Толгой намуудын дарга болох Л.Оюун-Эрдэнэ, Л.Гантөмөр, Т.Доржханд гурав өнгөрөгч 2024 оны УИХ-ын сонгуулиар хамаарал бүхий “этгээд”-үүдээ ордонд оруулж ирсэн. Тавдугаар ангийн сурагч байхаасаа л Л.Оюун-Эрдэнээс хөтөлж, хормойдсон М.Ганхүлэг, Л.Гантөмөрийн хунчирын тариалангийн хамтрагч А.Ганбаатар, хэвлэлийн төлөөлөгч Ч.Лодойсамбуу гэх мэтээр хөвөрнө. Харин ХҮН намын дарга Т.Доржхандын хувьд үеэл Б.Найдалаагаасаа гадна, төрсөн ах, эхнэр хоёрынхоо халаас нэгтэй хамтрагч П.Ганзоригийг УИХ-ын гишүүн болгосон байдаг.

            УИХ-ын гишүүн П.Ганзориг 2005 онд МУИС-ийг төгсөөд, 2011 он хүртэл зургаан жил УИХ-ын гишүүн асан А.Шагдарсүрэнгийн “Номин даатгал” ХХК-д ажилласан. Улмаар 2011 оноос УИХ-ын гишүүн Т.Доржхандын эхнэр У.Сийлэнгийн “Монре даатгал” ХХК-ийн Гүйцэтгэх захирлаар ажиллаж эхэлснээр халаасаа нэгтгэсэн байдаг.

         Өнгөрсөн хугацаанд УИХ-ын гишүүн П.Ганзориг, түүний төрсөн ах П.Гантогоо болон УИХ-ын гишүүн Т.Доржханд, түүний эхнэр У.Сийлэн нар даатгалын “Монре даатгал” ХХК, барилгын “Их эрин констракшн” ХХК, автомашин, сэлбэг хэрэгслийн худалдааны “Автохаб” ХХК, зээлийн “Зээл эм эн платформ” ББСБ, хувьцааны “Стандарт инвестмент ҮЦК” ХХК гэх таван компанийг хамтран байгуулж, эзэмшиж ирсэн. Мөн УИХ-ын гишүүн П.Ганзориг, УИХ-ын гишүүн Т.Доржхандын төрсөн ах Т.Лувсандоржтой 2017 онд “Гэрэгэ менежмент” ХХК-ийг хамтран байгуулсан байдаг. Өөрөөр хэлбэл, өнгөрсөн хугацаанд ХҮН намын дарга, УИХ-ын гишүүн Т.Доржханд, ХҮН намын генсек, УИХ-ын гишүүн П.Ганзориг хоёрын гэр бүл, ах, дүү нар зургаан компаниар халаасаа нэгтгэсэн гэсэн үг. Одоогийн УИХ-д Т.Доржханд, П.Ганзориг хоёр шиг халаас, хэтэвчээрээ ийм гүн гүнзгий холбогдсон хамсаатан байхгүй гэдгийг дурдах нь зүйтэй.

         Түүнчлэн ХҮН намын дарга Т.Доржханд 2020 оны УИХ-ын сонгуулиар Хан-Уул дүүргээс нэр дэвшиж, анх удаа УИХ-ын гишүүн болсон. Улмаар Т.Доржханд халаас нэгтэй хамтрагч П.Ганзоригийгоо өөрийнхөө Барилга, хот байгуулалт хариуцсан зөвлөхөөрөө ажиллуулж эхэлсэн. Гэхдээ дөрвөн сарын дараа буюу 2020 оны аравдугаар сард НИТХ-ын сонгуулиар Т.Доржханд П.Ганзоригийг өөрийн тойрог болох Хан-Уул дүүрэгт нэр дэвшүүлж, НИТХ-ын төлөөлөгч болгож байлаа. Харин өнгөрөгч 2024 оны УИХ-ын сонгуулиар Т.Доржханд ХҮН намынхаа жагсаалтыг тэргүүлж, П.Ганзориг нь гуравт бичигдсэнээр УИХ-ын гишүүн болсон. Өөрөөр хэлбэл, Т.Доржханд халаас нэгтэй хамтрагч П.Ганзоригийгоо чирч, гулдарсаар НИТХ-ын төлөөлөгч, УИХ-ын гишүүн болгосон нь энэ.

