Түрхэн зуурын аадар бороонд нийслэлийн нэг дүүргийн гурван хороо усанд автаж, монголчууд тэр чигээрэй айдаст автлаа.  Зүгээр л зам дээр зорчиж явсан автомашинтай иргэд нүд эрмэхийн зуурт усанд урсаж, айлуудын хашаа байшин, гэр, эд хөрөнгийг тэр чигт нь л урсгаад аваад явчихдаг юм байна. “Байгалийн давагдашгүй хүчин зүйлийн өмнө хэн ч байсан хүчин мөхөс, амь аврагдсан нь л их юм болов” гэж өөрсдийгөө тайвшируулж сууцгаана даа, иргэд.

       Хэдийгээр байгалийн гамшгийн улмаас нийслэлд хүнд нөхцөл байдал үүссэн ч эрсдэлтэй нөхцөл байдлыг бий болгосон шалтгаан нөхцөл, урьдчилсан сэргийлэх арга хэмжээг сайн авч чадаагүйн улмаас их хэмжээний хохирол амсчихсан гээд хэлчихэд буруудахгүй л байна даа өнөөдрийн байдалд.

      Өөрөөр хэлбэл, нийслэлийн хэмжээнд олгосон замбараагүй газар олголт, үерийн амыг хааж, зөвшөөрөлгүй буусан айл өрхүүд, “Үерийн эрсдэл үүсэх эрсдэлтэй байна” гээд анхааруулаад байхад бүх шатны  байгууллагууд урьдчилан  арга хэмжээ аваагүй гэх мэтээр эхнээсээ адаг хүртлээ алдаатай байгааг саяын үйл явдал бэлхнээ харууллаа.

       Энэ тухай ч нийслэлийн Засаг дарга мэдэгдэл хийж, хариуцлагын асуудлыг сөхнө гэдгээ мэдэгдээд амжив. Тодруулбал, нийслэлийн Засаг дарга бөгөөд Улаанбаатар хотын захирагч Д.Сумъяабазар “Хэдийгээр хүний амь насыг эд хөрөнгөөр барагдуулах боломжгүй ч бид шаардлагатай бүхий л арга хэмжээг авч ажиллана. Хувийн хэвшлийн аж ахуйн нэгж байгууллагууд ч нийгмийн хариуцлагын хүрээнд үерт өртсөн иргэдэд туслахаар  хамтран дэмжлэг үзүүлэхээ илэрхийлээд байна. Хариуцлагын асуудал ярина. Ялангуяа дүүргийн газар зохион байгуулалтын алба гэж байгаа. Мөн хорооны Засаг дарга нар замбараагүй газар олголтод нөлөөлсөн байвал ажлаас нь халах хүртэл арга хэмжээ авах ёстой. Ажлаас халсны дараа эрүүгийн хэрэг үүсэх нөхцөл байдал үүссэн үү гэдгийг шалгуулна” гээд ам гарчихлаа.

      Хотын даргын үг хэр хүчтэйг одоо л харах нь  дээ, иргэд. Өөрөөр хэлбэл, Нийслэлийн Засаг дарга бөгөөд Улаанбаатар хотын захирагчийн байр суурь нийслэлд амьдарч байгаа иргэдийн хувьд хууль л гэсэн үг. Тэр чинээгээрээ ч хотын дарга Д.Сумъяабазар бүхэл бүтэн Монгол Улсын тэн хагас нь оршиг суугаа 1.5 сая иргэнийг хариуцсан чухал албыг хашиж байгаа юм.

Тэгж байж бусад хороо, дүүргийн дарга, газрын алба, холбогдох хүмүүст сургамж болж, ажлаа хариуцлагатай хийдэг эхлэлийг тавих шаардлага үүсээд байна.

