Монгол Улсын Ерөнхийлөгчийн сонгуульд АН-аас нэр дэвшигч С.Эрдэнэ саналаа өглөө. Тэрбээр “Өнөөдөр Монгол Улсын найм дахь удаагийн сонгуулиар, зургаа дахь Ерөнхийлөгчөө сонгож байна. Сонгуулийн үйл явц амжилттай, ирц нэлээд өндөр байна гэж харж байна.

Нийт сонгогчдодоо хандаж хэлэхэд Монгол Улсад шударга, ёс зүйт төрийг бий болгох, төр хяналттай байх боломжийг хангах сонголт хийгээсэй гэж хүсч байна. Өрсөлдөгч нартаа амжилт хүсье. Зарим нэг нь өвчин зовлонтой байгаа сураг сонссон. Хурдан эдгэж, улс төрийн ажилдаа ороорой гэж хүсье. Би Ерөнхийлөгчийн сонгуульд “Дарангуйлалгүй Монгол-Ардчилсан Монгол” гэсэн уриатайгаар оролцож байна. Мөрийн хөтөлбөр маань таван бүлгээс бүрдэж байгаа. Би ямар нэгэн гоё сайхан амлалт өгөөгүй. Үндсэн хуулиар олгогдсон чиг үүргийн хүрээнд Ерөнхийлөгч бусад институцтэйгээ яаж харилцан уялдаатай ажиллах юм бэ гэдэг гол зүйл заалтуудыг мөрийн хөтөлбөртөө оруулсан.

Өнгөрсөн долоо хоногийн нөхцөл байдлыг харахад шударга бус сонгууль болох магадлал өндөр байсан. Ялангуяа, асар их хэмжээний мөнгө тарааж байна. Энэ асуудлыг хууль хяналтын байгууллага цэгцэлж, хараа хяналтдаа авч чадахгүй байна. 100-400 мянган төгрөг тараах явдал ердийн үзэгдэл болчихлоо. Өнөө өглөө л гэхэд манай гэр бүлийн хүний эгч хүртэл 100 мянган төгрөг аваад, санал өгсөн байх жишээтэй.

Хэний мөнгөөр хэний санал худалдаж аваад байгаа юм бэ. Татвар төлөгчдийн мөнгөөр санал худалдаж авч байгаа нь увайгүй үйлдэл юм. Тиймээс хууль хяналтын байгууллаг энэ  үйл ажиллагааг таслан зогсоогооч ээ. Алийн болгон бие биенийгээ хуурч, төрийн хувь заяагаар тоглох юм бэ" гэв.