БНСУ-ын сэтгүүлчдийн холбооны ерөнхийлөгч Ким Дун Хун тэргүүтэй Солонгосын сэтгүүлчдийн баг Монгол Улсад аялж, үндэсний баяр наадам, өв соёл, уламжлалтай танилцжээ. 10 гаруй хүнтэй БНСУ-ын сэтгүүлчдийн багт Монголд хэд хэдэн удаа ирсэн сэтгүүлчээс эхлээд анх удаа ирж буй сэтгүүлч ч байна. Солонгос сэтгүүлчид монгол баяр наадам, өв соёлоо хадгалж үлдсэн байдлын талаар ам сайтай ярьж байна. Уншигч танд БНСУ-ын сэтгүүлчдийн багийн төлөөллийн Монголд ирсэн, баяр наадам, соёл уламжлалтай танилцсан тухай сэтгэгдлийг нь хүргэж байна.

“KBS” телевизийн сэтгүүлч И ЮҮН ЁН: Улаанбаатар хот гэрлэн дохионы асуудлаа шийдэж чадаагүй юм шиг санагдлаа

Миний хувьд Монгол Улсад анх удаа ирж байна. Өмнө нь хүмүүсээс сонсож байсан ч яг өөрийн биеэр ирж, нүүдэлчин ахуй, соёл, өв уламжлалыг нь харахад үнэхээр сайхан байлаа. Тэр дундаа “Ковид-19” цар тахлаас хойш бараг зогсоод байсан аялал, жуулчлалын салбараа эргүүлэн сэргээхээр идэвхтэй ажиллаж байгаа нь харагдаж байна. Гэхдээ нийслэл Улаанбаатар хотод ирэхэд автозамын асуудал их анхаарал татсан. БНСУ-д ижилхэн түгжирч, уддаг л даа. Харин Улаанбаатар хот гэрлэн дохионы асуудлаа зөв, зохистой шийдээгүй ч юм уу, замын хөдөлгөөнд оролцож байгаа иргэд дүрэм, журмаа баримталдаггүй юм шиг санагдлаа.

“Kyeongin Ilbo” сонины сэтгүүлч КУН ЖИ ЁН: Анх ирэхэд хачин мэдрэмж төрсөн ч одоо Монголын талаар дотно мэдрэмжтэй нутаг буцах нь

Монгол Улсад анх удаа ирж үзлээ. Үнэхээр сайхан байна. Анх Монгол ирээд, онгоцноос буугаад их хачин мэдрэмж төрж байсан ч одоо Монгол Улс их дотно санагдаж байна. Энэ дотно мэдрэмжээ тээгээд нутаг буцах нь ээ. Хэвлэл мэдээллийн байгууллагад ажилладаг сэтгүүлчийн хувьд харахад монгол сэтгүүлчид дотоодын сэдэв, асуудлаа хөндөж бичихээс гадна монгол орноо гадаадын жуулчид, орнуудад таниулж, түгээх ажлаа сайн хийдэг шиг санагдсан. Гэсэн ч олон улсын анхаарлыг татаж, дэлхийн олон орноос жуулчин хүлээж авдаг Улаанбаатар хотод замын тэмдэглэгээнээс эхлээд хаяг, байршил зөвхөн монгол хэлээр бичигдсэн байсан. Хэрэв зам, хаяг байршил, тэмдэглэгээгээ зөвхөн монгол хэлээр бус олон улсын хэлтэй хослуулбал жуулчдад таатай орчин бүрдүүлсэн хот болох болов уу.

“Asia Business Daily” сэтгүүлийн сэтгүүлч ЧУЭ ТЭ ЁЛ: Монгол наадам үзээд “Ийм учраас л Их Монгол Улсын дайчид морьдыг ингэж гарамгай эзэмшсэн байх нь” гэж бодож байлаа

Анх Монгол Улсад 10 жилийн өмнө ирж үзсэн. Тухайн үед албан айлчлал сурвалжлах сэтгүүлчээр ирж байлаа. Харин одоо ажлын түвшинд бус аялж, газар үзэж, соёл, уламжлалтай нь танилцахаар ирсэн нь сайхан байна. Манай сэтгүүлчдийн баг Архангай аймгийн Цэнхэр сумын 100 жилийн ойн баяр наадмыг очиж үзсэн. Тэгэхдээ баяр наадмын хурдан морьдыг машинтайгаа дагаж үзлээ. Тэгж явахдаа л “Ийм учраас л Их Монгол Улсын дайчид морьдыг ингэж гарамгай эзэмшиж, унаж, эдэлж байсан юм байна” гэж бодож явлаа.

“Kangwondomin Ilbo" сонины сэтгүүлч ПАК ЧАН ХЁГ: Олон солонгосын харахыг хүсдэг цэлмэг тэнгэр, гялалзсан оддыг харж, тайвшрал мэдэрлээ

Миний бодлоор олон солонгос хүн Монголд ирж, цэлмэг тэнгэрт гарсан од харахыг хүсдэг байх. Түүний адилаар бид ч Монгол Улсад ирж, шөнийн цэлмэг тэнгэр, оддыг харсан нь гайхалтай байлаа. Үнэхээр тайвшрал мэдэрч чадсан. Гэсэн ч энэ сайхан зүйлсийн зэрэгцээ хэдэн дутуу зүйл байсныг хэлье. Тухайлбал, БНСУ-ын сэтгүүлчдийн баг Чингис хаан музейг үзэж, сонирхсон. Гэтэл жуулчдын сонирхлыг хамгийн ихээр татсан Чингис хаан музейн нэг ч үзмэр гадаад тайлбартай байсангүй. Бүх үзмэр, баримал нь зөвхөн монгол хэлээр байсанд сэтгэл гонсгор буцах нь. Бас автозамын асуудал анхаарал татлаа. Автозам бол эдийн засаг. Автозамаа шинэчилж, эгнээг нь уртасгаж, томсгож чадвал ирээдүйд илүү олон жуулчин татаж, эдийн засагт нь ч нэмэр болох болов уу гэж бодсон.