УИХ-ЫН ГИШҮҮН П.ГАНЗОРИГИЙН ТӨРСӨН ДҮҮ П.ГАНТОГОО ХӨВСГӨЛ АЙМАГТ СУРГУУЛЬ БАРИХ ХОЁР ТЕНДЕР АВЧ, 14 ТЭРБУМ ТӨГРӨГ “ХАЛААСЛАЖЭЭ”

       УИХ-ын гишүүн П.Ганзориг УИХ-ын гишүүн Т.Доржхандын эхнэр У.Сийлэн хоёр 2017 онд барилга угсралтын “Их эрин констракшн” ХХК-ийг хамтран байгуулж байв. Улмаар 2020 онд Т.Доржханд УИХ-ын гишүүн, П.Ганзориг НИТХ-ын төлөөлөгч болсон тул тэдний “Их эрин констракшн” ХХК-ийг П.Ганзоригийн төрсөн дүү П.Гантогоо нь эзэмшиж, удирддаг болсон.

      Ноцтой нь, УИХ-ын гишүүн П.Ганзориг Хөвсгөл аймгийн уугуул. Тиймдээ ч П.Ганзориг төрсөн дүү П.Гантогоогийнхоо нэр дээр бүртгүүлсэн “Их эрин констракшн” ХХК-аараа Хөвсгөл аймгийн сургуулийн тендерүүдийг түүж ирсэн. Тодруулбал, УИХ-ын гишүүн П.Ганзоригийн “Их эрин констракшн” ХХК нь

     Боловсролын яамнаас зарласан Хөвсгөл аймгийн Мөрөн суманд 480 хүүхдийн суудалтай сургуулийн барилга барих 4.0 тэрбум төгрөгийн тендер,

    Боловсролын яамнаас зарласан Хөвсгөл аймгийн Жаргалант суманд 640 хүүхдийн суудалтай сургууль, спорт заал барих 10.1 тэрбум төгрөгийн тендерт шалгарсан байдаг. Уг барилгыг хоёр жил гаруй хугацаанд барьсны эцэст өнгөрсөн намар ашиглалтад оруулсан байдаг. 

  Мөн “Их эрин констракшн” ХХК нь өнгөрөгч 2024 онд Боловсролын яамнаас зарласан хамгийн том төсөвтэй тендер болох Хөвсгөл аймгийн Мөрөн хотод Политехник коллежийн цогцолбор барилга барих 19.2 тэрбум төгрөгийн тендерт оролцсон. Гэхдээ тус тендерийг Хөвсгөл аймгийн ИТХ-ын дарга Г.Мөнгөнхуяг өөрийн аав С.Гүнширийн нэр дээр бүртгэлтэй “Урагшлах” ХХК-аараа авсан тул П.Ганзоригийн “Их эрин констракшн” ХХК-д ямар ч арга байгаагүй, мултарсан байдаг. Энэ мэтээр УИХ-ын гишүүн П.Ганзориг Боловсролын яамнаас зарласан, төрж өссөн Хөвсгөл аймгийнхаа Мөрөн, Жаргалант суманд сургууль барих 14 тэрбум төгрөгийн тендерийг авчихсан байгаа юм.

     Товчхондоо, сургуулийн тендерт тун их ашиг сонирхолтой нэгэн. Хамгийн гол нь, ХҮН намын дэд дарга П.Наранбаяр одоо Боловсролын сайдаар ажиллаж байгаа. Тэгэхээр ХҮН намын генсек, УИХ-ын гишүүн П.Ганзориг, ХҮН нам дэд дарга, Боловсролын сайд П.Наранбаяр нарын дунд сургуулийн тендерийн тохироо явж болзошгүй буюу ашиг сонирхлын том зөрчилж ханхалж байгаа юм.