      Тиймээс хотын даргын хэлсэн үг хэр богино хугацаанд хэрэгжиж биелэлээ олохыг шаардах, үзэх эрх нийслэлчүүдэд бий. Үнэхээр үерийн аюултай гэдгийг урьд нь сануулж, суваг, шуудуу ухах үерийн гамшигаас урьдчилан сэргийлэх ажлыг өгсөн үүрэг даалгаврын дагуу биелүүлээгүй, төсөв хөрөнгийг нь зориулалтын бусаар ашигласан бол хотын даргад ч өгсөн үүрэг даалгаврынхаа хариуцлагыг нэхэх эрх ч бас бий. Таван хүний амь эрсдэж, олон иргэн эд хөрөнгөөрөө хохирсон энэ үйлдэлд хаа хаанаа хариуцлага хүлээж, үнэхээр хотын даргын хэлснээр хороо, дүүрэг, шат шатны байгууллагуудын Засаг даргад ч алдаа байвал түүнийг нь анхан шатнаас нь эхлээд засаад явах зүйн хэрэг. Өөрөөр хэлбэл, аль ч шатанд алдаа гарсан их ч бай, бага ч бай үүрэг хариуцлагаа хаа хаанаа хүлээдэг байх нь юу юунаас илүү чухал байна. Тэгж байж бусад хороо, дүүргийн дарга, газрын алба, холбогдох хүмүүст сургамж болж, ажлаа хариуцлагатай хийдэг эхлэлийг тавих шаардлага үүсээд байна.

Нэг ёсондоо үнэхээр л хороо дүүргийн Засаг дарга нар хариуцлага алдсан бол байж болох хамгийн хурдан арга хэмжээг авч, дараагийн ажлаа эхлүүлэх шаардлага үүсжээ. Ийм байдлаар хариуцлага хүлээдэг тогтолцоог хэрэгжүүлж эхэлбэл, дараа дараагийн ажил үүрэг гүйцэтгэх хүмүүст том сургамж болно. Өөрөөр хэлбэл, алдаа гаргасан хариуцлагагүй ажилласан хэний ч толгойг эхлээд өнгөрөөд байвал энэ мэтээр иргэд амь нас, эрүүл мэнд эд хөрөнгөөрөө хохирсоор байх нь. Одоогоос сарын өмнө Сэлбэ голын далан задарч, дөчөөн айл усанд автаж эд хөрөнгөөрөө хохирч, хотын төв тэрчигтээ усанд автаж байсан.

Энэ бол нийслэлчүүд, тур тусмаа Баянзүрх дүүргийн Сэлбэ гол дагуух айлуудад асар том анхааруулга, үерийн гамшигаас урьдчилан сэргийлэх сануулга байсан гэдгийг сануулга байсан. Тухайн үед гоё, ганган хувцастай дарга нар том том дэлгэцээр үерээс сэргийлэх тооцоо судалгаа танилцуулж, хэвлэл болгоноор лайв цацуулж, мэдээлэл хийж байгаа л харагдсан. Тухайн үед хотын удирдлагуудын зүгээс анхааруулга сануулга өгч, үерээс хамгаалах далан шуудуу байгуулах төсөв хөрөнгийг хэр хэмжээнд гаргасан бол иргэдийг нүүлгэн шилжүүлж аюулгүй байдлыг нь хангах заавар чиглэл өгсөн үүнийг  биелүүлэх үүрэг хороо дүүргийн Засаг дарга нарт бий.

      Адаглаад айл өрхүүдээ үерийн амнаас холдож буух шаардлага хүргүүлж, далан ус зайлуулах шугам хоолойны ашиглалт ямар байгааг шат шатны газрын дарга нар хариуцаж шалгах ёстой. Энэ мэтээр урьдчилан сэргийлэх арга хэмжээ аваагүй, зөвшөөрөлгүй газар олголтыг замбараагүй олгосон, бусдын эрх ашгийг зөрчиж газраа сунгаж хашаагаа барьсан байдаг юм бол нийслэлийн Засаг дарга түүнийх нь хариуцлагыг доод албан тушаалтнуудаа шаардах нь зүйтэй.

     Харин хэлсэндээ хүрэхгүй, хороо дүүргийн Засаг дарга нартаа хариуцлага тооцож чадахгүй бол Нийслэлийн Засаг дарга бөгөөд Улаанбаатар хотын захирагч Д.Сумъяабазар та өөрөө хариуцлагаа хүлээж, суудлаа хүлээлгэж өгнө үү.