- Ч.ХҮРЭЛБААТАРЫН БҮЛЭГЛЭЛ МАН-ЫН ЦАХИМ СИСТЕМД “ХАЛДАЖ”, НАМЫН ГИШҮҮНЧЛЭЛГҮЙ ХҮМҮҮСИЙГ ХУУЛЬ БУСААР БҮРТГЭСЭН ГЭВ ҮҮ-

           Сангийн сайд асан, УИХ-ын гишүүн Ч.Хүрэлбаатарын хийрхэл хэрээс хэтэрч, өөрт нь л ашигтай байвал ард олон, намынхаа бодлого, зарчмыг уландаа гишгэх нь юу ч биш бололтой. Ингэж хэлсэн шалтгаан нь өнгөрсөн долоо хоногт Увс аймгийн МАН-ын XXXII бага хурал хуралдаж, аймгийн намын даргаа хууль бусаар сонгосон байна.

          Олон улсын эмэгтэйчүүдийн баярын хөл хөөрт “даруулж” хийсэн энэхүү хуралд УИХ-ын гишүүн Ч.Хүрэлбаатар ихээхэн үүрэг гүйцэтгээд зогсохгүй өөрийн хүнээ намын дарга болгохын тулд байж боломгүй будлиан нэлээд тарьсныг эх сурвалж мэдээллээ. Тодруулбал, Ч.Хүрэлбаатар Увс дахь бүхий л “хар, бор” ажлыг нь хийж, гар хөл нь болж явдаг аймгийн Тамгын газрын дарга С.Батжаргалыг нэр дэвшүүлэн, сонгогчдынх нь тоонд "анхаарч", Увс аймгийн МАН-ын даргаар “сонгуулж” чаджээ. Энэ талаар эх сурвалж “Увс аймгийн МАН-ын даргыг сонгох МАН-ын 32 дугаар бага хуралд С.Батжаргал нэр дэвшин өрсөлдөхдөө Ардчилсан намын болон нам бус иргэдэд хууль бусаар мандат олгож, хуралд оролцуулж, 30 гаруй хүний саналыг хууль бусаар авсан. Ингэснээр илт давуу санал авч байгаа мэтээр С.Батжаргал нь Увс аймгийн МАН-ын даргаар сонгогдсон. Хамгийн ноцтой нь Ч.Хүрэлбаатарын бүлэглэл МАН-ын цахим системд хууль бусаар намын гишүүнчлэлгүй хүмүүсийг дүрмийн бусаар бүртгэсэн. Үүнийг МАН болон хууль хяналтын байгууллагад шалгуулах, үнэн мөнийг нь тогтоолгох, Увс аймаг дахь МАН-ыг бохир улстөрчдөөс цэвэрлэх хүсэлтэй байгаа” гэсэн юм.

            Энэхүү хууль бус үйлдлийг Увс аймгийн 1018 иргэн эсэргүүцэн МАН-д “Увс аймгийн намын хорооны хурлыг будлиантуулж, МАН-ын удирдлагыг дүрмийн бусаар, хууль зөрчиж авсан тул энэхүү хурлын шийдвэрийг хүчингүй болгож өгнө үү” гэсэн утгатай гомдолд гарын үсэг зуран МАН-ын Хяналтын ерөнхий хорооны дарга Баярбаатарт өгөөд байгаа аж.  Гомдлын дагуу МАН-ын хяналтын хороо энэ долоо хоногт Увс аймагт ажиллаж, “Намын нэр хүнд унагаж, хууль бус, будлиан үүсгэсэн нь тогтоогдвол буруутай этгээдүүдэд хариуцлага тооцно” гэж буйг албаны эх сурвалж онцолж байна.

          МАН дотооддоо шинэчлэл хийж, цахим нам болж буйгаа зарлаад удаагүй байгаа энэ үед Ч.Хүрэлбаатар нарын энэхүү үйлдэл бодлогынх нь эсрэг ажиллагаа болж байгаа гэхэд буруудахгүй. Тодруулбал, МАН ихээхэн хөрөнгө зарж, цахим хэлбэрт шилжүүлж, гишүүнчлэлээс эхлээд хялбаршуулж болох бүхнээ цэгцэлж явахад нь гишүүд нь системээ “хакердаж”, дуртай хүнээ нэмж, хасаж байгаа нь зүйд хэр нийцэхийг, үүнд ямар хариуцлага тооцохыг харах л үлдлээ.

         Ташрамд дурдахад, Увс аймгийн МАН-ын даргаар шалгараад байгаа С.Батжаргал нь төсвийн хөрөнгийг зориулалт бусаар зарцуулсан, авлига, ашиг сонирхлын зөрчлийн хэргээр хуулийн байгууллагад шалгагдаж байгаа аж. Энэ талаарх баримтыг дараагийн дугаартаа дэлгэх болно.