САЙД С.ОДОНТУЯАГИЙН БРЭНДИЙН ХУВЦСЫГ КОМИССЫН БАРАА БОЛГОСОН ХОТЫН ГААЛИЙН ОРЛОГЧ О.ЦОГТБААТАР НАРЫН ЯЛ АВСАН ХЭРГИЙН ҮНЭН

2025-09-04, 2992

С.Одонтуяа сайд одоогоор Саарал ордонд сууж байгаа ч бүрэн эрхийн хугацаа нь дуусахаар очих өөр нэг газар түүнд бий. Гэхдээ хэрэг хуучирдаггүй, хөөн хэлэлцэх хугацаа дуусахгүй гэдэг хууль түүн дээр хэрэгжвэл гэдгийг тодотгож хэлэх нь зүйтэй.

С.ОДОНТУЯАГИЙН ХУУЧИН ХУВЦАСНЫ ХАМСААТАНГУУД ЯЛ АВАВ

С.Одонтуяа Эрүүгийн хэрэгт шалгагдаж байлаа. Тодруулбал, тэрбээр таван жилийн өмнө Улаанбаатар хот дахь Гаалийн газрын Гаалийн хяналт, шалгалт хариуцсан орлогч дарга О.Цогтбаатарын гар утас руу зурвас бичиж, Эрдэнэчимэг гэх найзынхаа импортоор оруулж ирсэн барааг гаалийн татвараас чөлөөлүүлэх үүрэг өгсөн гэдэг. Тэрбээр татваргүй, маш богино хугацаанд оруулж ирсэн 15 тонн хувцас, бараагаа тойргийнхоо ахмадуудад тараасан байж болзошгүй нөхцөл байдал илэрсэн. Шалгалтын явцад С.Одонтуяагийн найз Эрдэнэчимэгтэйгээ бичсэн вибер чат нь ил болж байсан юм. Тодруулбал, 2020 оны дөрөвдүгээр сарын 10-нд н.Эрдэнэчимэг нь С.Одонтуяа руу “Том алчуураа ахмадууддаа өгвөл зүгээр байх шүү, дотроо ууттай байгаа” гэсэн бол хариуд нь тэрбээр “Маш их баярлалаа найз аа” гэж бичсэн байдаг. Харин үүнээс хэдэн сарын дараа н.Эрдэнэчимэг “Намайг АТГ-т байцааж байна. Би Баянгол дүүрэгт 300-400 хайрцаг тараасан гэж хэллээ. Гаалийн хяналтгүй эрх мэдэлтнээр хэлүүлж, шинэ бараа гаргасан гэж матсан байна” гэсэн бол С.Одонтуяа хариуд нь “Нэр ус л хэлж болохгүй шүү” гэх зэргээр харилцсан нь баримтаар АТГ-ын мөрдөгчид очсон байдаг билээ.

Ингээд Улаанбаатар хот дахь Гаалийн газрын Гаалийн хяналт, шалгалт хариуцсан орлогч дарга асан О.Цогтбаатарыг ажлаас нь чөлөөлж, нэр бүхий гаалийн байцаагчидтай хамт шалгаж эхэлсэн байдаг. Тодруулбал, түүнтэй хамт Улаанбаатар хот дахь Гаалийн газрын улсын ахлах байцаагч У.Ариунаа, Б.Хишигбат, улсын байцаагч Д.Соёлмаа, БНСУ-аас бараа оруулж ирдэг Б.Төрбаяр нарыг хамтад шалгаж эхэлсэн юм. Учир нь, Б.Төрбаярын БНСУ-аас оруулж ирсэн гурван чингэлэг барааг С.Одонтуяагийн өгсөн чиглэлийн дагуу татвараас чөлөөлж, хуурамч гаалийн бүрдүүлэлт хийсэн байж болзошгүй гэж үзсэн. Гэвч хачирхалтай нь, энэ хэргээс С.Одонтуяад холбогдох үйлдлийг тусгаарлаж, дээрх нэр дурдагдсан хүмүүст холбогдох хэргийг шүүхэд шилжүүлсэн юм. Тэгвэл бид дээрх хэргийн хавтаст хэргийг хүргэж байна. Ноцтой нь, Б.Төрбаяр нь Гаалийн хяналт, шалгалт хариуцсан орлогч дарга асан О.Цогтбаатарт 10 кг цагаан будаа, 1.5 сая төгрөг, гаалийн улсын ахлах байцаагч У.Ариунаад 50 мянган төгрөг, улсын байцаагч Д.Соёлмаа, Б.Хишигбат нарт 100 мянган төгрөгийг хахууль болгож өгчээ. Мөн хилээр найман нэр төрлийн 10726 ширхэг бараа нэвтрүүлж, 9.2 сая төгрөгийн татвар нуун дарагдуулсныг шалгалтаар тогтоожээ.

