныг ашиглалтад ормогц нь Х.Тэмүүжин хоёр орон сууцыг үнэгүй авсан. Хэрвээ “Рома таун” хотхоныг оффшор бүсээс оруулж ирсэн хууль бус мөнгөөр барьсан гэж үзвэл Хууль зүйн сайд асан Х.Тэмүүжин тус хотхоноос хоёр орон сууц авснаараа оффшорын мөнгөний “охь”-ийг нь хүртсэн болж таарч байна.

Гол асуудал нь, Хууль зүйн сайд асан Х.Тэмүүжин тансаг зэрэглэлийн “Рома таун” хотхоны хоёр орон сууцыг “Грийн ресурс констракшн” ХХК-д тендергүй барилгын ажил өгснийхөө хариуд авсан уу, эсвэл С.Баяр, Ч.Давааням, Л.Хүрэлбаатар гурвын “мөнгө угаалт”-ыг мэдээгүй царайлсныхаа шанд авсан уу. Өөрөөр бол, С.Баяр, Ч.Давааням, Л.Хүрэлбаатар нарын “Грийн ресурс” ХХК, “Грийн ресурс констракшн” ХХК, “Рома инвестмент” ХХК-иудаар халхавчилсан “мөнгө угаалт” 2010-2014 онд буюу Х.Тэмүүжинг Хууль зүйн сайд байх хугацаанд хийгдсэн болж таарч байна. Тухайн үед хууль хүчнийхнийг толгойлж байсан Х.Тэмүүжин оффшор бүсээс их хэмжээний мөнгө орж ирж байгааг, орон сууц болж угаагдаж байгааг огт мэдээгүй байсан байж таарах уу. Эсвэл мэдсэн ч эсрэгээрээ дэмжиж, байгуулагдаад удаагүй “Грийн ресурс констракшн” ХХК-д 3000 сонсогчийн хичээлийн байрны барилгын ажлыг тендергүй өгч, туршлага хуримтлуулахад нь дэм болсон уу. Ямартай ч, ядарсан багшаас задарсан баян болсон Х.Тэмүүжингийн тансаг зэрэглэлийн хоёр орон сууцны хэргийг хөөхөд ийм схем гарч ирж байна. Хууль хяналтын байгууллагууд эцсийн хариултыг олох биз ээ.