МУИС-ИЙН УТГА ЗОХИОЛЫН НЭГДЛЭЭС ГАРГАСАН "ЗҮЙМЭЛ УЛИРАЛ" НОМООС ОНЦЛОХ ТАВАН ШҮЛЭГ

2024-10-19, 1028

МУИС-ийн Утга зохиолын нэгдлийн гишүүдийн "Зүймэл улирал" шүлгийн түүвэр гарчээ. Тус түүвэр нийт 17 оюутны шүлгээс бүрдсэн байна. Энэ талаар МУИС-ийн Утга зохиолын нэгдлийн зөвлөх багш, утга зохиол судлаач, доктор, яруу найрагч Д.Нямдорж уг түүврийн өмнөх үгт "МУИС-ийн Утга зохиолын нэгдлийн гишүүдийн шилмэл шүлгийн ээлжит түүвэр уншигч танд хүрч байна. Ээлжит гэсний учир, урьд өмнөх түүврүүдийн хооронд тогтсон хугацаа үгүй, эвлэж бүтсээр, эмхэрч цэгцэрсээр өөрийн зохист хугацаандаа гардагт оршино. Энэ удаагийн түүвэрт Утга зохиолын нэгдлийн үйл ажиллагаанд идэвхтэй оролцдог, уран зохиол шимтэн сонирхогч, дурлан бичигч нэр бүхий 17 оюутны бүтээл орлоо" гэж бичжээ.

Ингээд тус түүвэрт багтсан зарим шүлгээс онцлон хүргэж байна.

ХЭНД Ч ЮМ...

Өдөр өдрөөр холдож буй чи бид хоёр

Өрөөлөөс нэгнийгээ хайсаар олов бололтой.

Салж одсон атлаа ч санагалзах нь

Хайр гэж итгэдэг гэнэн явж дээ.

Уруул чинь одоо ч өөрийнхөө амтыг мэддэггүй хэвээрээ юу?

Урсахдаа нулимс чинь өөрийгөө навчис шиг санадаг хэвээрээ юу?

Уруулыг чинь дагуулж илбэх хуруу

Унтсан хойно чинь ширтэн суудаг харц

Өнчин сэтгэлээр ингэж шаналах учиртай бол

Өрөөлийн зүрхээр л чамайгаа хайрлаж явъя даа. IХ.БаянмөнхI

***

Эрвээхэйнд нулимсаа долоолгуулах яст мэлхий,

Эргэх дэлхий халуу шатахад дэгдэх хачиг, түүнд хазуулсан хүн махнаас гарах,

Эмийн сангийн хаяганд идшээ борцлох хэрээ,

Эгэл нэгэн ураацай хагас сар агаарт унтах,

Төрсөн усныхаа амтыг санаж түрсээ шахаж, үхэхээр ирдэг загас,

Тархиндаа соронзтой шувууд төөрөх тухай мартах,

Түймэрт нэрэгдсэн газрын охийг хүртэх гэж хэрэх зээр,

Тэс хөлдчихсөн гүлмэр зуун жилийн дараа амь орох,

Тийм, ийм л юмс бодож байгаад унтчих тул яруу найрагаас алсрах. IС.Мөнх-ОргилI

***

Хуучин энэ гудамд амь тавих дөхсөн

Амь тавиагүй олон жил туссан ганц гэрлийн шон

Түүний доор хагарч халцарсан засмалын үлдэгдэл

Хөгшин засмалыг хөхүүл эх мэт л гэрэл удаан тэжээжээ. IС.ЭнхчимэгI

***

Хэзээ ч мэдрээгүй биеийнхээ эсүүдтэй

Чамайг хараад анх уулзлаа.

Хэлэнд шүлс давлагаа мэт орооцолдон

Хэн нэгнийг би залгичих шиг боллоо.

Хэрвээ би чамайг мартсан ч

Хэзээд чи надад байх боллоо.

Байх...

Ийм сайхнаар ганцаар оршиж

Ганц биед хоёул оршиж

Гадаа цастайд нэг биеэс дөрвөн мөр үлдэх

Үүрээр сэрээд амьсгал авах хэн нэгнийг сонсох

Өдөр бүр бодох, зөвхөн өөрийнхөө тухай

Бодож дуусахгүй их бодолтой болох.

Болох...

Ийм догдлолоор харанхуйг ширтэх

Харанхуй миний өөдөөс ширтэх

Хамтдаа алга болохыг мөрөөсөх

Мөрөөслүүд хаа нэгтээ зүүдэнд минь алхах

Зүүд минь над руу алхах

Тэгээд бид дахин сэрнэ.

Амьсгал минь чамд сонсогдоно.

Алга болохыг бид хүснэ.

Тэд алга болоход би далайн эрэг дээр

Тэд алга болоход би далавчтай болно.

Тэд алга болбол хотын хамгийн өндөр барилгын дээвэр

Нарны сүүлийн тусгалаар далавч мэт үзэгдэнэ. IО.Номин-ЭрдэнэI

***

Маргаашийн наран чамд амьдрах итгэл бэлэглэнэ гэж найдна.

Магадгүй чи үхнэ, гэсэн ч би амьдарна

Мартагдсан дүрийг чинь санах сүүлчийн хүн болохын төлөө

Магад чиний авсан сүүлчийн амьсгал болохын төлөө…

Жигүүртэн шувуудын тонших өчүүхэн шавж билээ би.

Жижигхэн хошуунд чинь зуугдах гэж газрын хөрснөө гарсан юм.

Жин үдийн нарнаар өмнө чинь нүцгэрсэн билээ.

Жинхэнэ сүнсээ хүртэл нүдэнд чинь дэлгэсэн билээ.

Тув тунгалаг хуяг агссан баатар эр чи билээ.

Тулааны талбарт нүцгэн орсон зоригт цэрэг би билээ.

Тугалган жадны чинь ирэнд амиа өргөхөөр давшсан

Туйлбарт зоригтны үхэл гэдэг нэгэн насны жаргал билээ.

Маргаашийн наран чамд амьдрах итгэл бэлэглэнэ гэж найдна.

Магадгүй чи үхнэ, гэсэн ч би амьдарна

Мартагдсан дүрийг чинь санах сүүлчийн хүн болохын төлөө

Магад чиний авсан сүүлчийн амьсгал болохын төлөө...IӨ.СумъяаI

МУИС-ИЙН УТГА ЗОХИОЛЫН НЭГДЛЭЭС ГАРГАСАН "ЗҮЙМЭЛ УЛИРАЛ" НОМООС ОНЦЛОХ ТАВАН ШҮЛЭГ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.