МЭДҮҮЛЭГ.

Яллагдагч О.Цогтбаатар “Би өөрийн гэм буруутай үйлдлийг хүлээн зөвшөөрч байна. Б.Төрбаяр дугтуйтай мөнгө өгсөн. Гэхдээ “Баярын бэлэг шүү” гэж хэлсэн санагдаж байна. Мөн тэрбээр “Наадах чинь сайн будаа шүү, өөрөө идээрэй. Чингэлэг ирж байгаа туслаарай” гэж хэлсэн. Би хурдан шуурхай, цаг хугацаа алдахгүй байхад нь туслаарай гэж хэлж байна л гэж ойлгосон” гэж мэдүүлжээ.

Яллагдагч Б.Хишигбат “О.Цогтбаатар дарга “Үзлэг шалгалтаа хийгээд өгчих, туслаарай манай танил байгаа юм” гэж хэлсэн. Өөр зүйл байхгүй. Гаалийн улсын байцаагч биет үзлэг хийхдээ зөрчилгүй гэж бичсэн учраас зөрчилгүй гэсэн үг. Би мөнгө аваагүй” гэжээ.

Яллагдагч У.Ариунаа “О.Цогтбаатар дарга над руу “Б.Төрбаярт туслаад, явуулаарай” гэж утсаар ярьсан. Би Б.Төрбаяртай ариун цэврийн өрөөнд уулзаж, “Дарга явуулсан болохоор явууллаа” гэж хэлсэн. Би түүнээс 50.000 төгрөг авсан нь үнэн. Энэ 50.000 төгрөгийг авсан нь миний буруу, надад мөнгө төгрөг авах ямар ч санаа байгаагүй. Би хувийн хэрэгцээндээ зарцуулаад дууссан” гэжээ. Яллагдагч Д.Соёлмаа “Би тэдний чингэлэгийг жинлээгүй. Жинлэхээр ажлын ачааллаас болоод уддаг. Тухайн үед намайг хяналт, шалгалт явуулж байхад манай гаалийн газрын орлогч дарга О.Цогтбаатар утсаар яриад “Наад хүндээ хурдхан үйлчлээд гаргаарай” гэсэн. Тийм учраас ачааг нь жинлээгүй, хяналт шалгалт хурдан хийгээд гаргасан” гэсэн байна.

Яллагдагч Б.Төрбаяр “Би өөрийн хийсэн гэм буруутай үйлдлийг хүлээн зөвшөөрч байна. О.Цогтбаатартай утсаар ярьж “Гурван чингэлэг бараа Солонгос Улсаас ирж байгаа, хурдан шуурхай авахад нь туслаад өгөөч” гэхэд “Туслаад өгье Харин гаалийн байцаагч нарын гарыг нь цайлгачихна биз дээ” гэж хэлсэн. Тэгээд би хэлснээр нь болсон” гэж мэдүүлж, хэргээ хүлээн зөвчшөөрчээ. Шүүхээс О.Цогтбаатарын нийтийн албанд ажиллах эрхийг долоон жил хасаж, 30 сая, Б.Хишигбат, Д.Соёлмаа, У.Ариунаа нарын мөн эрхийг таван жил хасан, тэднийг 15 сая, Б.Төрбаярыг долоон сая төгрөгөөр торгож, нийтийн албанд ажиллах эрхийг нь гурван жил хасах ял шийтгэжээ.

Тэгвэл С.Одонтуяад холбогдох үйлдлийг тусгаарлаж, түдгэлзүүлээд байгаа аж. Өөрөөр хэлбэл, С.Одонтуяа ордны эмгэнэлтэй төгсгөл энэ хэрэг болох магадлал өндөр байна. Учир нь, түүнтэй хамтарсан хүмүүс ял авч, харин С.Одонтуяа хууль бусаар хилээр оруулж ирсэн хувцсаа тойргийнхоо иргэдэд тараачихсан юм.

