2021 оны Ерөнхийлөгчийн ээлжит сонгуулийн санал хураалт маргааш 07:00 цагт эхэлнэ. Зарим иргэн энэ удаагийн сонгуульд цагаан сонголт хийхийг уриалж байгаа. Тэгвэл "Цагаан сонголт"-ын асуудалд Сонгуулийн ерөнхий хорооны дарга П.Дэлгэрнаран байр сууриа илэрхийллээ.

Тэрбээр “Ерөнхийлөгчийн 2021 оны сонгуулийн сурталчилгааны үеэр цагаан сонголтын тухай мэдээлэл гарсан. Энэ тухай сурталчилж, уриалж байгаа иргэд бусад сонгогчдын эрхэнд халдаж буйгаа ойлгох хэрэгтэй. Бид үүнд харамсч байна. Улсын төсвөөс хөрөнгө гаргаж, хуулийн хугацаанд төрийн тэргүүнээ сонгож Үндсэн хуулиар олгогдсон эрхээ эдэлж байгаа тул хэнээс ч хамаарахгүйгээр сонгуульдаа бие даан оролцох хэрэгтэй. Харин цагаан сонголт өгөхийг уриалж байгаа нь сонгогчдын эрхэнд халдсан, сонгуулийн ажилд нөлөөлж буй хэрэг. Бид иргэддээ итгэж байна. Сонгуулийн ажил багагүй зардлаар бүтэж байгаа учраас цагаан сонголт хийхгүй байхыг хүсч байна” гэв.