ШИНЭ НОМ: Тээр дээр нисэх шувуу

2024-12-10, 911

Яруу найрагч С.Билигсайхан агсны "Тээр дээр нисэх шувуу" номын нээлт өнгөрсөн бямба гарагт болсон билээ. Хайр, гэрэл дүүрэн, тунгалаг найрагч бидний дунд амьдарч, оршин буй агшнаа мэдэрч, илэрхийлсэн олон сайхан мөртүүдээ тэрлэн үлдээснийг түүний дүү яруу найрагч С.Бэрцэцэг ийн эмхэтгэж, уншигчдын гар дээр өргөн барив. Эл ном гэрэл зурагтай хослон бүтээгдсэнээрээ онцлог бөгөөд гэрэл зурагчин У.Ганбаяр түүний шүлгүүдэд зориулсан зургуудаа хамтатган хүргэжээ. Ингээд хамтдаа гэрэлт хүмүүний шүлгийн мөртүүдээр хамтдаа аялья. Өөрөө байхгүй ч бүтээл туурвил нь мөнхөд эзнийхээ өмнөөс амьд халуунаараа оршсоор байдгийн нэгэн жишээ гарцаагүй тэр мөн билээ.

Шүлгийн түүврийн эхний хуудсыг сөхөхөд угтсан гурван мөрт.

"Онгож гандсан уруул дээр минь

Орой намрын бороо дусна

Орчлонгоос буцах тийз хаанаас авдаг вэ". Нэг тийм итгэл алдрах мөч шиг. Үгүй бол энэ амьдралд ханаж уйдаад буцах гэж буй нэгэн ч юм шиг. Нэрээ орчлонгоос буцах тийз гэж бий болов уу.

Тэр салхины мөрийг үзэж, намрын өглөө төөрөн будилж буй моддыг харж, ботгоны дуунаар байгаль дэлхий сэргэн буйг ажиж. Түүнээс гадна хайр, хүлээлт, хүслийг ийм нэг гурван мөртөд багтаан илэрхийлсэн байна. Энэ бол

"Цонхон доогуур чинь

Өнгөрөх сөн гэхдээ би

Хорвоог тойроод ирлээ".

Юмсыг тэр цөөн үгсэд багтаахдаа олон талаас нь бодож, утга найруулга, онож буулгахын тухайд бяслаг шиг шахаж мөртүүдээ төрүүлдэг байна. Он цаг ч эргэхгүй. Одоо сууж байхад ч цаг хугацаа урсан одож, маргааш гэхэд л дурсамж болж үлдэнэ. Он цаг эргэн ирэхгүй гэдгийг тэр мөн бичин үлдээсэн нь

"Гийж ирсэн нулимс

Гэлбэсхийгээд хөлдөнө

Он жилүүд эргэж үл ирмүй.

Түүний шүлэгт мөн амьтныг хүнчилсэн мэт, үйл хийсэн мэтээр олж бичсэн нь сонирхол татна. Тухайлбал,

"Шөнийн аниргүйд

Шалан дээгүүр хорхой гүйх нь

Мөр шүлэг бичих шиг". Энэ мэтээр мөртүүд цааш хөвөрч байна. Утгыг тайлж, үг бүрийнх нь мөн чанарт саатаж, гүн рүү нь орон аялабал гарцаагүй түүний шүлгүүд нарийн торгон мэдрэмж, гэгээн ариун сэтгэлээс мэндэлжээ гэмээр. Хорвоог тэр гурван мөртөд багтаан бичиж, бодол санаа, авьяас билгээ юүлэн асгадаг байжээ гэдгийг энэ ном бидэнд бэлхнээ хэлж байна.

ШИНЭ НОМ: Тээр дээр нисэх шувуу

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.