ХҮҮ Ө.ҮНЭНБҮРЭНГИЙНХ НЬ КОЙНЫ ХЭРЭГ

С.Одонтуяа “Сентозафүүд корт” ХХК-ийн хувь эзэмшигч гэдгээс өөр бизнесийн харьяалалгүй нэгэн. Харин хүү Ө.Үнэнбүрэн нь цахим “луйварчид”-ын нэг гэгдээд удаж байна. Ө.Үнэнбүрэн нь нэг хэсэг төрсөн дүү Ө.Номинтойгоо хамтарч ээж С.Одонтуяагийнхаа үүсгэн байгуулсан “Лотс инвест” ХХК, “Сод трейд” ХХК-уудыг удирдаж байгаад 2018 оноос койны бизнест “хөл тавьсан” байдаг. Тодруулбал, Ө.Үнэнбүрэн нь 2018 онд “Бит мон экс” ХХК-ийг Баярмагнайн Гантиг, Базарын Сабит нартай хамтран байгуулсан байдаг. Тэд эхлээд “Бит мон экс” ХХК-ийнхаа нэр дээр “Bitmonex” нэртэй бирж ажиллуулж, койн арилжаалдаг байж. Удалгүй “MNFT” нэртэй койныг зах зээлд гаргасан. Удалгүй “МNFT” койныг анхдагч зах зээлд 60 мянган хүн худалдаж авсан. Харин хоёрдогч зах зээлд 2021 оны арваннэгдүгээр 24-нд гаргаж, эхний өдрөө 24 сая ам.доллар буюу одоогийн ханшаар 81 тэрбум төгрөг татан төвлөрүүлсэн. Ингээд койны үнэ нь унаж, иргэд хохирч, тэд “баяжсан”. Ноцтой нь, Ө.Үнэнбүрэн, Б.Гантиг, Б.Сабит нарын үүсгэн байгуулсан “MNFT” койны хохирогчид өдөр ирэх тусам нэмэгдсээр байгаа. Дээрээс нь, Ө.Үнэнбүрэнгийн хамтрагч Б.Гантиг нь давхар О.Мөнхжинтэй хамтран гаргасан “IHC” койныхоо хэргээр яллагдагчаар татагдан шалгагдаж буй. Учир мэдэх хүмүүс “Ээж нь УИХ-ын гишүүн тулдаа хүүгийнхээ койны хэргийг аргалаад байна. Түүнээс ч аль эрт ачигдах ёстой” гэцгээж буй.

УТАА БУУРУУЛАХААР НИЙСЛЭЛЧҮҮДЭД “НҮҮДЭЛЧИН” ЗУУХ НИЙЛҮҮЛЭХ “ЭКО РЕСУРС” ХХК-ИЙГ ЭЗЭМШИГЧ П.БАЯРЦОГ НЬ С.ОДОНТУЯАГИЙН НӨХӨР, БЭРТЭЙ ХАЛААС НЭГТЭЙ

