УИХ-ын дарга Г.Занданшатар Хан-Уул дүүргийн 29 дүгээр тойрог, 17-2 дугаар хэсгийн санал авах байранд 12:00 цагт саналаа өглөө.

Тэрбээр санал өгснийхөө дараа "Сонгогч түмэндээ цар тахлын онцгой нөхцөлд зохион байгуулагдаж буй сонгуульдаа халдвар хамгааллын дэглэмээ барин, идэвхтэй оролцохыг уриалж байна. СЕХ-ноос санал хураалтын ирцийн талаар 12:00 цагийн үед мэдээлсэн. Улсын хэмжээнд санал хураалтын ирц 13 хувьтай байна. Энэ бол өмнөх сонгуулиудтай харьцуулахад өндөр дүн. Иймд иргэд сонгуульдаа идэвхтэй оролцож байна гэж бодож байгаа. Бид удахгүй Ардын хувьсгалын 100 жилийн ойн баяр наадмаа тэмдэглэнэ. Иймд 2021 оны Ерөнхийлөгчийн ээлжит сонгууль өмнөх жилүүдээс онцлог, түүхэн сонгууль болж байна. Ковидгүй зун болох гэж буй энэ цаг үед залуучуудыг Үндсэн хуулиар олгогдсон эрх, үүргээ биелүүлж, сонгуульдаа идэвхтэй оролцохыг уриалж байна" гэлээ.

Сонгуулийн санал хураалт 22:00 цаг хүртэл үргэлжлэх бөгөөд саналын хуудсыг гараар тоолж, автоматжуулсан төхөөрөмжийн дүнтэй тулгах юм. Ингэснээр сонгуулийн дүнг олон нийтэд мэдээлнэ.