Эргэлт.мн мэдээллийн сайтын энэ удаагийн “Оюунт Монгол” буландаа “Болор цом”-ын эзэн МУЭ болон МЗЭ-ийн шагналт яруу найрагч, зураач М.Амархүүг урьж оролцууллаа. Тэрбээр “Орчин үеийн залуус түүхийн мэдлэг жаахан муу байна. Амьдарч буй газар нутаг, аж, төрж буй улсын түүхийг мэдэж байх ёстой гэж боддог. Тэр дундаа эх орныхоо түүхийг мэдэхгүйгээр ирээдүйн эх орноо бүтээнэ гэж байхгүй шүү дээ.

           “Миний анхны мэргэжил бол зураач. Ерөөсөө анх намайг урлагт дуртай болгосон зүйл ч гэсэн зураг зурах, зураач болсон явдал. Аав, ээжийн ярьдагаар гурван настайгаасаа зурсан гэдэг юм. Дунд сургуульд байхдаа ч гэсэн олон уралдаанд оролцож, багаасаа зургаар үнэлэгдэж явсан. Сүүлдээ мэргэжлийн зураач болж, зураачидтайгаа олон жил нөхөрлөсөн. Тэднээсээ ч сурах зүйл их байсан. Түүнийхээ хүчээр ч гэсэн өдий дайтай зурж байна. Уран бүтээлч хүн учраас тасралтгүй л зурдаг. Үүнээс гадна номын чимэг зургийг тэр бүр зураач зураад байдаггүй. Маш уран, хурц сэтгэлгээ, өндөр ур чадвар шаардагддаг төрөл зүйл” хэмээгээд дараах номуудын залуус уншаасай хэмээн нэрлэсэн юм.

 Г.АЮУРЗАНА ЗОХИОЛЧИЙН “БӨӨГИЙН ДОМОГ” РОМАН

Зохиолч энэхүү номондоо бөө мөргөл хийгээд шарын шашны онцлог адил төстэй талуудыг чадахынхаа хэрээр дурдсан бөгөөд бусад энэ төрлийн номууд хэт нэг талыг барьсан, аль нэг талыг тэнгэрт тултал нь магтсан байдаг бол Бөөгийн домог роман эсрэгээрээ үнэн худлын дэнсэн дээр дэнслэгдсэн, он цаг түүхийг хувьд багагүй хийсэн судалгаа шинжилгээн дээр тулгуурлан бичигдсэн нь уншиж эхэлсэн хэн бүхний нүдэнд илхэн буй. Энэхүү роман монголын уран зохиолд агуулга, хэлбэр, бичлэгийн хувьд шинэлэг байж чаддаг.

Уран бүтээлч хүн учраас тасралтгүй л зурдаг. Үүнээс гадна номын чимэг зургийг тэр бүр зураач зураад байдаггүй. Маш уран, хурц сэтгэлгээ, өндөр ур чадвар шаардагддаг төрөл зүйл

В.В.НАБОКОВИЙН БҮТЭЭЛҮҮД

Орос гаралтай, Америкийн зохиолч Владимир Владимирович Набоков 1899 оны дөрөвдүгээр сарын 22-нд Петербург хотод төржээ. Гэр бүлийнхэн нь Английн соёл иргэншлийг шүтэн бишрэгчид байсан тул тэрээр хар багаасаа англи хэлийг орос хэлнээсээ илүү сурсан тул эцэг нь хүүдээ эх хэлийг нь заалгах гэж орос хүмүүжүүлэгч авч байжээ. Тэрээр 1940 он хүртэлх зохиол бүтээлээ Владимир Сирин гэсэн нууц нэрээр хэвлүүлж байв. Набоков жаал охинд сэтгэл алдсан хижээл эрийн тачаангуй хүслийн тухай өгүүлсэн “Лолита” романаа 1955 онд хэвлүүлсэн. Энэ романыг уран зохиолоос зөвхөн сургаал номлол хайдаг судлаач шүүмжлэгчид "ужиг самуун явдал, хуял тачаалын зохиол" хэмээн угтсан боловч чухам энэ л бүтээл түүнийг дэлхийд алдаршихын эхийг тавьсан юм.