Өөр нэг ноцтой баримт танилцуулахад, Хотын дарга Х.Нямбаатар утаа бууруулах ажлын хүрээнд 32 мянган зуух худалдаж авахаар 28.2 тэрбум төгрөгийн тендер зарлахад тус тендерт “Эко ресурс” гэх компани шалгарсан байдаг. Тус компанийн “Нүүдэлчин” утаагүй зуухыг нийслэлийн гэр хорооллын иргэдэд тараахаар болсон гэсэн үг. Тэгвэл энэхүү 32 мянган зуухыг С.Одонтуяа нийслэлд “шахаж” байгаа бололтой. “Нүүдэлчин” нэртэй зуухыг зах зээлд гаргаж эхлээд буй “Эко ресурс” ХХК-ийг Цэрэндоржийн Мөнхбаатар, Паламын Баярцог гэх хоёр хүн эзэмшдэг. Ингэхдээ Цэрэндоржийн Мөнхбаатар нь өөрийгөө “Нүүдэлчин” зуухыг зохион бүтээсэн, инженер гэж олон нийтэд танилцуулж буй. Тэгвэл Паламын Баярцог нь хэн бэ гэдэг асуулт гарч ирнэ. Ноцтой нь, Паламын Баярцогт нь Батбаярын Алтантариа, Цэнгэмаагийн Амраа хоёртой “Веллком” ХХК-ийг хамтран эзэмшдэг. Тэгвэл Батбаярын Алтантариа нь сайд С.Одонтуяагийн хүү Ө.Үнэнбүрэнгийн эхнэр буюу бэр нь. Харин Ц.Амраа гэгч нь С.Одонтуяагийн нөхөр Г.Өлзийбүрэнг 2012-2016 онд Ашигт малтмал, газрын тосны газрын дарга байх үед дэд даргаар нь ажиллаж байсан цэрэг нь. Байгаль орчин, уур амьсгалын өөрчлөлтийн сайд С.Одонтуяагийн нөхөр Г.Өлзийбүрэн, түүний цэрэг Ц.Амраа хоёр 2016 онд Ашигт малтмал, газрын тосны газрын дарга, дэд даргын ажлаа өгцгөөснийхөө дараахан буюу 2017 онд П.Баярцогтой хамтран “Веллком” ХХК-ийг байгуулсан. Ингэхдээ Г.Өлзийбүрэн нь өөрийнхөө өмнөөс бэр Б.Алтантариагаа бүртгүүлсэн. Улмаар тэд Ашигт малтмал, газрын тосны газрыг удирдаж байсан эрх мэдэл, нөлөөгөө ашиглан “Веллком” ХХК-аараа ОХУ-аас шатахуун импортолж, уул уурхайн компаниудад нийлүүлж эхэлсэн байдаг. Өөрөөр бол, “Веллком” ХХК нь жирийн цүнхний компани төдий биш, шатахууны мөнгө эргэлдүүлдэг том компани юм.

Эндээс харвал, “Нүүдэлчин” зуухыг зэх заалд гаргаж буй “Эко ресурс” ХХК-ийг эзэмшигч П.Баярцог гэгч нь С.Одонтуяатай нөхөр, бэрээр нь дамжсан нэгдмэл ашиг сонирхолтой этгээд гэдэг нь тодорхой харагдаж байгаа юм. Дээрээс нь, УИХ-ын С.Одонтуяа хэвлэлд ярилцлага өгөхдөө “Эко ресурс” ХХК-ийн “Нүүдэлчин” зуухыг тэнгэрт тултал магтаж, өөрөө ч “Нүүдэлчин” зуухыг тойрогтоо тарааснаа ярьсан нь “Эко ресурс” ХХК-д үйлчилж буйх нь бас нэг баталгаа.

Тэгэхээр сайд С.Одонтуяа, Хотын дарга Х.Нямбаатартай хуйвалдаж, гэр бүлийнхээ бизнесийн хамтрагч П.Баярцогийн “Эко ресурс” ХХК-ийн 32 мянган “Нүүдэлчин” зуухыг нийслэлчүүдэд тарааж, 28.2 тэрбум төгрөгөөс хувь хүртэх лобби явуулсан байж болзошгүй.

Ташрамд дурдахад, С.Одонтуяагийн бэр Б.Алтантариагийн эзэмшдэг “Веллком” ХХК нь өнгөрсөн 2024 онд “Эрдэнэт үйлдвэр”-т шатахуун нийлүүлэх хоёр ч өндөр үнийн дүнтэй тендерт үнийн саналаа хүргүүлжээ. Одоогийн байдлаар 29 тэрбумаар шатахуун нийлүүлэх тендер нь хүлээгдэж байна.

Эцэст нь, татвараас зайлсхийсэн хуучин хувцасны хэрэг, хүү Ө.Үнэнбүрэнгийнх нь олон зуун хүнийг хохироосон койны хэрэг, бэр Б.Алтантариагийнх нь хадам ээжээрээ дамжуулж, нийслэлчүүдэд өндөр үнээр зуух нийлүүлсэн “хэрэг” нь С.Одонтуяагийн Төрийн ордонд суусан 12 жилийнх нь төгсгөл болох вий.

САЙД С.ОДОНТУЯАГИЙН БРЭНДИЙН ХУВЦСЫГ КОМИССЫН БАРАА БОЛГОСОН ХОТЫН ГААЛИЙН ОРЛОГЧ О.ЦОГТБААТАР НАРЫН ЯЛ АВСАН ХЭРГИЙН ҮНЭН

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.