Зөөврийн битүүмжилсэн хайрцгаар саналаа өгөх 18 мянга орчим иргэн бий. Мөн тусгаарлан ажиглах байр, гэрийн тусгаарлалт болон халдвар аваад эмнэлэгт хэвтэн эмчлүүлж буй 7051 сонгогч зөөврийн хайрцгаар саналаа өгнө гэдгийг Сонгуулийн ерөнхий хорооноос мэдээлсэн. Тэгвэл коронавирусийн улмаас энэ сарын 6, 7-нд эмнэлэгт хэвтсэн иргэдээс санал авах боломжгүй юм байна.

Энэ талаар СЕХ-ны дарга П.Дэлгэрнаран “Ерөнхийлөгчийн 2021 оны сонгуулийн санал хураалт болохоос 3-7 хоногийн өмнө..." гэсэн хуулийн хугацаанд тулгуурлаж зөөврийн битүүмжилсэн хайрцгаар санал өгөх 7051 иргэний саналыг авсан. Энэ бол эцэслэн гаргасан тоо. Тиймээс зургадугаар сарын 6-8 гэсэн энэ гурван өдөр санал өгөх сонгогчдыг бүртгэх хуулийн зохицуулалт байхгүй. Тэгэхээр зургадугаар сарын 6, 7-нд коронавирусийн халдвар авч, эмнэлэгт хэвтэн эмчлүүлж байгаа хүмүүсээс санал авах боломжгүй гэсэн үг.

Энэ асуудалд зарим нам эвслээс шаардлага тавьж байна. Тухайлбал, МАН-аас иргэдийн санал өгөх боломжийг хангахыг хүссэн шаардах бичиг ирүүлсэн. Бид хуулиас давсан ямар нэгэн арга хэмжээ авах боломжгүй” гэв.