Набоков жаал охинд сэтгэл алдсан хижээл эрийн тачаангуй хүслийн тухай өгүүлсэн “Лолита” романаа 1955 онд хэвлүүлэв

ДОСТОЕВСКИЙ “ГЭМ ЗЭМ” РОМАН

Оросын Федор Достоевскийг дэлхий даяараа өндрөөр үнэлж, Пушкин, Толстой, Чехов нарын адил Оросын бэлгэдэл гэж үздэг. Достоевский хүнийг их анхаарч, сэтгэлзүйг нь гүн гүнзгий судалснаараа онцлог юм. Тийм болохоор зөвхөн Достоевский л хүний сэтгэл мэдрэмжийг тийм нарийн илэрхийлж, гол судлагдахуун болгож, сэтгэл зүрхнийх нь гүнд хүрч чаддаг биз ээ. Зөвхөн тэр л хүний эрхэм дээд чанар, арчаагүй дорой байдлын аль алиныг нь илэрхийлэн гаргаж чаддаг. Достоевский амьдралдаа шүүхээр шийтгүүлж, шоронд хоригдож, цаазын ял сонсож, цөлөгдөж, хоосон ядуу байж, мөрийтэй тоглоомд донтох зэргээр ихийг үзсэн билээ. Тэрбээр амьдралдаа үзэж туулсан бүхнээ хамгийн гол зохиол бүтээлүүддээ хосгүй чадварлагаар илэрхийлэн бичсэн юм.

Их олон судлаач түүний “Гэм зэм”, “Солиот”, “Ноход”, “Хөвүүн заяа”, “Карамазовын хөвүүд” зохиолуудыг “Гайхамшигт тавал” хэмээн нэрлэж, хамгийн алдартай сор бүтээлүүд нь гэж үздэг ажээ. 1866 онд бичсэн “Гэм зэм” бол дэлхийн уран зохиолын түүхэнд хамгийн үнэтэй байр суурь эзэлдэг зохиолуудын нэг билээ. Энэ бол их гүн гүнзгий философийн роман, сэтгэл зүйн өгүүлэл, сонирхол татам адал явдал, хүмүүс нь гэм нүгэл үйлдэж явдаг, тэгээд эцэст нь энэрэл өршөөл эрж явдаг баргар дүнсгэр хотын гайхамшигтай дүрслэл билээ. Романы гол баатар Родион Раскольников айж чичирсэн арчаагүй амьтан биш, эрхтэй сүртэй хүн гэдгээ батлан харуулахын тулд хүний амь хөнөөхөөр шийддэг. Зохиолч ёс журамтай, ухаантай, сайхан сэтгэлтэй залуу эр алуурчин болон хувирч байгааг, мөн гэмт хэрэг үйлдсэн Раскольников гэмээ цайруулж чадах тухай өгүүлсэн байдаг.

Зохиолч ёс журамтай, ухаантай, сайхан сэтгэлтэй залуу эр алуурчин болон хувирч байгааг, мөн гэмт хэрэг үйлдсэн Раскольников гэмээ цайруулж чадах тухай өгүүлсэн байдаг.

МОНГОЛЫН ТҮҮХЭН СУРВАЛЖ БИЧГҮҮД

“Нэрт эрдэмтэн Оуэн Латтимор хэлсэн байдаг. Хорьдугаар зууны яг эхэн үед Монголчуудыг Америкийн индианчуудын хувь заяа хүлээж байсан. Өөрөөр хэлбэл сөнөж мөхөхийн ирмэг дээр хүрсэн ийм үеэс эхлээд 1924 онд Бүгд Найрамдах улсыг тунхаглах хүртэл энэ хооронд Монголын түүхийн ээдрээ, удирдагчдын улс төрийн чадварлаг бодлого хэрхэн явуулж байсныг энэ номд дэлгэрэнгүй өгүүлсэн байгаа. Энэ сонсдог ном бол та бүхний эрдэм мэдлэгт тухайн цаг үеийн хүмүүсийн оюун ухааныг хүргэж байгаа юм. Түүхийг бид эдүгээчилж үзэх хандлага газар авсан байна. Тухайн үеийн хүний оюунлагийн түвшин, өнөө үеийн хүний оюунлагийн түвшин шал өөр. Тиймээс он цагт нь тохирсон дүгнэлт хийх нь чухал юм.