Сонгуулийн ерөнхий хорооноос Ерөнхийлөгчийн сонгуулийг зохион байгуулахтай холбогдуулан мэдээлэл хийлээ. Энэ үеэр СЕХ-ны дарга П.Дэлгэрнаран “Энэ удаагийн сонгуулийн онцлог бол сонгогчдын саналыг 100 хувь гараар тоолох юм. Мөн саналаа өгсөн иргэдэд бэхэн тэмдэглэгээ хийнэ. Цар тахлын энэ үед бид сонгуулийн үйл ажиллагааг зохион байгуулж байна. Тиймдээ ч Үндсэн хуулиар заагдсан сонгох, сонгогдох эрхийг цар тахлын үед хангах талаар онцгой анхаарч ажиллалаа.

Гадаадад амьдарч буй иргэдээс саналаа өгөхөөр 8000 гаруй хүн бүртгүүлсэн. Үүнээс 5800 орчим хүн саналаа өгсөн. Цаашид гадаадад байгаа иргэд, уул уурхайн ажилчид, оюутнууд зэрэг хүмүүст цахимаар санал өгөх боломж олгох нь зөв юм байна. Ялангуяа 2024 оны УИХ-ын  сонгуулийн дараагийн сонгуулиас  сонгогчдод цахимаар саналаа өгөх боломж олгох ёстой гэж Сонгуулийн ерөнхий хороо үзэж байгаа.  Энэ талаар Цахим бодлогын байнгын хороонд бид танилцуулга хүргүүлсэн. Ажлын хэсэг байгуулагдах болов уу” гэлээ.

“2641 даамал сонгуулийн санал тоолох төхөөрөмжийг хариуцан ажиллана”

Мөн “Улсын хэмжээнд 2087 хэсгийн хорооо байгуулагдаж  20 мянга төрийн албан хаагчид ажиллаж байна. Маргааш болох Ерөнхийлөгчийн 2021 оны сонгуулийн санал хураалтын бэлтгэл ажлын хүрээнд цагдаагийн байгууллагын 9000 гаруй алба хаагч хамгаалалтад, эрүүл мэндийн салбарын 1300 ажилтан ажиллана. Өнөөдөр зөөврийн битүүмжилсэн хайрцгаар санал хураах ажилд эрүүл мэндийн байгууллагын 60 туслах баг ажиллаж байна. Мөн 2641 даамал сонгуулийн санал тоолох төхөөрөмжийг хариуцан ажиллана.

Санал тоолох төхөөрөмжүүд хэсгийн хороодод байрлаж, дүн дамжуулахад бэлэн болсон. Хуульд зааснаар автоматжуулсан системээр дүн дамжуулж, дараа нь гар тооллого хийнэ. Ямар нэгэн завсарлага, гарах орох хөдөлгөөн хийхгүйгээр Сонгуулийн ерөнхий хорооноос баталсан зааврын дагуу хэсгийн хороод саналын хуудсыг 100 хувь гараар тоолно. Дүнг нэгтгэсний дараа санал тоолох төхөөрөмжийн дүнтэй нийлүүлж харьцуулна. Ингэснээр сонгуулийн дүнгийн тоо баталгаажих юм. Санал тоолох төхөөрөмжөөр дамжуулан дүнг шууд дамжуулна. Маргааш 22:00 цагт хэсгийн хороод хаасны дараа шууд мэдээлнэ. Маш богино хугацаанд төхөөрөмжөөр тоолсон дүнгүүд олон нийтэд хүргэгдэж, манай хорооны албан ёсны цахим хуудсанд байршина” гэв.